Sorpassi

[Lugara]

Meto qua.
Domanda: ieri sera iero in zità cola machina e me trovavo in via Timeus, sula corsia de destra. Dovendo svoltar zo per via Ginnastica go ralentado, messo la freccia e go cominciado pian pianin (el semaforo iera 'pena diventado verde) a girar a destra. In quela me ga superado a destra un scooter: fortunatamente lo go visto per tempo e go rivado a no fracarlo contro el marciapìe. Ghe go sonado, quel se ga fermado e el voleva aver ragion, el diseva che el codice dela strada ghe permeti de sorpassarme a destra se el devi girar dela stessa parte che giro mi. "Gavessi avudo torto solo se tiravo drito, vate a leger el codice dela strada" el ga agiunto.
Bon, ve domando: se lo gavessi tocado e butado per tera no vedendolo per tempo gavevo torto solo mi?
Quando giravo col scooter comunque no me saria mai neanche lontanamente insognada de sorpassar a destra... mah!

[babatriestina]

Questo caso no savessi, ma te conto mi , parecchi anni fa: son in una via a senso unico e devo entrar nel garage dove che tegnivo la macchina, che xe sula destra: più avanti, xe un incrocio che se pol svoltar a sinistra.
garage ben segnalado, con passo carraio, no iera un picio privato, iera quei garage de una volta sempre verti col gestor dentro.
Meto prima ben la frecia a destra, ralento e giro verso destra, avendome un fià slargado a sinistra prima per poder entrar ben. Come che stago per entrar, sul mia destra se incioda un motociclista che rivava de balin, tuto rabiado!
Come! la me taia la strada!!
Sior, ma la ga visto che mi gavevo messo la frecia a destra de un bel poco? La xe lei che la me sorpassa a destra!!
Sì, ma mi, savendo che dopo xe una svolta a sinistra, gavevo pensado che la voltava a sinistra e che la gaveva messo la frecia sbagliada!!
ben bon, no xe nato gnente, ma che ancora el voleva gaver ragion...

[Lugara]

(cut) Sì, ma mi, savendo che dopo xe una svolta a sinistra, gavevo pensado che la voltava a sinistra e che la gaveva messo la frecia sbagliada!!
...

Questo si che xe rampigarse sui speci!
Ma vara ti che bruta razata de gente che gira...

[AdlerTS]

Nei bisticci tra automobilisti (e motociclisti) non go mai incontrado nissun che diria "scusi, gavevo torto". Anche in palese error tuti fa i galeti

[ffdt]

mi una volta ghe go taiado la strada a un che no gavevo proprio visto e meno mal che andavimo pian tuti do ... sto cua el me se ferma a rente e 'l me dixi che ghe go taiado la strada, mi me son scuxado e lu 'l se ga rabiado ;-D ;-D ;-D ;-D ;-D ;-D ... me sa che certi i xe rabioxi de suo ;-D ;-D ;-D ;-D

[Lugara]

(cut) ... me sa che certi i xe rabioxi de suo ;-D ;-D ;-D ;-D

Me son informada e el tizio iera in torto marzo: el sorpasso a destra xe consentido dal codice dela strada solo nel caso che el mezzo davanti gabi messo la frecia a sinistra e stia efetivamente preparandose a svoltar o a fermarse in quela direzion.
Sicuro che se lo gavessi disgraziatamente butado in tera el iera pronto a dir che iero mi a superarlo in quel momento...
A ogni modo el fazeva el rabioso calmo (el parlava per talian); mi ghe go dito meravigliada: "Ma la sa che no se sorpassa a destra?" e lui: "Capisco, è venerdi sera, lo stress: sei nervosa".
Eco, a quel punto son diventada nervosa!

[sono piccolo ma crescero]

El problema del sorpasso a destra e del voler aver sempre ragion solevà da Lugara (a proposito, tanti auguri), me fa pensar un poco più in grande.

Cosa nasi in testa nostra quando 'ndemo in auto? Se mi incontrassi Lugara davanti a una porta, no passeria mai davanti de ela, anche se no la conosso: "Prego si accomodi, prima lei". Ma se son in machina, invece, cerco se passar per primo, e me sburto pian pian, e mentre mi me sburto, i altri, che davanti a una porta me faria pasar, tapa l'incrocio e me bloca.

Perché diventemo più agressivi? Cosa nasi in testa nostra co se sentemo in auto?

[Lugara]

Grazie dei auguri, Piccolo!

Sula misteriosamente aumentada agresività quando se xe ala guida xe un arcano al quale ghe go pensado spesso dato che a volte me sucedi anche a mi (molto spesso, lo confesso ). Però no rivassi de sicuro a imporme quando so de esser in torto, questo xe matematico per quanto me riguarda.
Divento inveze molto ma molto agressiva quando i altri tenta de soprafarme per toglierme un dirito, e molti vedendo una baba ala guida ghe prova, ste sicuri, anche se de solito con mi la ghe va mal.

A questo proposito ricordo che in un dei film con Fantozzi se lo vedi in ufficio ciapado de mira e disprezado dei tuti i coleghi e i capi come al solito; a un certo punto, finido de lavorar, el se meti al volante dela famosa Bianchina e a quel punto el diventa una specie de Mr Hyde: lo go trovado moooolto realistico!

[Lugara]

(cut) Cosa nasi in testa nostra quando 'ndemo in auto? Se mi incontrassi Lugara davanti a una porta, no passeria mai davanti de ela, anche se no la conosso: "Prego si accomodi, prima lei". (cut)

Te me ga fato vignir in mente un episodio al quale gavevo assistido anni fa e che me gaveva fato rider fin ale lagrime.
La riva dove stago mi la xe piutosto streta e xe sempre dei auti parchegiadi su un lato (anche se no i dovessi); un giorno un auto stava andando in su, la iera sul lato libero, e a un certo punto la se ga incrociado con una guidada de una baba che stava scendendo: sta qua gaveva davanti parchegiado un furgon e la logica diseva che la gavessi dovudo fermarse drio de quel e meterse soto per far passar l'auto in salita. Inveze no. La ga blocado la strada e la insistiva perchè el mato de l'altra auto ghe fazessi spazio (fra l'altro lui el gaveva de far almeno 50 mt in retro...).
El mato no se ga dado per inteso, giustamente, e alora la baba la ga verto el sportel, la se ga messo fora col busto e la ga zigado indignada: "Lei non è affatto cavaliere!". Mi roba che casco per tera del rider!