Svizzera: Ginevra

[babatriestina]

ecove qua, in una mattina de s'ciarida, un salto a Ginevra:
scendendo dela stazion, se ariva al Quai du Mont Blanc che co se ga fortuna se vedi drio el Monte Bianco, ma stavolta no iera el caso, iera nuvolado: ecco el albergo Beau Rivage, dove che Sissi xe vegnuda fora per ciapar el battello, e davanti de dove che i la ga pugnalada


e i ghe ga dedicado una statua, che no me entusiasma molto, la xe moderna e recente de un gruppo Amici de Sissi: gavevo el sol in controluce, per cui go fato el possibile, ecola de schena, verso el albergo:

e ecco un particolar dela testa, qualchedun ghe gaveva messo un fior in man, ma me par che xe anca una ragnatela

[babatriestina]

e davanti, un battello più o meno, imagino, come quel che voleva imbarcarse Sissi: i xe ancora a rode e i fa servizio sul lago: ( drio, el Jet d'eau famoso de Ginevra, che i gaveva tentado de copiar de noi a Grignan)



sul lago ghe xe anche qua tanti usei, e xe pien de targhe che spiega i nomi e dove e quando che se li pol veder, questo xe una specie de anaretta, che apprezzerà sonopiccolo, e forsi trovo anche el nome

[babatriestina]

più avanti, in rada, altre anare e cigni

e po uno dei tanti parchi fioridi, questo xe quel delle eaux vives, dove che i ga un roseto famoso che i fa el concorso dela più bella rosa de Ginevra, ecco rose rosse in fior anche in sta stagion

spostandose verso el centro, se ariva verso le zone dei negozi de lusso, dove che no fazzo la spesa mi, le gioiellerie particolarmente apprezzade dei ricchi arabi ( Jahan, Chatila..) che adiritura se secca se ghe se fotografa le vetrine, resta però de fotografar le machine che se vedi, stavolta go becado una cocola Ferrari, anche se cussì gialla no la me entusiasma:

però drio, se vedè, xe fast food orientali, quei per i immigrai che lavora là

[babatriestina]

la parte centrale e più antica della città xe intorno alla cattedral, che xe stada la sede de Calvino e de una specie de repubblica religiosa protestante che se ga unido ala Svizzera vera e propria solo molto tardi, xe case medievali, la casa de Rousseau, la cattedral ga una curiosa facciata neoclassica zontada che ghe somiglia a S Antonio novo, salvo i capitelli corinzi e no ionici

al interno, gotico, xe magnifici capitelli decorai, come che xe nele catedrali romaniche, tuti diferenti un de l'altro

e questi xe i banchi de legno decorai, cussì i xe col sedil tirado su, che iera per i monaci co i doveva star in pie, ma iera una sporgenza per pozarse, dita la misericordia

[babatriestina]

al interno, ghe xe vetrate moderne, ecove una, per far veder la differenza cole antiche: i colori xe più omogenei e un poco zigaloni, de lontan fa la sua bella figura, comunque

poco fora dela cattedral, ghe xe la casa d'arte Christie's, sede de Ginevra, che fa aste favolose, ecco l'insegna, la prossima me par che iera de gioielli

e curioso el nome della piazzetta dove che xe sta casa d'aste, xe evidentemente un antico mestier, come che disemo anche noi "pezo el tacon che el buso"

[sono piccolo ma crescero]

Per le anatre no so cosa che podessi eser (svasso, smergo,..., la xe tropo scura).

Me piasi invece la foto dela Ferrari ... ma solo perché la ga el muso ormai sule striche pedonali. Ah, gnanche la Svizera xe più un paese ordinato!

[babatriestina]

Per le anatre no so cosa che podessi eser (svasso, smergo,..., la xe tropo scura).

l'anara podessi esser, stando ai cartei, un "grèbe huppé" e qua benedimo el nome scientifico , che dovessi esser podiceps cristatus che forsi ne permetti de trovar el nome italian. a ti te dsi qualcossa? a mi no..

[sono piccolo ma crescero]

Sia el nome latin che el nome francese (basta aver un libro con i nomi in tante lingue ) porta al svasso maggiore.

[babatriestina]

Ginevra sto anno:
per cominciar, le panetterie sotto le stazioni, dove che me ciolevo un sfilatin
questa xe a Ginevra appunto
[
iera domenica, sosta in cesa cattolica per la messa, xe una cesa dela fin del Ottocento, solito neogotico francese, no mal. Come se capissi che no xe original medieval? basta vardar i capitei e le decorazioni, più o meno fati tutti col stesso stampo..

Pagado el tributo al cattolicesimo, passemo alla Riforma: Museo della Riforma tacà dela Cattedral con una mostra Una giornata della vita de Calvino

Mah... più per fioi... xe tanti come teatrini dove che un Calvino virtuale riporta frasi e discorsi del Calvino storico. No se pol fotografar.. el resto del museo xe picio, i lo presenta come un dei novi musei tanto ben fatti.. sì xe la storia, un pochi de documenti, un pochi de confronti.. gnente de veramente special per approfondir, anche la libreria no offriva libri assai profondi, me go ciolto un sula storia de Calvino a Ginevra. Interessante iera qualche vetrina dedicada ala storia de Michele Serveto, l'eretico brusato a Ginevra dei calvinisti. I disi che Calvino personalmente voleva salvarlo

[babatriestina]

