POLPETON FRITO

[LELA]

Dopo tanti piati de pese, pasemo par 'na volta ala carne:

POLPETON FRITO

Ingredienti:
1 chilo de polpa de vedel masinada;
120 grami de parsuto crudo pestado;
3 ovi intieri;
un fià de polvare de canela e un fià de polvare de garofano;
farina bianca (fiordefarina);
pangratado
sal e pevere nero ‘pena masinado;
oio extraverzine de oliva de savor delicà par frizer.

In t’una terina pitosto granda, impastè la carne e el parsuto insema ai ovi; salè, profumè co’ la polvare de canela e quela de garofano e misiè tuto con un cuciar de legno fin che no’ xe tuto ben ben impastà.
Po’, co’ le man deghe ‘na forma zilindrica del groseza de un salame, pasèlo in te la farina, po’ in t’el pangratà e po in t’una pirofila che se posi meter sul fogo (digo pirofila parché la devi eser pitosto longa e basa in magnera che se posi voltarlo de quà e de là con fazilità) e frizèlo co’ l’oio.
Tiraèo fora metèlo a sugar sora carta de cusina, afètelo e servilo.
Se pol servirlo –eventualmente - con ‘na salsina de pomi e kren.

SALSA DE POMI E KREN

Ingredienti:
2 eti de marmelada de pomi;
1 eto e ½ de kren gratado;
2 dezilitri de vin bianco seco;
1/2 bicerin de asedo, mejo se de pomi.

In t’una teceta e a fogo baso, soliè la marmelada de pomi insema al vin e lasè che ghe ne evapori ‘na parte, zontè l’asedo e par ultimo el kren, misiè ben ben e la salsa la xe pronta.
Stà salsa la và ben no’ solo par el polpeton che gò riportà quà de sora,ma anca par compagnar altri piati de carne.

Bon apetito!

'Deso vado a magnar qualcosa anca mi, justo par no' perder el vizio, ciau a tuti con simpatia, Lela.
[/b]

[babatriestina]

mi no go mai visto mai gnanca la marmellada de pomi

[Nona Picia]

Mi una volta tanti anni fa, la go fata la marmelata de pomi!

[babatriestina]

mi savevo solo che la codognada, de pomi codogni, bela fissa, che i fazeva co iero picia e che per anni iera in casa i stampi de cotognada: la ghe piaseva tanto a papà.. fin che un giorno, ospite de amici, za de là coi anni, el la ga trovada, el la ga morsigada e.. ghe se ga blocado in mezzo la dentiera!!!

[macondo]

La marmelata de pomi, ma mi la ciameria piutosto puré de pomi in questo caso, xe un condimento tradizional per el arosto de porco qua in Inghiltera. A mi no me piasi ma xe assai facile de farlo. Se cusina i pomi, speladi, a tochetini e senza el cuor, per 15 minuti in un poco de acqua con el succo de 1/2 limon e un poco de suchero. Quando teneri se fa un puré con el frulador e se ghe meti un tochetin de buro. Se servi tiepido.

[babatriestina]

ma alora xe pomi cotti, o se se vol salsa de pomi, più che marmellata!