Gò visto che ghe xe zà un topic che gà par ogeto "mendaresse", postado da babaTS. Gò vardado cosa che ghe jera e spero che no' la se dispiaşi se zonto qualcosa anca su ‘stò vecio mestier, oramai squaşi del tuto in dişuşo, oltre ai altri mestieri de done che ghe xe in t’el ogeto.
Mendarese.
Un dei lavori co’i aghi jera quel dele “mendarese”. Qualcheduna la meteva su ‘na spezie de tripode de fero una bala de vetro piena de aqua, ‘stà bala la vigniva doprada, con una luşe de candela o de lume a petrolio, come lente pae ramendar mejo el punto roto, altre usava ramendar metendo un cavel indove che se scuminziava a lavorar. Tante mendarese le uşava ‘ndar a domicilio un zorno in t’un rion e un zorno in t’un altro.
El “parecio per governar le calse" jera ‘na spezie de vaşo de fero largo de soto e streto de sora, se meteva la calsa drento e in zima se fermava el punto indove che ghe jera la smajadura o el fil tirà; tacà sula luşe jera un longo fil e in zima jera come ‘na matita co’ un ago che co’ l’eletrizità el governava la calza.
Ricamatrici.
Ghe jera anca tante boteghe de “ricamatrici” indove la parona, vestida co’ una flaida de satin nero luzido e un grando coleto bianco, la sorveliava le garzone e le meze lavoranti. Una de’stè boteghe jera in via Maiolica e ‘n’altra in paiza del’Ospedal rente la farnacia, ma ghe ne jera anca altre. Ogi xe squaşi pasà de moda farse el “coredo”, ma ‘na volta se portava a ricamar tavaje, tavajoi, ninzioi, federe e anca bavarjoi par i pici e in qualche negosio se faseva anca el “plisè”
Sartine.
Le "sartine” no’ gaveva vita fazile sul lavor; le garzone, che i le ciamava anca “scovabiechi”, le doveva pagar se le voleva imparar el mistier e solo cò le deventava meze lavoranti le jera in paga; le pasava ore e oresensa parlar e se le tirava suşo la testa la “mistra” (maestra d’arte) pronta ghe dişeva “Te ocori qualcosa?” Se uşava dir che “le lasava i oci sul lavor” , anca parché cò ocoreva le lavorava anca de dimenica e cò jera scuro preto le cuşiva co’ la lume a petrolio e, lavorando a caşa dela “mistra”, tante volte bişognava anca farghe tuti i lavori: portar via le scovaze, scovar e anca lavar i piati. Fortunade jera quele che le ‘ndava a lavorar in te le grandi sartorie, come par eşempio l’”Unione Militare” de via mazzini. Anca el duca D’Aosta jera aventor de ‘stà “Unione” e ‘l se faseva far le divişe parchè ghe jera una sarta che la saveva meterghe la justa doşe de imbotidura in te la jaca; in ‘stà sartoria i “tajadori” i lavorava a provigion e ala sartina jera lori stesi che ghe dava un “fiso”.
Sopresadore.
Un altro lavor de done jera la “sopresadora”. Ghe jera una de ‘stè stirerie sul canton fra le vie Caccia e Parini; jera tre, quatro done che in mezo al local le gaveva un bancon; sora la testa jera impicada tuta la roba zà stirada; cò vigniva l’aventor, con un baston le tirava zò la sua roba che la jera su un picarin. De solito le uşava stirar solo che roba bianca. Done che sopresava se podeva veder anca caminando par Corso Cavour de una finestra del “hotel Jolly” che gaveva drento anca ‘na stireria.
Par lavar biancaria se uşava dir “faso lisia” e una lisia, metendo in conto anca el tempo par sopresar, la durava ‘na setimana. Jera zà ‘na richeza ‘ver un’orna de aluminio, parché in quele de legno i cerci che guantava i se ruziniva e sula roba bianca se vedeva sti punti de ruzine. Chi nò gaveva se caparava in qualca magnera la mastela dei capuzi del porziter.
Procacine.
Jera tante le magnere de risolver el proprio mantenimento, tante done fazeva le “procacine” e le andava sempre ale aste del Monte de Pietà in corso Italia; le jera sentade davanti dela porta e più de qualcheduna de lore le gaveva doso un traverson de “satin nero lustro”. Ogniduna gaveva i sui propri aventori che ghe ordinava la roba (squaşi sempre oro e gioieli) e ‘l steso zorno, dopo l’asta, i se trovava in qualca logo là rente par risolver ‘stà compravendita. El loro lavor jera de tirar par trovar quel che ghe serviva a l’aventor sìa come roba che come prezo. De ‘stè operazioni doveva saltar fora anca quel che la “procacina” gaveva dimandà come, dişemo, provigion
Par un fià de tempo, prima de star soto San Giusto, l’istituzion de 'l Monte de Pietà la jera in Bariera, nela caşa rente la torefazion co’l maşinin e se parla del 1896.
In quel che conosemo tuti jera un bancon par preşentar un pegno ala stima, rente jera la casa e preşentando la “boleta” dopo la stima se ciapava la sovenzion che la jera sempre inferior ala stima scrita sula “boleta”.
Rente la porta ghe jera do sportei par la consegna e el ritiro dei “premi no’ prezioşi", i acetava ninzioi, machine fotografiche, scarpe nove, radio e altre robe ‘ncora.
Jera longhi cò cambiava le stajoni parché la zente portava al Monte par ciapar qualche lira o anca parchè la roba no’ la vignisi tocada dele tarme, cusì se gaveva anca più posto in armeron. Ore intiere - fra şburtoni e barufe - ocoreva, spezialmente par dişimpegnar qualcosa; tuti spetava in t’un quadrato de posto e rente l’ascensor che mandava zò la roba ghe jera do longhi carei, un de la roba ch’el comeso gaveva zà ciamà el numero e ‘n’altro de la roba pena rivada, perzò guera fra quei che spetava e quei che tornava, “la me daghi dai quel capoto blu rente l’ascensor”; la me daghi quel capoto verde che gò i fioi pici soli a caşa“ "la podeva star qua come mi, che gò i faşioi sul fogo”. Ghe jera anca un zerto “Zanutel” che gaveva la botega in Corso ch’el dava capoti a nolo o acetava pegni. Chi che se vergognava de ‘ver afari co’l Monte, pagava un “servo de piaza”.
Tante robe par strane e inverosimili, parò “ieri” Trieste la jera cusì. Xe tute robe vere visude de zente che pol confermarle o visude de altri che i le gà contade.
Alcune insegne e locandine inerenti i mestieri in oggetto.
Ciau ciau, sempre con tanta simpatia, Lela.
