Limite de velocità

[rofizal]

El ga fato un mato incidente in Costiera, gaverè sentì...Par proprio un miracolo chel se ga salvà!

Son pasado de là poco dopo, anzi son stado un poco in coda.
Stavo andando verso Trieste e... toh... una dele solite code! Dopo un poco se va avanti e, soto la galeria natural, vedo per tera un saco de vetri roti (probabilmente fanalini). Ghe iera un per de machine dela polizia e subito dopo la galeria un camion de pompieri dula destra. Buto l'ocio e me vien un colpo!! El parapeto là del picio belvedere el iera sfondado! No savevo chi fosi, ma go avudo pensieri tristi fin a casa. Pensavo che qualchedun podeva eser svolado zo fino in mar, speravo de no, oviamente. Go scoltado la radio e la tv regione la sera, ma go dovudo spetar la matina dopo per saver la bona notizia che no ghe iera stadi né morti né feriti gravi e che nisun iera svolado zo, probabilmente gaveva rimbalzado verso la strada.

Pilat lo go conosudo de persona, una volta se gavemo trovado anche nel steso tavolo a una festa de carneval o de l'ultimo. Per sbaio el gaveva ribaltà sul tavolo una botiglia de spumante, bagnando un poco la mula che iera con mi. El se ga tanto scusado e dimostrado dispiasudo. Un mulo più che cocolo, serio anche se un poco mato, come del resto tuti i veri triestini. Una volta, co gaveimo meso su una dele prime radio libere de Trieste (Radio Trieste 2000), el xe vignudo, gratis, a far una trasmision, e anche là el ga dimostrado de eser una persona oltre che simpatica, del tuto priva de quela aroganza e presunzion che speso se acompagna ai personagi famosi. Uno de noi insoma.

Per quel che riguarda el trafico in costiera, in setimana el xe bastanza fluido e regolare, mentre el fine setimana cambia. Xe i famosi "guidatori dela domenica" che i va anche a 40-50 km/h dove xe el limite de 80, magari vardandose el panorama o ciacolando con la consorte, quando no i xe là a cercar la marcia o el pedal del freno (ma dove el sarà mai?). Cusì qualchedun se spazientisi e, per fortuna raramente, se buta in sorpasi da suicidio. Proprio pochi giorni fa iera un che superava diverse machine de fila, in curva e oltre la strica continua senza problemi. Per fortuna no ga incontrado altri in senso contrario ma, se sucedeva, qualche inocente ghe podeva lasar le penne.

Per Lorenzo Pilat no sembra proprio che sia stado cusì, i dixi che el iera solo, no in sorpaso (del resto no vedo chi posi superar in galeria). Facile che se posi gaver tratado de un malor o de un colpo de sonno. Questa ultima ipotesi xe più frequente de quel che se credi. Me ricordo una volta che iero ancora mulo e tornaimo da Lignano. Guidava mio nonno (nisun altro in auto gaveva la patente), a un certo punto el se ga acasciado sul volante e l'auto xe andada a sbater - de striscio per fortuna - contro dele auto in sosta. Mi go sempre paura de ste robe, co se xe giovini xe più dificile che le sucedi (ma no impossibili), ma co passa i anni le probabilità aumenta.

[rofizal]

Dimenticavo ancora una roba che me da un fastidio, ma un fastidio...
Xe tanti che dove che xe el limite de 80 i va a 60-65, poi riva quel de 50 e i continua a andar ala stesa velocità! quando non adiritura a velocità superiori!

[ffdt]

[...] i va anche a 40-50 km/h dove xe el limite de 80 [...]

no xe per far barufa, ma "80" xe 'l limite masimo, no cuel minimo
je ne veux pas quereller, mais "80" est le limite supérieure, pas l'inférieur
I don't want to quarrel, but "80" is the upper limit, not the lower

[rofizal]

no xe per far barufa, ma "80" xe 'l limite masimo, no cuel minimo

Ameso che te gabi un auto che superi i 20 km/h , saria curioso de saver i tui pensieri al momento che te devi rivar in un posto entro una certa ora e te se trovi davanti un mato che fa la pasegiata in auto (e perché no a piedi?) in una strada dove no te pol sorpasar.
Dal mio punto de vista, questo vol dir anche no rispetar el prosimo. Se lo stato te concedi de andar fino a 80, vol dir che fino a quela velocità no xe pericolo. Certo che se te ga una machina che no frena, con gome lisse, col motor in tochi, te son imbriago, no te sa guidar.... pol eser pericoloso anche a 30... ma alora xe meio che te staghi a casa o te cioghi l'autobus.

