Quando scrivo, cerco de pesar un poco le parole; no go scrito che el iera pele e osi, ma che el se iera smagrì un poco. Nela prima foto xe el quarto da destra, nela seconda xe quel più in baso de tuti.
Questo xe l'altro mio nono. No lo go mai conosù, ma, secondo mio papà, lui rivava a far centro con qualsiasi roba che se ghe dasi in man per tirar, fusi una piera, una fionda, un vecio s'ciopo a piera focaia che i tegniva sconto in sofita per no pagar el porto d'armi. E infati i lo gaveva fato tirator scelto (cechin, in parole povere) e quei pomoli che ghe pica sula divisa, secondo mio papà, iera el segno distintivo (Serlilian xe pregada de confermar o smentir sta roba, perché mi no me ne intendo).
Quel che doveva eser, per lui, un segno de distinzion, un colpo de fortuna insoma, xe sta invece origine de grane per lui. Perché i lo ga meso in un avamposto, solo soleto, a tirarghe ai rusi che cucava fora. Lui però no se la sentiva de tirar, cusì, a sangue fredo, e alora el ga meso un per de mudande bianche sul sc'iopo e el ga disertà. I lo ga meso in camo de concentramento a Vladivostok e el xe tornà a Isola, credo fasendo el giro del mondo (no son sicuro) nel '20. Quando che el ga disertà, i gendarmi xe andai de mia nona per portarla ela e mio papà pena nato, in
campo de concentramento; mia nona se xe mesa a pianzer, mio papà, pena nato, anche, e i li ga lasai a Isola.
Sicome el retro dela foto xe bel de veder e ghe xe un disegno de una nave, meto anche el retro, cusì femo contenta Serlilian
e, se ghe interesa, ghe mando sia el davanti che el dedrio dela foto
(recto e verso xe el termine preciso in lingua italiana) più in grande e senza scrite.