Trieste 1918-1922

[babatriestina]

Trieste 1918-1922 dalla Redenzione al Fascismo
xe un libretto della serie Lotta politica e Resistenza nella Venezia Giulia a cura della Deputazione Regionale per la Storia del Movimento di Liberazione nella Venezia Giulia ( sì, le maiuscole le go copiade come che i le scrivi lori!)
anno 1959.
Autore Claudio Silvestri, prefazione ( molto interessante!) de Carlo Schiffrer.
una descrizion abbastanza precisa de quel che xe nato qua, e soprattutto analizza con lucidità come i gruppi antifascisti se ga diviso fra de lori per perder davanti al fascismo. e anche come che i stessi ceti dirigenti che gaveva sotegnudo l'Austria se ga spostado al novo poter. riporto p 146 , visita del re nel 1921 o 22:"In tutta questa faccenda l'italianità non c'entra. Quando vennero a Trieste Carlo e Zita d'Asburgo dagli stessi balconi degli stessi patrioti sventolavano le stesse grandi bandiere, di cui solo il colore era diverso"
Interessante anche la storia dei diversi personaggi del socialismo triestin, de Pittoni a Puecher.
Ovviamente el libro no xe in commercio, ma se lo trova nelle biblioteche locali o forsi nei negozi de libri de seconda man.
se lo leggi in breve..

[AdlerTS]

in libreria però se trova

DAGLI ASBURGO A MUSSOLINI
Venezia Giulia 1918-1922

de Almerigo Apollonio

http://www.leg.it/editrice/guerre/asburgo_mussolini.htm

[rofizal]

i stessi ceti dirigenti che gaveva sotegnudo l'Austria se ga spostado al novo poter

Me par una vision de comodo dir che chi sostiniva el fascismo iera i ex sostenitori de l'Austria. Iera quasi tuta l'Italia diventada improvisamente fascista. Opositori sai pochi, sopratuto quando i ga preso el poter. In carcere per disidenza ancora meno. Vardite le imagini dele piaze dove tuti inegia al duce.

Disemo che forsi molti se ga iluso che Mussolini podesi risolver i problemi de l'Italia e farla diventar una grande nazion. Sarà stada un'abile propaganda o la soferenza de una guera pasada da poco, ma me par che le robe staghi cusì. Me par anche che nisun nega che molti antifascisti iera prima fascisti convinti. Anche se xe una roba de cui no se parla volentieri. Del resto semo esseri umani e tuti pol sbaiar.

Qua a Trieste ghe xe stada subito una grande lota con la popolazion slovena, te ricordo l'incendio del Balkan (se la memoria no me ingana). Xe i stessi fascisti che inegiava a l'italianità dela cità e combateva le etnie diverse. Daghe una ociada ala "Storia dela rivoluzione fascista" (la gavevo sfogliada tanti anni fa) e te vederà cosa i conta i stessi fascisti dele loro imprese... altro che Austria.

Ma no xe un argomento che me piasi.

[babatriestina]

i stessi ceti dirigenti che gaveva sotegnudo l'Austria se ga spostado al novo poter

Me par una vision de comodo dir che chi sostiniva el fascismo iera i ex sostenitori de l'Austria.

Ma no xe un argomento che me piasi.

no me piasi gnanche mi, ma al de là che me par che ghe iera del vero in questa affermazion, anche se no te pol risultar simpatico ( meio illuderse che i sostenitori del Austria iera tutti onesti, puri, disinteressai, cavallereschi..) se vedi che no solo no te ga letto el libro, ma gnanca ben quel che go scritto: perchè mi parlo dela visita del Re a Trieste, co no iera stada ancora la marcia su Roma, quindi la frase va corretta in " qui che gaveva sostegnudo l'Austria ga sostegnudo 4 anni dopo i Savoia" , visto che el fascismo , pur violento za allora, no iera ancora al poter. E el libro spiega piuttosto come i antifascisti triestini iera divisi fra de lori e no ga savudo trovar un punto comun per opporse.
No so come sia el libro che Adler ne cita, perchè no lo go letto; sul antifascismo de questo, vista la fonte, no go dubbi. E ve relaziono solo de libri che go letto.

[rofizal]

i stessi ceti dirigenti che gaveva sotegnudo l'Austria se ga spostado al novo poter

se vedi che no solo no te ga letto el libro, ma gnanca ben quel che go scritto: perchè mi parlo dela visita del Re a Trieste, co no iera stada ancora la marcia su Roma, quindi la frase va corretta in " qui che gaveva sostegnudo l'Austria ga sostegnudo 4 anni dopo i Savoia"

Gavevo leto tuto el tuo mesagio ma la tua frase pareve gaver el senso de apogio al fascismo. Poi adeso te la ga coreta e va ben.