Le strade de grande comunicazion, con tatnto trafico, le xe fate per spostarse, no per far le auto-pasegiate. Mi credo che, salvo problemi particolari tipo un guasto improviso a l'auto, ghe dovesi eser anche dei limiti minimi. Xe speso proprio quei che va esageratamente pian che provoca i incidenti, visto che i obliga tuti i altri a superarli. E poi 'sti "furbeti", come dito, speso xe i primi a no rispetar i limiti, quando questi diventa più bassi (tipo 50 km/h). Quindi i xe tuto meno che un bon esempio de condota de guida. Per mi xe solo un esempio de analfabetismo automobilistico e mancanza de rispeto pei altri.

Pol suceder che anche a mi me capiti de voler andar pian, per una ragion qualsiasi. In quel caso, se go machine de drio, cerco in ogni modo de facilitar el sorpaso (e speso i me ringrazia) o, se el sorpaso no xe proprio posibile, cerco de adeguar la mia velocità, almeno per quel trato, a quela "normale" del 99% dele auto. Dir " mi vado come voio e de ti no me interesa", me par solo un esempio de cativa educazion e mancanza de rispeto per el prosimo. Xe come quei che se meti a far un sorpaso in autostrada a 5 km/h in più de quel che i sta sosprasando. Oserva co sucedi ste robe: de drio in genere xe la coda de gente che i ghe bestemia de tuto. Ste robe i le dovesi insegnar nele scole guide, no solo a postegiar.

Educazion (e sicureza) vol dir anche no taiar la strada, segnalar i cambi de corsia, no star tacai a quel che xe davanti, no farghe rifili, no frenar de colpo perché se ga visto una bela mula (o mulo) o se se ga ricordado de gaver lasado la pentola sul fogo, no fermarse in curva o in un incrocio perché no se sa dove andar, ecc.

L'altro giorno, de sera sula superstrada (dopo Monte Spacado, verso Opicina), vedo in lontananza dele luci de un TIR. El pareva fermo. Gavevo una machina davanti (a debita distanza) e nisun dei due coreva. Co rivemo vizini ne xe vignudo un colpo!! Iera sì, un TIR, me meso de traverso che stava pasando ne l'altra corsia (ghe iera un picio varco) per invertir la marcia!!!
Andando avanti de sto paso no so dove andaremo a finir...

In america i usa i elicoteri per controlar el trafico. Credo che saria utile anche de noi, evitasi tanti incidenti e morti.

Ogi tuti ga la patente, ma tanti no ga idea de cosa vol dir guidar, e sopratuto che la loro cativa condota pol eser causa de enormi danni e lutti. Guidar no xe solo girar el volante, fracar do pedai e mover una leva. Xe gaver in mano un'arma letale, se no se la sa usar.

[ffdt]

OT, parlavimo de Pilat ... comuncue ...
Hors de Sujet, nous étions en train de parler de Pilat ... de toute façon ...
off topic, we were talking about Pilat ... anyway

[...] te devi rivar in un posto entro una certa [...] pasegiata in auto (e perché no a piedi?) [...] Se lo stato te concedi de andar fino a 80 [...] Le strade de grande comunicazion, con tatnto trafico, le xe fate per spostarse, no per far le auto-pasegiate [...] 'sti "furbeti", come dito, speso xe i primi a no rispetar i limiti [...] mancanza de rispeto pei altri [...] adeguar la mia velocità, almeno per quel trato, a quela "normale" del 99% dele auto [...] cativa educazion e mancanza de rispeto per el prosimo [...] Educazion (e sicureza) [...] un'arma letale, se no se la sa usar.

