Fritaia co'i funghi.

[LELA]

Sta quà xe l'ultima par stasera e stavolta se trata de un "secondo piatto":

FRITAIA CO’I FUNGHI

Ingredienti:
3 eti de funghi porzini (ma i và ben anca misti e, se no xe stagion, va ben anca quei sechi smojadi in aqua - poca);
1 cuciar de parsemolo tazado,
1 spigo de aio, (de strucar e po’ cavar);
5 ovi intieri;
2 nosi de butiro o, mejo, un fià de oio extraverzine de oliva;
60 grami de formajo “Lateria stagionà” gratugiado;
sale e pevere nero pena masinà q.b.

Dopo gaver netado i funghi co' un cortelin e na strazeta umida, laveli (ma nò tropo) e sofrizeli par un atimo in t'una farsora col butiro sfrigolante, buteghe drento el spigo de aio intiero e, co'l xe deventado rosicio lo schizè - magari con un cuciar de legno se la farsora xe del tipo "antiaderente - (mi preferiso far el tuto con l'oio extraverzine de oliva - ma nò tropo savorido, parché se no el ris'cia de coverzer el gusto dei funghi - e a fredo ghe meto drento el spigo de aio) dopo gaver studado el fogo proseguì come gò scrito de sora.
Lasado un fiatìn sfredir l'oio, buteghe drento el parsemolo tazado e i funghi e terminè de portarli a cotura.
I funghi cusì preparai e lasadi rafredar i và zontadi ai ovi intieri sbatudi insema co’l formajo gratugiado e regolado el tuto co'l sal e pevere nero pena masinado.
Po’ se buta tuto in t’una farsora a frizer, come che se fa de solito co le fritaie.

Mi ve consiglio de - inveze che frizerla - ontolar ‘na teja "antiaderente" con l’oio, jutandose con un foio de carta de cusina, meter el tuto in t'el forno, scaldado prima a 180°, fino a quando el sora dela fritaia no’l risulterà ben dorado: fata cusì la xe ‘sai più sana, legera e digeribile e la và mejo anca par i fioi e par i veceti.

Ancora bon apetito!

Ciau, Lela.