Son d'acordo con ti. Xe vero. Quei che iera per l'Austria poi ga acetado i Savoia in genere volontariamente. Credo sia stada proprio la mentalità del vecio impero. In quel momento comandava i italiani e ad essi se doveva obedir. Ordine e disciplina, no fascista, ma austroungarica.

[rofizal]

Forsi xe el caso che te lo digo (anche se forsi za te lo sa). Parlo per esperienza personal.

Mio nonno no xe mai stado filo italian, ma al momento che l'Austria ga perso la guera ga acetado el fato compiudo. Ma no per convenienza, solo perché ghe pareva che fosi giusto così. El iera convinto. Come a dir che i sconfiti xe sconfiti punto e basta, ghe vol acetar la realtà e la situazion cambiada. Sogni e ilusioni no fazeva parte dela realtà.

Xe uno stato d'animo che mi, confesso, no go mai capido. Epur iera cusì per tanti se no tuti. Nisun odio o rancore (questo pol andar ben, anche se no xe facile dopo una guera sanguinaria come quela) ma lealtà e colaborazion sincera verso el nemico de prima. Non lo so, mi son per el "volemose tuti ben" ma mi li gavesi sempre visti come invasori.

Credo che diverso sia stado lo stato d'animo dela minoranza slovena (e croata), che invece se ga visto realmente minaciada. Pasada la toleranza austroungarica per culture e tradizioni diverse, rivava i iredentisti italiani che no acetava altre visioni che la propria.

[babatriestina]

NB e no so se occorri che ve spiego chi che iera Carlo Schiffrer.

[serlilian]

Mio nonno no xe mai stado filo italian, ma al momento che l'Austria ga perso la guera ga acetado el fato compiudo. Ma no per convenienza, solo perché ghe pareva che fosi giusto così. El iera convinto. Come a dir che i sconfiti xe sconfiti punto e basta, ghe vol acetar la realtà e la situazion cambiada. Sogni e ilusioni no fazeva parte dela realtà.

Inveze un mio amico me conta che suo nono iera napoletan, el iera vignudo a Trieste, in zerca de lavor, el se gaveva dado de far, fin che el iera diventado comandante del Lloyd Austriaco.
El iera assai contrario ala nova aministrazion, dopo la fin dela guera, forsi perchè el li conosseva za.
E nel '54 xe finì che el nipote se pestava coi inglesi per l'italianità de Trieste e el nono, napoletan, iera iscrito al partito indipendentista del vecio Marchesich.

[macondo]

Gavevo letto un par de anni fá un articolo de Roberto Farinacci, probabilmente el piú 'duro e puro' dei fascisti dela prima ora, su sto argomento. El articolo, se me ricordo ben, del 1923, atacava duramente la borghesia triestina 'giallo nera' che solamente per mantenere i privilegi di classe se gaveva convertido oportunamente al fascismo. Pecá che no lo posso trovar piú

[macondo]

Ma forsi bisognasi ricordarse de Tancredi nel Gatopardo quando el disi che bisogna cambiar perché le robe le resti le stesse
O come disi el popolino: Francia o Spagna, basta che se magna

[babatriestina]

Me dispiasi che un semplice cenno butado en passant e relativo no al fascismo ma alle visite reali prima del avvento del fascismo sia stado ciapado come la roba più interessante, anche perchè se trattava de poco più de una nota de color.
El libro dedica forsi più pagine all'antifascismo che al fascismo, me par che ocorri che ve riassumo i capoversi per dar un'idea del testo:

1-Ottobre 1918 : l'Italia a Trieste: Il comitato di salute pubblica-crisi del movimento liberal-nazionale-i repubblicani- i socialisti triestini e la nuova realtà
2-il sorgere del Fascio: situazione economica-la caduta di Valentino Pittoni- Massimalisti e riformisti. Il fascio di combattimento-Subentra l'amministrazione civile-l'impresa fiumana-L'incendio del Balkan
3- Il Natale di sangue: l'accordo per Fiume- Il Fascio e D'Annunzio
4-La crisi socialista: i comunisti all'attacco-La scissione del movimento operaio-Violenze fasciste
5 Le elezioni politiche del maggio 1921:Il Blocco Nazionale- Le liste dell'opposizione- Affermazione repubblicana- Socialriformisti e comunisti
6 Lo sciopero del novembre: Fascisti "corporativi" e gran capitale- Il fallito attacco ala sede repubblicana- Nuove sanguinose violenze delle squadre d'azione
7 Il Governo e Trieste : il problema dell'autonomia-tre anni di legislazione eccezionale-la questione scolastica- Porto franco e ferrovie- La questione slovena
8 Il fascismo al potere: le elezioni amministrative del gennaio 22- Il Re a Trieste-Appello repubblicano- Delitti fascisti