me par che te gabi misiado tropi conceti in t'un solo discorso provo a far un riasunto de come che la vedo mi: 1) sempre, e no solo che c'o se guida, xe lecito star tra i oblighi e i divieti: 2) c'o se xe in sta condizion no ocori gnente altro e, 3) anche se 'l eser gentili verso i altri xe una roba che aprezo 4) la vita me ga insegnado che no la me xe dovuda e che go de guadagnarmela (comuncue no xe dificile: basta gaver un minimo de cuel che se ciama) ... 5) cuel che fa i altri no determina "regole no scrite" perche` se no diventa mafia cuindi 6) ognid'un ga de regolarse a seconda de le pezo condizioni che legalmente se pol trovar ... come dir che se te ga furia vol dir che te gavevi de partir prima, perche` le strade le xe per tuti e no solo per cuei che cori ;-D (nota che mi de mio coresi ... me son ciolto una machina che va pian anca per no ris'ciar perche`, volendo, una porsche de 220 km/h se la trova anche a 1000 euro)

je pense que tu a mélangé trop de concepts en un seul discours j'essaye de faire un résumé de mon point de vue: 1) toujours, et pas seulement lorsque on conduit, on peut rester entre les obligations et les interdictions: 2) quand on est dans cette condition, on n'a pas besoin d'autre chose et, 3) même si être aimable aux autres est quelque chose que j'apprécie 4) la vie m'a enseigné que personne n'est pas obligé de cette façon vers moi et que je dois le mériter (il n'est pas difficile: il suffit d'avoir un minimum de bon sens) ... 5) ce que vient fait par d'autres ne déterminent pas des "règles non écrites", car sinon il devient mafia donc 6) chacun doit se regler sur les pires conditions dans lesquelles on peut légalement se retrouver ... comme à dire que si tu as besoin de te dépêcher cela signifie que tu auriez dû partir plus tôt, parce que les routes sont faites pour tout le monde et pas uniquement pour ceux qui veulent courir vite ;-D (note que j'aurais l'esprit pour courir ... j'ai acheté une voiture lente afin d'éviter ce cas aussi parce que, si on le désire, on peut acheter une porsche de 220 km/h même pour 1000 euros)

I think that you have mixed too many concepts into one speech I try to do a summary of my point of view: 1) always, and not only when we drive, we may stay among the obligations and prohibitions: 2) when we are in this condition we don't need anything else and, 3) even if being kind to others is something that I appreciate 4) life has taught me that nobody owe it to me and that I have to earn it (however it is not difficult: it suffice to just have a minimum of common sense) ... 5) what others do don't determine "unwritten rules" because otherwise it becomes mafia so 6) everyone must to take a line with the worst conditions in which we can be legally found ... it's like to say that you if you hurry this means that you should have to leave earlier, because the roads are made for everyone and not only for those who want run fast ;-D (note that I would be led to run ... I bought a slow car also to avoid this case because, if you wish, you can buy a 220 Km/h porsche even at 1000 euro)

[AdlerTS]

Il mio non vuole essere un inno alla velocità, ma per esempio alcuni tratti dello stradone quasi autostradale tra Sagrado e Ronchi hanno il limite a 50 km/h.
Sarebbe più ragionevole adeguarlo alla situazione di traffico e visibilità.
Adesso non so se questo sia il caso del tratto di strada in questione, però il "limite", da solo, non è un indice di pericolosità in senso assoluto.

questo è un vero discorso "da italiano indisciplinato" e per nulla degno del tradizionale rispetto asburgico delle leggi.
In Austria mi aspetterei che se mettono un limite di velocità, sia per qualche serio motivo.

Continuo qua, perché xe un discorso diverso da quel della morte de Haider. El mio non xe un discorso da "da italiano indisciplinato" (poderia offenderme): stavo disendo che el limite de velocità intelligente xe quel che se adegua, con pannelli luminosi, ad ora, giorno e volume del traffico. Penso che l'esempio più vicin a noi sia sulla Mestre-Venezia.
Un limite pol esser messo per la conformazion della strada, ma anche per la vicinanza con una scuola o l'afflusso da una strada laterale.
Nel momento che la scola xe serada, ga senso mantener el stesso limite ?
Non parlarme a mi del "tradizionale rispetto asburgico delle leggi", che per mi xe regola de vita, ma ragionemo serenamente sul fatto che la segnaletica del limite de velocità, da rispettare nel caso che la sia, non xe un bon indice della pericolosità in senso assoluto del tratto de strada.
Tornando all'esempio dello stradone tra Ronchi e Sagrado, el limite xe messo per la vicinanza delle abitazioni, col rischio che uno attraversi la strada. Va da se però che el numero de persone che cammina lungo questa strada alle 9 de mattina o alle 11 de notte non xe lo stesso. La cosa intelligente saria un limite che se adegui alle effettive condizioni.
Se questo non sucedi, non sarò certo mi a dir de infranger quel limite.

