Rion del Re e Scala Bonghi

[sum culex]

Rion del Re fa parte de Rozzol. Xè un insieme de casete con giardin diviso in un senso da due vie trasversali: via D'angeli e via Sinico; nel altro senso da Scala Bonghi: una longhissima scalinada, forsi la più longa de Trieste.
El sogeto no xè el massimo per far foto particolari: questo vol esser più che atro un 'servizio' documentario. Per alegerir el tuto go inserido alcune foto de piante e fiori trovade cucando nei giardini o che spuntava fora dale recinzioni.

La scala comincia in via Revoltella con due rampe laterali semicircolari



In mezo l'alabarda, a sinistra l'anno de costruzion, a destra, cancelado, iera l'anno de l'era fascista, come che se usava quela volta.



Ala base, in centro, una testa de leon bastanza rovinada

[sum culex]

Soto la rampa de sinistra se ga seminà un papavero



Alcune rampe

[sum culex]

Nei giardini dele casete, in primavera, fiorissi i glicini

[sum culex]

Oltra una ringhiera cuca un acero giaponese cole foie rosse

[sum culex]

Le prossime tre foto le xè fate sopratuto per un amico

[sum culex]

Inizio febraio: in anticipo fiorissi una grande mimosa, che, stranamente, xè sopravissuda ai inverni passai



La prima via più bassa, via D'Angeli, che se interseca con Scala Bonghi



Eco le classiche casete de Rion de Re

[sum culex]

Inserida tra le casete ghe xè anche qualche vileta precedente ala costruzion de sto rion particolare



Qua abitava, per chi che xè apassionà de balon, el famoso Nereo Rocco



Qua, una volta, iera la trattoria de Jeti, una dele tante tratorie dela zona meta dele passegiate domenicali dei triestini. Ogi le xè tute serade. Questa xè stada l'ultima che xè stada serada e per i sui ultimi ani de vita iera diventà un ristorante bastanza conossudo che se ciamava 'I sete sagi'

[sum culex]

Eco altre del classiche casete

[sum culex]

Drio i platani de via D'Angeli se avanza un nuvolon, de un nero che de più no se pol, presago de piova a stagnachi



Continuelo a salir con un poco de afano

[sum culex]

Finalmente verso la fine dela scala col fià grosso. Spero che aprezerè sta sfadigada anche se le foto no xè el massimo.



L'ultimo toco se dividi in due rampe semicircolari veramente assai ripide

[sum culex]

Cucando nei giardini: jozze de acqua sui aghi de un abete





I fiori de magio

[sum culex]

Un ramo de vida selvadiga se rampiga sul muro de una caseta



Xè forsi el nuvolo de prima che calandose ga fato sto arcobaleno?

[sum culex]

Le canisele che xè a destra e a sinistra dela scala per aceder ale casete interne



In questa i ga salvà un vecio ipocastano



Se voltemo e comincemo a calarse per tornar indrio scendendo per un'infinità de sdcalini

[sum culex]

E per finir i nuvoli che vien zo dala parte de Catinara verso el Rion del Re



Eco ilustrado un altro tochetin dela nostra cità per chi che no lo conossi e per chi, che pur conossendolo, sta lontan e no lo pol più veder se non come ricordo coi oci dela mente.

Ciao
Zoom culex

[macondo]

[Eco ilustrado un altro tochetin dela nostra cità per chi che no lo conossi e per chi, che pur conossendolo, sta lontan e no lo pol più veder se non come ricordo coi oci dela mente.

Bravissimo Zoomy!!!
Una bella zona de Trieste. No me dispiaseria gaver una de quele casette...

[ffdt]

[...]Ala base, in centro, una testa de leon bastanza rovinada[...]

me fa a mi scherzi la memoria o cuel leon el iera una fontanela?

[Golfoblu]

Un'altro toco carateristico dela nostra cità.

Come sempre belisime foto, sempre diferenti de quele conosude.

[sum culex]

Per prima roba ringrazio tuti per i lusinghieri comenti e ringrazio anche tuti quei, che pur senza far comenti, xè andai a guardar o guarderà le mie foto.


Per secondo ghe rispondo a FFDT: sembra proprio che el leon gavessi dovù spudar acqua in quela vascheta tonda che xè soto, ma mi no me ricordo de gaverla mai vista in funzion. Adesso la xè piena de tera e la dentro cresi piante de iris e ultimamente se ga seminà qualcossa che, se no i lo cava prima, diventerà un albero.

Ciao
usm culex

[ffdt]

a dir el vero gnanche mi no go 'l ricordo de acua che cori, ma credo de gaver sempre credudo che fusi una fontantela

pasavo de la` ogni giorno con mia mama per andar a cior el pan de siora vitoria e me fermavo sempre la` de la vascheta per ciapar fia` prima de tornar su per le scale ;-D ... picio iero, ah ... ;-D

e pe' 'l albero ... ben ... go idea che se nisun se lo ciol in te ' suo giardin el diventera` cusi` grando de ribaltar le scale ;-D

ciau

Franco

[Nona Picia]

Se informeremo de una cugina che stava qua prima de noi se una volta el leon iera una fontanela e ve saveremo dir.