ecco, mi credo che noi in forum dei socialisti triestini, de Pittoni, de Puecher, tutta gente che gaveva delle precise posizioni ben prima del 1918, dei repubblicani, cioè mazziniani che i Savoia li gaveva come el fumo nei oci, pur essendo filoitaliani, gavemo parlado pochissimo, fazendo spesso tutto un "fascio" italian de regnicoli, irredentisti, mazziniani, liberalnazionali, socialisti...
no go riportado passi, perchè gavessi dovudo riportar mezzo libro...

[macondo]

No volessi che tocassimo argomenti che podessi crear barufe, ma mi me gaveva sempre interesado saver de piú sula nascita del movimento fascista a Trieste. De quel poco che so:
1) che una sede del partito fascista se verzi a Trieste pochi giorni dopo de la sua fondazion a Milan.
2) el arivo a Trieste de la figura carismatica de Francesco Giunta.
3) che Trieste xe uno dei pochi comuni italiani dove i fascisti ocupa i centri de poder el giorno dela marcia su Roma.

Beta, se no te vol che parlemo de sto argomento, me piaseria che te me mandassi un MP.

[rofizal]

Me vinisi voia de risponder, perché saria tante robe de dir. Ma xe argomenti che no me piasi, ormai sepolti e rivangarli no servi a niente per mi. Ghe vol viver in pase tuti asieme. No dimentichemose che Trieste xe sempre stada e xe ancora (sempre più) una cità multietnica. Far acuse contro una parte o l'altra dela popolazion, vista no come singoli individui, ma come interi grupi sociali o etnie, lo trovo stupido (scuseme el termine). Tuti ga fato sbai e tuti ga pagado per i sbai fati.
(finché se scherza va ben)

No voio dir altro, ma per favor no stuzighè.

[babatriestina]

Francamente, mi de sta roba so poco più de quel che go trovado su sto libro, per cui no son in grado de sostegnir una discussion, anche perchè no go abastanza elementi proprio per inquadrarla nela situazion general.
sui punti che te me domandi, e resto in relazion al libro:
1 i riporta effettivamente che in data 3 aprile 1919 se ga fondado a Trieste un Fascio di combattimento, però, se ben capissso, questo fascismo della prima ora xe diverso de quel che ciolerà el poter, tanto che el libro segnala che questo primo fascio xe stado sostegnudo del tenente Piero Jacchia, che al involuzion squadrista e autoritaria del fascismo, non solo lo ga abbandonado, ma xe passado al opposizion e xe morto combattendo coi repubblicani della guerra civil de Spagna
anche el uso del termine partito, el libro precisa che i primi fascisti triestini specificava ( p 47)" i fasci non erano, non volevano, non potevano essere e diventare un partito", ma solo " una temporanea unione di persone giovani ed energiche che si prefiggevano la rinnovazione della patria" ( tutto e gnente..)
2 el libro presenta ( p. 48 ) Giunta che vien spedido a Trieste ( paressi intorno al 1920) dal comitato centrale dei fasci de Milan per evitar de subir el fascino ambiguo de D'Annunzio a Fiume e ciarir le idee sul fascismo ai triestini. Sarà Giunta che organizzerà nel 1920 delle "squadre fasciste di difesa triestina" o per possibili appoggi all'impresa fiumana o per " risponder militarmente [..] a un eventuale colpo di mano dello slavismo e del comunismo insieme confederati contro la stessa Trieste", un tipo de suggerimento che se ga visto diverse volte, far leva sulla paura dei borghesi....
3 el libro se ferma alla marcia su Roma e granche alle sue immediate conseguenze, riporta nella nota all'ultima pagina questo episodio. al 28 ottobre, in via Santi Martiri, se incontra le macchine de Giunta e del gen Sanna: Sanna: "ora vi faccio fucilare tutti" e Giunta : "Faccia pure, Eccellenza.." e po i se ga messo d'accordo che l'esercito resta neutrale, salvo ordini da Roma .


Vedo nel fratempo una nota de Rofizal. Che parla de accuse o stuzigar.
Mi no fazo acuse, no stuzigo nissun ( se no me stuziga qualchedun prima), e me par che nissun finora lo ga fatto. e zerco solo de riponder a domande su un libro che go letto. E de riportar informazioni, non opinioni.
E no dimentichemo che i moderatori xe pronti cola manera fra i denti, al caso...