[babatriestina]

Non concordo per gnente sull'interpretazion personal delle leggi gnanca nel caso dei limiti de velocità: se ghe xe un limite de velocità, el xe messo per qualche motivo, e , tranne che per qualche ridicolo cartel che go visto 20 anni fa messo provvisoriamente solo che in Italia in certi lavori in corso a 30 km/h, per mi i limiti de velocità va rispettadi e mi li rispetto co guido.
E se tanti altri li rispettassi, forsi no ghe saria tanti morti sule strade come che xe.
Go letto dei commenti italiani a un'interpretazion "all'italiana" dei limiti, che iera presentada cussì: Dove che xe un cartel col limite de velocità, vol dir che ghe xe un riscio: se te va più svelto e no nassi gnente, no ghe xe problemi, inveze se te va più svelto e te nassi qualcossa, no te pol rugnarme e xe colpa tua, perchè l'amministrazion el limite lo gaveva messo: pezo per ti!
un discorso del genere mi lo ciamo all'italiana, e resto de l'idea che in Austria i dovessi saver come metter i cartei e che no i li metti per motivi futili o validi solo per certe ore del giorno.

Zonto che molti incidenti mortali succedi de notte, quando che appunto i credi che le strade sia più libere e se possi correr a piazer, me riferisso no ai investimenti de pedoni, che de notte gira de meno, ma de macchine che se va schiantar contro muri, pai, etc...

per mi una persona, che , tornando ala una de notte de un nightclub, andando a 142 all'ora ( disi con precision la BBC- no un giornal italian), in un posto dove che xe un limite de 70, ma se vedi divelto un cartel de 50, supera una baba in Volkswagen che disi che el andava troppo svelto, se cappotta e se copa in un incidente stradal, me par che no ghe sia gnente de strano .
E el comento de Rumiz che disi che dopo esser stado una volta in macchina con lui el ga dito mai più ( Guidava come un matto) me conferma nell'idea.

Una volta i dietrologi, a seconda de la loro posizion politica, diseva che iera tuta colpa della CIA , o del KGB.

[rofizal]

Ve fazo un esempio dei limiti a l'italiana.

Sula superstrada, andando verso el Lisert, me par dove xe la confluenza che riva da Fernetti (poso sbaiarme, no fazo mai quela deviazion), i ga meso un ridicolo limite de 60 km/h.

El motivo? La corsia de destra xe un poco rovinada dai TIR, qualche avalamento che pol provocar qualche fastidioso scoson, ma pericolo no credo. Comunque la roba logica saria de riparar la strada no de meter el limite.
Perché el xe RIDICOLO? Perché nisun lo rispeta, anche i TIR va come se nol fosi. La magioranza dei veicoli se limita tra i 90 e i 110-120, e naturalmente nisun sbanda o altro. Una sola volta go visto dei controli dopo la galeria che xe là, se li dovesi far seriamente TUTI dovesi gaver el ritiro dela patente. Se questo no xe ridicolo! Ma chi xe el responsabile de questi limiti asurdi? E chi invexe xe quel che no se preocupa de agiustar le strade?

I limiti de 30 km/h no xe solo de "20 anni fa", ma se li trova in continuazion. Anche le biciclete dovesi eser multade.

Poi ghe xe i limiti sbaiadi. Nel vero senso dela parola. Se rivè dal'ipodromo per andar sula superstrada -- che ancora tale non xe in quel punto -- no trovè cartei de limiti, quindi dovesi eser el limite de 90 km/h. Ma un per de km più avanti se trova quel de 70 km/h che credo sia in vigor za de prima.

Infine i limiti assoluti xe un controsenso, anche se per la tecnologia atuale inevitabili. Infati, se volemo vardar la sicureza, i dovesi dipender almeno:
- dal tipo de machina e dale sue carateristiche (tenuta de strada, ABS, ecc.)
- da l'esperienza del guidator
- dale sue capacità fisiche (che no vien solo diminuide da alcool e droga, ma anche dala stancheza, dalo stato emotivo ,ecc.)
- dal'età de l'auto e dale sue condizioni (usura gomme, pastiglie freni, manutenzion, ecc)

e tante altre robe. I 130 km/h de l'autostrada (o 80-90-100 per camion coriere, ecc.) pol eser più che sicuri per certi e super pericolosi per altri. Cusì per quasiasi velocità (entro certi limiti). Tuti uguali xe un discorso asurdo, che poi se sia costreti a far cusì xe un'altra roba, ma dir che sia giusto ghe ne pasa.

[rofizal]

Xe due le robe più pericolose in autostrada:

1) el mancato rispeto dela distanza de sicureza

2) la mancata segnalazion del cambio de corsia

MAI visto nisun multado per queste ragioni.

Sule strade normali:

1) biciclete che gira senza luci o con luci insuficienti

2) gente che camina lungo le strade extracitadine de sera magari vistide de nero (ghe volesi marciapiedi proteti lungo tute le strade)

3) gente che sorpasa dove no se pol, speso risciando scontri frontali

4) gente che atraversa improvisamente la strada, che ghe sia o meno le striche (ma questo xe abastanza raro, pochi vol suicidarse)

Xe logico che guidando, sopratuto in centri abitati, ghe vol aver cento oci e usar tanta prudenza, ma qualche volta pol no bastar (anche rispetando i limiti).

Qualche picolo modesto consiglio:
1) ralentar dove pol eser persone che atraversa la strada (no solo pasagi pedonali, ma anche ristoranti, locai, ecc.)
2) tignirse discosti dale machine in parchegio (pol eser qualchedun che verzi improvisamente la portiera o qualchedun che vien a pie improvisamente fora dai spazi tra le machine postegiade)
3) tignirse verso el centro strada, o comunque distanti dai margini dela caregiata, dove ghe xe striche pedonali, cusì se ga più tempo de veder se qualchedun le atraversa
4) mantignir sempre le distanze de sicureza
5) evitar de sorpasar dove pol eser pedoni che atraversa o, se se xe costreti a farlo, usar la masima prudenza
6) non distrarse mai nei centri abitati, una minima disatenzion pol eser fatale (se non per voi, per qualchedun altro)

[babatriestina]

Tuto vero, i incidenti in autostrada xe spesso ben diferenti de quei sule strade extraurbane e de quei sule strade cittadine.
Po mi ve consiglio de far una volta la Costiera guardando le targhe sui muri, quele coi mazzi de fiori finti, se andè no troppo svelti, le podè notar, iera anche el fio de una mia amica.... Ghe ne xe anche un per sui pai de Barcola..

e po un discorso, molto più ampio, sula necessità o meno de correr in macchina, sul concetto che in certi ambiti se ga riacquistado el valor dela lentezza ( slow food) e el antico detto triestin:
"Cossa 'cori che ti cori co no'cori che ti cori? no sta corer co no'cori che ti cori!"

(NB gavè provado a far l'autostrada tegnindo el pie leger sul accelerator? se va assai meno svelti, ma gavè confrontado el diverso consumo de benzina? po ognidun ga le proprie priorità..)

[rofizal]

gavè provado a far l'autostrada tegnindo el pie leger sul accelerator? se va assai meno svelti, ma gavè confrontado el diverso consumo de benzina?

Andando a 130, quindi entro i limiti (no go voia de ciapar multe), tegno sempre el pie legero, anzi a trati nemeno premo l'acelerator.
El consumo xe bastanza basso.

[babatriestina]

Andando a 130, quindi entro i limiti (no go voia de ciapar multe), tegno sempre el pie legero, anzi a trati nemeno premo l'acelerator.
El consumo xe bastanza basso.

Te vedi? mi cola mia utilitaria per rivar a 130 dovessi invece fracar el accelerator eccome!

[AdlerTS]

Non concordo per gnente sull'interpretazion personal delle leggi gnanca nel caso dei limiti de velocità: se ghe xe un limite de velocità, el xe messo per qualche motivo, e , tranne che per qualche ridicolo cartel che go visto 20 anni fa messo provvisoriamente solo che in Italia in certi lavori in corso a 30 km/h, per mi i limiti de velocità va rispettadi e mi li rispetto co guido.

