Rispondo un poco a tuti. E grassie par l’interese che dimostrè pai campioni dela mia gioventù.
El papà del Albano gaveva la salumeria al principio de via Setefontane (Siebenpumpenstrasse). Albano fazeva l’università. Tantisimi ani dopo son pasà par caso de là e lo go visto in salumeria drio el banco. Noi fazeimo do robe diverse e a diverso livelo. Par quel el contato iera solo quel de atleti tra de lori. L’Aurichio lo go magnà anca mi, ma in Germania, importà diretamente de Napoli.
In quela foto se vedi Pino (Cressevich), ma i altri no li conoso. Me par però de ‘ver sentì i nomi de Corsi e Toffoletto. Bisognaria che vardi nele mie robe se trovo i ordini de arivo.
In quela altra foto el 109 xe Pino. El 110 no giureria, forsi Zerial, ma me par che Pino Zerial iera del CRDA de Crasso e no de l’Edera. El 111 xe sicuramente Di Lorenzo, Edera. No tanto bravo sui 5, parchè lo go batù sempre, quanto sui 50 chilometri. La mia gara più longa xe stada el Giro de Trieste 1952, de 20 chilometri, la mia ultima gara, vinto de Dordoni, anca Pino. Cressevich xe rivà secondo. Mi go corso col fradel più picio de Dordoni (Carlo) a Genova nel 1947 ai campionati taliani de terza serie e son rivà quinto sui 5 chilometri. Altri nomi dei mii tempi iera Crasso, Narduzzi, Terconi, Chermoli, Bressan, Luisa. Con Bressan go fato una americana a copie in giugno del 1945. Semo rivai quarti, ma Bressan iera za vecio e sensa alenamento. Terconi iera primatista dei diese chilometri prima de Cressevich, Luisa seconda serie e me par dela Ginastica. Go batù qualchedun, ma, come che go dito una volta, lori iera veci e mi iero giovine pompante. No xe un sbalio. Pompavo, pompavo ben.
Cressevich nel 1947 ai campionato regionali de Udine sui 10mila el me ga tirà (correvo nella sua ombra) e cusì son rivà secondo. Nel 1948 no’l xe ‘ndà ale olimpiadi de Londra. Una porcheria, ma ierimo TLT. I ga mandà un altro che no ga fato gnente. Pino nel 1948 el iera potente. Quatro ani dopo, nel 1952, el gaveva trentasie ani e el xe ‘rivà otavo, el gaveva quatro ani de più e quatro ani quela volta iera ‘ssai.
A sior Ruzier go mandà una foto che ga fato mio fradel dopo una gara sui 5000 con Cressevich, Luisa e el fradel de Luisa e mi. Pino ga vinto, secondo Luisa e mi terzo.