E come ripeto, per mi in sto libro xe più interessante le informazioni dei antagonisti del fascismo : Puecher e Pittoni messi in accusa dai massimalisti socialisti ( i xe arivai al punto de metter ai voti l'espulsion de Puecher dal partito!), la nascita del partito popolare, o i racconti delle barricate a san Giacomo.

[AdlerTS]

Per curiosità, per le elezioni politiche del 1924, el testo che go citado sora riporta per la provincia de Trieste i seguenti voti:

iscritti 79331 - votanti 48147

Listone fascista 23485
PCdI 7220
Edinost 6302
PRI 4394
PPI 1134
PSI 1045
PSU 898
Democratici 320

[babatriestina]

Per curiosità, per le elezioni politiche del 1924, el testo che go citado sora riporta per la provincia de Trieste i seguenti voti:

iscritti 79331 - votanti 48147

Listone fascista 23485
PCdI 7220
Edinost 6302
PRI 4394
PPI 1134
PSI 1045
PSU 898
Democratici 320

no go elementi per confrontar, perchè el libro citado no ariva al 1924, ma trovo le elezioni del 1921:

Blocco Nazionale 16.295
Comunisti 6.637
Repubblicani 4.473
Socialisti 4.154
Edinost 2.930
Risultato dei eletti: i tre del blocco nazional anderà a Giunta, Suvich e Banelli, e el quarto anderà a un comunista, Bombacci, che successivamente deventerà tristemente famoso come fascista.
El Blocco nazional iera costituido del Partito di ricostruzione nazionale, l'Associazione nazionalista triestina, el fascio de combattimento, el Partito nazionalista riformatore, el partito popolare italiano, el gruppo Filippo Corridoni mazzinian, la Federazione dei legionari fiumani e i rappresentanti dei combattenti dalmatici e mutilati e invalidi di guerra. Nota del libro: unici assenti, fra i partiti specificatamente italiani, i repubblicani di Trieste. Piattaforma programmatica concordada: Difesa nazionale e valorizzazione della Vittoria, restaurazione del lavori e dell'ordine, disciplinatezza della nazione".

[rofizal]

Vedo nel fratempo una nota de Rofizal. Che parla de accuse o stuzigar.
Mi no fazo acuse, no stuzigo nissun ( se no me stuziga qualchedun prima), e me par che nissun finora lo ga fatto. e zerco solo de riponder a domande su un libro che go letto. E de riportar informazioni, non opinioni.

Cerca de capir tra le righe

No me riferivo a ti ma ala frase

la borghesia triestina 'giallo nera' che solamente per mantenere i privilegi di classe se gaveva convertido oportunamente al fascismo

sia pur riferida al Farinacci, ma dita im modo che sembrava eser condivisa da chi scriveva el mesagio.

Gavevo apena scrito qualcosa de personale (roba che no me riesci facile) e trovarme in pratica la famiglia (che credo posi eser considerada a quei tempi apartenente ala borghesia triestina) acusada de fascismo no fa piazer, indipendentemente da quele che posi eser stade le loro idee politiche (mi no iero nato), ma nisun de lori iera militante del partito né ga fato poi parte dela RSI.

Se xe una roba che detesto xe i oposti estremismi, sopratuto quando i xe carichi de odio. Chiaramente apartengo ala parte "italiana" dela cità (anche se considero l'Italia del '18 come paese invasor) ma volesi che ghe sia uno scambio culturale e de amicizia tra tute le culture dela nostra zona, per rispetarse e amarse reciprocamente. Quando me par de risentir i odi del passato... beh no xe roba che me piasi.

[babatriestina]

in libreria però se trova

DAGLI ASBURGO A MUSSOLINI
Venezia Giulia 1918-1922

de Almerigo Apollonio

lo go ciolto e el me par assai interessante e ben documentado.

[ernesto93]

Iera quasi tuta l'Italia diventada improvisamente fascista....
qua a Trieste ghe xe stada subito una grande lota con la popolazion slovena, te ricordo l'incendio del Balkan...

Permetè me de dir una roba che sta pian pianin vignindo fora e che rispondi a una domanda che me iero sempre fatto senza trovàr risposta. La domanda che me fazevo, iera se Mussolini iera vignù de Marte e come mai che i italiani i xe boni de andarghe drio al primo venuto.

E questo perchè fin a pochi ani fa, i contava la storia che Mussolini ga fato la marcia su Roma, che i se domandava come mai el RE no el ghe gaveva mandà contro i Caramba.