Evidentemente non me son spiegado: non go dito che i automobilisti devi esser liberi de interpretar, ma che ghe voleria un cartel elettronico che aggiorni el limite de ora in ora a seconda delle necessità, del traffico, del meteo. Saria costoso, ma tecnicamente possibile.
La morfologia della strada non xe l'unico fattor che determina el limite.

[babatriestina]

Ok, capisso la proposta, ma fin che sto cartel col limite variabile no i lo inventa e no i lo installa, nel fratempo, cossa femo??

tornando ai cartei, per quei de noi che xe più veci, ve ricordè el tratto del Cavalcavia a Barcola? fin che iera el 6 che occupava a sinistra le corsie cole sue sine, iera due corsie e basta, e se doveva andar a cagoia, co i ga cavado el 6 i ga fatto 4 corsie come che xe adesso e i ga messo un limite a 70, che a mi me pareva sensado. Ben bon, la gente se no iera intasado, andava a 90- 100, salvo blocarse al semaforo in uscita e svirgolar al cavalcavia in ingresso, Dopo un poco, per far andar la gente a 70.. i ga messo el limite a 50!! e cussì el xe ancora oggi, e quante volte i xe là i puliotti... e tegnì conto che ghe xe el 6 e la 36 che fa fermate lungo el tragitto.
eco, francamente là de notte, meno che verso el cavalcavia, se podessi andar un fìiadin più svelti, ma diseme voi fra far quel trato a 50 o farlo a 90 o più... quanto se ghe guadagna come tempo? due minuti? xe solo el fastidio mental de no poder fracar el pie sul acelerator e sentir la machina che te rispondi..

[rofizal]

per far andar la gente a 70.. i ga messo el limite a 50!!

Hmmm.. credo che se i te beca a 70 i te fica subita la multa!
che poi no digo che tuti andemo a 50.. ma a proprio riscio e pericolo (de multe).

So per sicuro (conoso chi che ghe xe capitado) che se i te beca a 80 i te cava la patente.

[babatriestina]

per far andar la gente a 70.. i ga messo el limite a 50!!

Hmmm.. credo che se i te beca a 70 i te fica subita la multa!
che poi no digo che tuti andemo a 50.. ma a proprio riscio e pericolo (de multe).

So per sicuro (conoso chi che ghe xe capitado) che se i te beca a 80 i te cava la patente.

sì, però se no me sbaglio xe una diferenza de multa e de trattamento fra andar 10 km de più, 20 de più o oltre..

[rofizal]

I limiti e le sanzioni dovesi eser queste:
ACI Milano
ma dopo ghe xe anche el decreto Bianchi
e ghe podesi eser altre modifiche, per cui, come al solito... in Italia no se capisi niente!
Ogni sito (ACI, polizia di stato, ecc.) dà dele informazioni diverse...

[rofizal]

Questa de Repubblica iera una bela tabela, ma la sarà ancora valida??

[sono piccolo ma crescero]

Mi ve consiglio, poi, de tararve el tachimetro. Basta meterse su un toco de autostrada neta e andar a 120 tra due cartei chilometrici; devi pasar 1/2 minuto. Podè tararlo anche col navigator satellitare, se lo gavè.

Ve consiglio de tararlo perché noi pensemo che el tachimetro sia sempre scarso e ragionemo: "se fin a 136 no i me fa niente, vol dir che posso andar tranquillamente un poco sora i 140". E invece no xe vero, magari el xe giusto e i me sifona. Sula Tipo che gavevo el iera esattissimo, sula Punto, invece, el iera scarso del 10% (el segnava 130 co andavo a 120), sula Yaris el xe giusto un pelin scarso.

[AdlerTS]

Spero de aver capido mal: con la scusa de evitar incidenti e ridur l'inquinamento acustico, ma con el fine vero de incassar ricche sovvenzioni, i parla de portar el limite de velocità in città a 30 km/h !!!
Al di la del "saria mejo" o "saria pezo", me par impossibile da praticar un controllo serio. Quindi a meno de metter un poliziotto ogni 100 metri, me par assolutamente una norma che po' restassi sulla carta. Gnanche i motorini se salveria da un controllo simile