De Beltrame go comprà qualcosa dopo la guera, ma poco, perché i vestiti per noi, tuti mas’ci, mia mama li fazeva far de un sarto, un artigian senza nome, ma no’l iera malvagio. La stofa la compraimo de ani sempre de un sul canton de via Mazini co’ le rive. De solito Zegna, che quela volta iera ai principi. Le scarpe le fazeva mio zio, su misura, co’l xe tornà nel 1946 dopo la prigionia in Chenia. Un poco con lu, un poco con Tarzan go imparà a parlar suaheli. Se no me sbaglio o confondo, Öhler iera in corso, sula sinistra, sul canton de l’ultima casa. El gaveva, se ben me ricordo, do o tre grandi vetrine. Nel 1938, co’ ga comincià le dimostrazioni contro i ebrei, i ne ga mandà fora de scola a far dimostrazion. Mi go visto che un tirava sasi contro le lastre e un comeso zercava de parar, come Striuli, ma senza suceso. No so se Öhler iera ebreo. Me ricordo che se diseva che Öhler regalava sempre un balon ai pici. Se contava alora: Te sa che diferenza che pasa tra l’ospedal e Öhler? In ospedal te va col balon e te vien fora col fio, de Öhler te va col fio e te vien fora col balon.
Chedderidder : clapping_213: