Comunque sabato son andà a far due pasi in val Rosandra e a un certo punto go visto un cocal che me svolava altisimo sora la testa. "Fotografilo, dai!", me ga dito mia moglie, "che el xe un rapace" Rugnando lo go fotografà e ... le done ga sempre ragion: xe un biancone, "circaetus gallicus" che ga meso su casa in Slovenia proprio taca del confin, dele pati de monte Carso. Ghe xe un grupo che li sta tegnindo, lui e qualche altro, de ocio per studiarli. Se volè saverne de più trovè tuto qua: http://astorefvg.org/index.php?page=progetto-biancone.
Visto che questo sta de casa in Slovenia, demoghe subito el nome in sloven: Kačar. In inglese Short toed eagle (aquila coi diti dei pie curti); i francesi se ciol qualche confidenza de più e il lo ciama Circaète Jean Le Blanc (che voi dir Giovanni il bianco?) In tedesco Schlangenadler: adler ... se qualchedun de sto forum no sa cosa che vol dir, di solito se lo scrivi senza el TS tacà e saria l'aquila
, e schlangen saria i serpenti peché el magna praticanente solo bise. E in spagnol i lo ciama aguila culebrera, che credo che voi dir anche aquila dei serpenti. Se el ve par picio, vista la foto, ve sbagliè, perché el ga 1 metro e 70 de apertura alare, che saria più dei brazi de un omo verti.
Ah sì, me dimenticavo la foto
El perché del nome italian penso che sia evidente vardando la fotografia. Mi altre robe de contarve su de lui no go, ma Zigolo saverà de sicuro più robe.
