Ancora roba che volessi capir meio...
parlemo de queste ipotesi de zone franche come se fossi una roba ancora de far.. ma
i punti franchi in Porto i ghe xe za!
i xe stati recepidi dopo la prima guerra, riconfermai del trattato de pase, confermai de l'accordo de Londra, confermai del trattato de Osimo, e.. difatti per entrar nei Punti franchi ocori gaver permessi.. eco,
perchè visto che i xe za no i pullula de ste attività che ne vien presentade come un glorioso futuro? co se domanda, riva due risposte:
1 iera za, e i porta sempre e solo un esempio: la Lucky Shoes in Portovecio durante el GMA. Quela e basta. Tute le altre ditte che iera ( e xe ancora) in porto Vecio iera carigo e scarigo de bestie vive ( de macello), merci che andava e vegniva ma nissuna trasformazion in zona portual, o no i me ga contado?
2 i me disi che ocori un Regolamento che no i ga mai portado a termine in 60 anni (
e i se inacorzi solo adesso?? )
Secondo:
che vantaggi e svantaggi ghe xe se questi punti franchi xe considerai comunque entro la CE ( perchè l'interpretazion dela lege italiana xe che i xe comunque in territorio italian) o come che sostien quei altri, fora dela CE ? no decido chi che ga ragion, perchè no son esperta in diritto internazional.
Me domando comunque: se i benefici dei Punti Franchi del Porto de Trieste i ghe xe anche se la zona agevolada doganal xe in Italia, perchè i fa tuto sto scandal per farla riconosser extracomunitaria? vantaggi speciali aggiuntivi? altri obiettivi più importanti che el stesso vantaggio doganal? mi ai idealisti che se movi solo che per rispettar una legge de cui per 60 anni qua no se ga inacorto nissun no ghe credo...
Terzo: se i benefici de sti Punti Franchi xe per industrie de trasformazion ( magari estero per estero) :
1 perchè no le pullula de queste industrie?
2 perchè no convegnissi spostarli nele zone indove che le industrie le ghe xe za? ( presempio in zona industrial. cussì cossa so, Pasta Zara podessi lavorar a costi più bassi e vender a dazi agevoladi)?
perchè qualchedun se opponi ferocemente a questo?
Ultima considerazion, i trasporti, la bestia nera de Trieste: mar, rotaia, gomma.
1 Mar: Trieste come porto se go ben capido agiva comprando e vendendo per mar, nel Settecento, quando che i altri trasporti de terra iera più longhi e bigolosi. Xe cambiadi i tempi dei velieri e dele maone, adesso o se metemo a comprar per mar e rivender per mar e alora: come se trasporta le merci? i container va solo che in Porto Novo Molo VII e là ghe xe un sacco de roba de migliorar.. e solo che là ghe xe i famosi fondai de 18 metri per le supercontainer, in porto Vecio i fondai riva max 12 metri e xe previsti solo che per le rinfuse
2 rotaia: gavemo una curiosa situazion a Trieste: due stazioni feroviarie, colegade de una circonvallazion feroviaria merci- e in caso de necessità, passeggeri- al posto del trenin dele Rive, ma pochi colegamenti merci...la Stazion Central xe tacada del Punto Franco Vecio ma no vedo atuali colegamenti, anzi la zona feroviaria i me disi che xe un ottimo santuario per nidificazon de usei.. la Stazion de Campo Marzio xe ormai museo e el colegamento merci no go capido se passa per le vece linee de Rozzol o passa per la circonvallazion e po per la central
3 gomma i TIR no passa per el Punto Franco Vecio, perchè de una parte i saria blocai dela cità ( Rive, Barcola) - ogi tanto qualchedun difatti ghe passa- ve ricordè el TIR ribaltado dela bora in Riva? e quindi la sola roba saria meter tuto in container o meter i TIr stessi su rotaia e portarli cola Circonvalazion feroviaria a Campo Marzio, de dove che xe la Grande Viabilità. A meno che no i riesumi el progetto del Tubon... e po se intasa tuto sula A4..
Correggeme se go dito robe no giuste e provè a risponder ai mii dubbi o diseme se no i ve xe vegnudi anche a voi..