Adesso se sa che el RE el ghe gaveva zà promesso l'incarico de Primo Ministro, e che la marcia su Roma iera una paiazada de propaganda. Ma tornemo subito in tema: "grande lota con la popolazion slovena..."

No xe vero che gaveva comincià el fassio, i gaveva comincià zà nel 1915 nei territori occupati, dove che i internava la gente a piacimento e prima de tuto chi che iera slovèn.

No solo, zà nel 1916 e 1917 i ghe cambiava i cognomi de ufficio e i cambiava i toponimi che no ghe sembrava italiani.

Mussolini no se ga inventà niente; nianche le camicie nere che iera i arditi e tuto el armamentario fassista tipo "noi la morte l'abbiam vista con due bombe e in bocca un fior", i teschi e tuto el resto... iera roba dei arditi.

Nianche la "vittoria mutilata" no el se ga inventà, che el primo che gaveva usà sto termine iera stà Sonnino nel 1918 e dopo d'Annunzio.

E nianche la "mistica della romanità" iera farina del suo sacco, che sempre nel 1918, ai primi de novembre, le trupe de Badoglio (comandante della regione nord est) andando verso Postumia, i metteva i monumenti al Console Caio Postumio. Come dir che dove che iera stada Roma 2000 ani prima, iera sicuro Italia.

E sempre in quei stessi giorni, i gaveva provà a rivàr a Lubiana, che no la iera stada ocupada per via che el costituendo esercito del Regno dei Slavi del Sud, el se gaveva schierà.

La conclusiòn xe che Mussolini no se gaveva inventà niente, iera tuta roba che zà esisteva e che una larga parte de la naziòn italiana condivideva za de prima.

Qualchidùn (storici e sociologhi) disi che questo "consenso" (che no saverìa come definìr con dei aggettivi) esisti ancora oggi e che el spiegheria tante robe strane de l'Italia. Ma qua xe meio fermarse per no andàr OT e no tropo oltre el 1918, limite espressamente vietato dal regolamento del forum.

[babatriestina]

in libreria però se trova

DAGLI ASBURGO A MUSSOLINI
Venezia Giulia 1918-1922

de Almerigo Apollonio

lo go ciolto e el me par assai interessante e ben documentado.

lo stago leggendo e son ormai verso la fin, quindi posso farghene un commento.
A mi el me par assai dettagliado e indubbiamente documentado.
El autor no xe un professor de storia, ma el xe andado a sbisigar tutti i archivi, diria ch e ogni paragrafo o quasi ga el rinvio a una busta dei archivi triestini, el fa riferimenti anche altri libri ( Piemontese: il movimento operaio a Trieste, libro che gavevo ereditado de un cugin, gavevo letto una ventina de anni fa e po lo go passado a una biblioteca.). El libro non se riferissi solo che a Trieste, ma anche al Istria, in particolar el metti spesso in parallelo quel che nassi a Trieste con quel che nassi a Pola.
nei primi capitoli xe un per de pagine dedicade a monsignor Faidutti e ai sui seguaci furlani..
ogni tanto el xe specifico e el disi Mi sula base dei archivi son arivado ala conclusion che.. esempio tipico, el incendio del Balkan.
Forsi manca riferimenti a archivi no de qua.. mi ve consiglio de legerlo e po contarne la votra impression, mi go imparado parecchio.
Se volè saver cossa che el conta, legevelo, perchè no posso riassumer tutto e no volessi far scelte che ometti roba importante.
Digo solo certe riflessioni che go fatto:
1 via Madonnina, l'importanza de sta via, che gaveva le Sedi riunite operaie.. ma dove? de là partiva i cortei operai e filobolscevichi, là arivava le repressioni.. una via de collegamento fra san Giacomo e Piazza Garibaldi
2 no fidarse dele parole a orecia: i Arditi? tutti dirà ovvio, xe i fascisti.. vero, ma col stesso nome i comunisti operai ( e iera za el giovine Vittorio Vidali) gaveva organizzado dei Arditi rossi..
3 la riflession che più me vien de far, relativa a quel periodo: noi savemo cossa che xe nato dopo, come che el fascismo xe vegnudo suso e ga ciapado el poter, ma me domando: in quei anni, fra el 18 e el 22, a Trieste e anche in tutta Italia, tegnudo conto anche dele esperienze in altri Paesi europei, se podeva za preveder con sicurezza? o iera ancora incertezza se gavessi vinto ( scrivo per semplificar) i "rossi" o i "neri"? a leger sto libro, el dubbio resta..