Dela galleria sotterranea del museo, una serie de wiz sula Riforma, me ga piasso questa:

Trad: Si potrebbe formulare la cosa così: tutto è permesso, a condizione che non faccia piacere
sempre in tema de Riforma, sotto dela cittadella ghe xe un gran parco ottocentesco, con alberi anche più antichi, resti de un precedente giardin botanico, con un muro dedicado alla Riforma e le statue dei principali protagonisti, ovviamente Calvino domina tutti

In effetti la storia de Ginevra xe un poco particolar, la ga appartegnudo per alcuni secoli ai Savoia, po la se ga reso indipendente e i xe molto fieri de mostrar un muro, propio a pochi metri de ste statue, dove che i Savoia ga tentado de riprender la città fazendo una breccia nei muri, ma i xe stai respinti( 1602). Ai tempi de Calvino i se gaveva proclamavado repubblica teocratica calvinista ( gavè visto sotto del Calvino el stemma de Cristo) e i se ga unido alla Svizzera appena nel 1798.
Sempre nel parco, scacchiere e zogo de dama: come che i ga fatto de noi in Giardin Pubblico, solo che de noi i tochi del zogo xe restai serai in cassoni, se i xe mai arivai, mentre lori li tira fora e li dopra

[babatriestina]

sempre in sto parco, un chioschetto che me ga fatto pensar a come che iera el cafè in Giardin Pubblico co iero putela

naturamente, se podeva passegiar sul erba, come dapertutto al nord
tornando nella città alta, ghe xe una loggia antica con cannoni, e per i amanti dei stemmi podè veder sui cannoni un stemma ginevrin

e ve lo mostro in dettaglio

ma sta aquila bicipite xe ginevrina..
(Geneva civitas, 1680 xe scritto)

[babatriestina]

sempre nel cuor della città antica, dove che xe anche nato Rousseau, ghe xe sto palazzotto settecentesco, che adesso ospita una collezion d'arte privata de una famiglia russa

con un bel porton rococò

e una targa...

la casa iera della mamma de Cavour e come chi i scrivi lori
venne spesso a cercare riposo e ispirazione presso questo popolo ginevrino che amò sempre
in pratica, el vegniva qua a riprenderse col ciapava qualche incavolatura politica

[babatriestina]

visita al cortil mezzo gotico e mezzo rinascimental del Municipio

e sosta in brasserie per el pranzo, paté de fegato d'oca con tostini

un salto ala cesa russa, fotografabile solo de fora, con betulle ai lati e interno non particolarmente de valor artistico, a mio modesto parer

[babatriestina]

iera domenica, e de boni calvinisti iera tutti i negozi serai, ma le vetrine del centro commercial gaveva in mostra borsette come queste me par che sia Fendi sui 600 euro ( anche Arte Veneta no scherza come prezzi..)

le gioiellerie ginevrine xe particolarmente ricche de gioielli colorati e vistosi, una volta le iera propio sotto de una banca araba... gioiellieri armeni e libanesi.. Chatila ( come una prof triestina,,) adirittura proibissi de fotografar le sue vetrine, ma stavolta no iera gioielli ma tabelloni con gigantografie dele loro creazioni

anche ste perle nere no xe mal..

16300 euro cussì ala bona xe un poco più de 12mila euro, diria...

[babatriestina]

le fontane ginevrine, anche nella parte antica della città, no ga i colori e le statue de quelle bernesi soprattutto, ma a anche losannesi e zurighesi.
le xe piutosto adornade con sculture moderne, ve metto questa, ala congiunzion dela città antica sulla collina e quela moderna dei grandi magazzini e negozi de lusso, per la vaga somiglianza che ghe trovo con el Cantico dei Cantici de Mascherini che gavemo in Piazza Oberdan

perchè mi son convinta che tutto il mondo è paese..

[AdlerTS]

Andar a Ginevra i primi de settembre, te ga rischiado de trovar l'anarchico anche ti te ga ragion, comunque, che la statua dell'Imperatrice non xe bela come la nostra

[babatriestina]

Andar a Ginevra i primi de settembre, te ga rischiado de trovar l'anarchico anche ti

quel iera l'anno scorso... e iera ottobre...ma ghe xe ancora anarchici cussì? adesso xe attentatori suicidi... devo dir che go avudo l'impression de veder meno arabi e più giapponesi in giro per la Svizzera, soprattutto quela francese.

[Elisa]

GRAZIE BabaTS! Ho percorso la Svizzera sulle tue orme!

Io ero arrivata, quasi mezzo secolo indietro, soltanto fino a Lugano alla Festa della Vendemmia per godere di uno stupendo corteo di carrozze allegoriche eseguite con fiori! (Ogni tanto guardo le foto....., bel ricordo, scattate con la machinetta Agfa Silette!)

[babatriestina]

sempre in tema de Riforma, sotto dela cittadella ghe xe un gran parco ottocentesco, con alberi anche più antichi, resti de un precedente giardin botanico, con un muro dedicado alla Riforma e le statue dei principali protagonisti, ovviamente Calvino domina tutti

aggiungo questa foto, che me ga incuriosido:

cossa ghe fa fra i riformatori un sior vestido alla ungherese?
Bocskay
leggendo la storia de Ungheria, go scoperto che xe stado un principe de Transilvania che proteggeva i protestanti.. ai esperti mitteleuropei maggiori dettagli, per cominciar:
http://it.wikipedia.org/wiki/Istv%C3%A1n_Bocskai