Campagneta

[mandi_]

In altri posti, in altri tempi, ma sempre in campagneta, l'era n bel viver. Anca mi son cresuda così, anca mi zugavo libera e zugavo con le balote de terracotta en strada, en cortil, en campagna.. Sol che no le ciamevo così le s’cinche. Invidiavo i "Ragazzi dellla via Pal". Noi femine zugheven al "mondo" co la baccheta sulla terra ma le nose aventure le fevem anca noi, en campagna. Dopo el papà fischiava e tuti a casa.
Ma quel che me pias ricordar, dopo, l'è l balo della matonela : internazional e romantico, nele cantinote.Ah, che tasto dolente avè tocà...
Mandi

[Ciancele]

Campagneta: Per chi che sta a Trieste xe facile. Se el ga voia el ciapa la gripiza (auto) o la bici e el va là. Pasando de là chi sa quando el ga visto che xe tuto costruì e el ga dito: No i me cuca (vedono) più. Noi, de tanti ani via de casa, gavemo solo el ricordo. Co’ ‘ndavo de una mia cugina che stava in casa dei ferovieri, al crocevia ‘ndavo a sinistra. A destra iera el ricreatorio e i Campi Elisi. Sul canton in baso iera anca la tratoria ai campi elisi, me par. Go visto anca mi le case, ma no son andà tanto vizin. Ma xe tanti, tanti ani fa. Go visto anca che la via S. Giustina xe stada slongada atraverso la via Franca e se ciamava via Lochi. A mi, che son forsi el più vizin de quei che xe fora, me ocori quasi mile chilometri. I altri sta pezo.
Per Son Piccolo Ma Crescerò: Mi son del 1927 e andavo a zogar là fina al 38/39. Me imagino che per Baba Triestina i Campi Elisi de Trieste fusi un viagio. Forsi ghe convien andar ai Campi Elisi francesi (Les Champs Elysées). Li go fati a pie. Per la prima volta nel 1957 (fidanzamento) e dopo nel 1959 (viagio de noze). Coi fioi e can li go fati in auto. Altro sospiron. Basta salute.

[sum culex]

le sc'inche sono le biglie

Anche mi giogavo a s'cinche, ma no iero bravo. Iera diversi gioghicon sti ogetini; per esempio: cola conca, che iera un buseto scavado per tera e altri che no me ricordo.
Ma iera anche i 'bobi' e i aciaini e no solo le s'cinche.
I bobi xè come le s'cinche ma de vetro e i valeva diverse s'cinche a secnda dele dimensioni: ghe ne iera anche de un poco più grandi.
I aciaini xè anche lori come le s'cinche ma de aciaio e i valeva ancora de più. Se tratava dele sferete dele baliniere (cuscinetti a sfere); anche per questi per el valor giogava le dimensioni.
ciao
sum culex

[oli1939]

Anche mi giogavo in campagneta, quela a S.Luigi, soto el boscheto, che la andava fin Sotolongera, de Zimolo, me par. Iero picola, 6 anni forsi, e con la mularia se catapultavimo zò per la collina tra graie e sassi, sconti tra l'erba alta; quante storte de caviglie. Ma iera bel, zà se sentiva l'aria dela libertà, tra primole, bucaneve e violette soto i rovi. Sgrafade, storte ecc. ma ierimo proprio contenti. Mio papà me portava in boscheto, anche con la neve, gavevo la pelicieta de coniglio (un paio dei nostri, povereti) e no sentivo fredo. Lui me ga insegnà ad amar e rispetar la natura. Più tardi el boscheto e i alberi ne ga servì de rifugio dei bombardamenti, ma questa xè un'altra storia.

[babatriestina]

Mi gavevo scoperto la campagneta a casa de una amica dele elementari. Fin che la stava in città, no iera campagnete, massimo Giardin Pubblcio, ma po la se ga trasferido in casa de sua nona, in via Damiano Chiesa alta, a san Giovanni. E co andavo a trovarla fora de casa iera propio campagneta e no iera problemi cussì le mame ne lassava zogar.
No iera campagneta, ma selvadigo istesso un poco, in via Romagna, dove che adesso xe pien de condomini, in nueri 34, 36 o simili, el parco dela Vila Ara butada zo: altri amici mii iera andadi a star nei primi condomini c he i ga costruido, e tegnudo conto che quasi no passava machine, le mamme ne lassava zogar liberi: disdegnada la zona a parco, se divertivimo come mati nela zona a cantier edile, su e zo per i muci de sabbia, per i tubi de cemento, e la scarpada ripida per calarse in legnaia.. con tochi de mattoni e assi de legno ingrumade cussì se gavevim costruido una casetta , la Bimbicasa i la ciamava, solo noi che ierimo pici ghe podevimo entrar, la iera arredada con cuscini e mi gavevo rifornido la "biblioteca" con una parte dela mia collezion de Topolini. Fin che un giorno i ne ga dito che va butado via tuto