ritornei

[vecioinsempià]

domani xè domenica
la festa de la meniga
la meniga va in piaza
la compra la salata
i sbiri la ciapa
la meti in prison
la salta sul leto
la trova un gonfeto
'l gonfeto iera duro
la salta sul muro
'l muro iera roso
la salta sul pozo
'l pozo iera fondo
e la meniga se nega
glù glù glù glù
glù glù glù..............

[babatriestina]

domani xè domenica
la festa de la meniga
la meniga va in piaza
la compra la salata
glù glù glù..............

domani xe domenica
la festa dela senica
la senica stirava
el prete la zigava
salta fora el prete..
.. e qua no me ricordo come che andava avanti mia mama

per ti menica, per mi senica... dificile far la rima con domenica!

[babatriestina]

Din don campanon
tre putele sul balcon
Una fila l'altra 'naspa
una fa i rafioi de pasta
Una prega Sioriddio
che ghe mandi un bon mario
.....
la continua??

[Capuzi garbi]

Din don campanon
tre putele sul balcon
Una fila l'altra 'naspa
una fa i rafioi de pasta
Una prega Sioriddio
che ghe mandi un bon mario
.....
la continua??

Mi la conossevo un pochetin diferente.

...una fila, una raspa,
una fa un putel de pasta.

Una prega San Martin,
che'l ghe mandi un bel bambin,
ben vesti` e ben calza`
come'l fio del podesta`.

[babatriestina]

Din don campanon
tre putele sul balcon
Una fila l'altra 'naspa
una fa i rafioi de pasta
Una prega Sioriddio
che ghe mandi un bon mario
.....
la continua??

Mi la conossevo un pochetin diferente.

...una fila, una raspa,
una fa un putel de pasta.

Una prega San Martin,
che'l ghe mandi un bel bambin,
ben vesti` e ben calza`
come'l fio del podesta`.

fra 'raspa e 'naspa mi credo che sia più logico 'naspa cioè annaspa che in origine voleva dir far su matasse de fil ( e xe logico col fila dela precedente- po nissun fa più sto lavor e annaspar xe deventado un gesto.. in aria!)
anche mi conosevo una fa i fioi de pasta.. ma fioi de pasta no ga senso mentre i rafioi cioè i ravioli se li fa de pasta ecome!
( me sa de veneto el tutto... e no me soprendi , che mama che me la ga insegnada iera istriana veneta de parte de papà)
Po la terza.. una domanda el marì e l'altra iel fio.. doveria andar nel ordine, se spera prima el marì e dopo el fio!

[Nona Picia]

Mi la so cussì:
Domani xe domenica
la festa dell'Angelica
se magna risi-bisi
col cuciarin de argento
che costa cinquecento....

Se la va ancora avanti no so, cussì usavimo cantar noi defioi
ciao ciao

[vecioinsempià]

ciau a tuti,pecà che no poso iutarve,colpi no perdo 'ncora ma memoria comincio a magnarla.mi la savevo cussì:din don campanon
tre putele sul balcon
una cusi una taia
una fa i capei de paia................................................

xè de ieri che ghe masino sora,e gnanche mama che ga 90 no ghe sovien,però no me arendo..........

ah me xè saltada fora un altra 'deso:

chi che da
chi che ciol
va la bisa
soto 'l cuor
no xè fio de maria
no xè fio de gesù
e col mori
el va lagiù.

[Coce]

Noi ghe disevimo cussi ai muli tegnosi:

Chi che da', Chi che ciol

Va la bisa soto el Cuor

Lunedi' el va in Galera

Martedi' el va soto Tera



Ciao Coce

[vecioinsempià]

e qualchidun se ricorda questa?mama o nona ne sfregolava un per un i ditini de la man disendo:
picio picel
el dito de l'anel
el più grando de tuti
sfregola oci
maza pedoci.

l'ultima riga ne fazeva rider come mati.anca se ierimo batui de pedoci che portavimo a casa de l'asilo o de scola.iera i ultimi ani de guera e subito dopo.chi se ricorda del petine fiso e de la PETROLINA?

[babatriestina]

Questa me xe nova, me ricordo però che papà parlava dela "morte del pedocio sul petine fisso"
Ai tempi mii i pedoci no iera più. Ma no mancava i bacoli, in casa, inveze!
de mi se ghe girava el ditin sula man con

Ghirin ghirin gaia
martin sula paia
paia paietta
Pic! una scopoletta!

[vecioinsempià]

ciau babatriestina
te conto el rito per cavarse i pedoci de testa:mama meteva par tera un giornal,ela sentada sula carega e noi sui sui zenoci popoci per aria e testa a pindolon.zinque minuti de petine fiso,petinai contropel con un petine aposito che gaveva i denti quasi tacai,un vizin de l'altro.iera l'unico modo per eliminar i pedoci che restava tacai sui denti.restava el problema de le "GENDINE"(cussì se ciamava i ovi che i pedoci tacava a la radise dei cavei.se le eliminava con una frizion de petrolina,una lozion verdolina che se comprava in drogheria.la iera a base de petrolio e de aromi profumai.
grazie per averme ricordà
ghirin ghirin gaia
martin su la paia
paia paieta
e tac una sc'iafeta.
mi la savevo con 'sta picola variazion.........

[granzo]

Domani xe domenica
la festa de l' Angelica
l'Angelica va a cior acqua
dove xe 'sta acqua
i lupi la ga bevuda
dove xe 'sti lupi
zo per quela strada
dove xe 'sta strada
la neve la ga coverta
dove xe 'sta neve
el sol la ga squaiada
dove xe 'sto sol
a caxa de nostro Signor.

e anche...
domani xe domenica
la festa de l'Angelica
se magna rixi e bixi
co'l cuciarin d'argento

[Nona Picia]

Mi me rcordo del petine fisso assai ben: no gavevo pedoci in testa, ma mama me petinava lo stesso col petine fisso per prudenza, no ve digo che tortura, mi gavevo i cavei rizi rizi! E se gavessi podù scampar lo gavessi fato assaivolentieri.
ciao ciao

[vecioinsempià]

se capiso el tuo struzio de quela volta,eser rizi col bisogno del petine fiso doveva eser una tortura,mi per fortuna iero rizo come el porcospin.noi altri semo de san giovani e come scola ne competeva la attilio grego o la fabio filzi(xè ancora tute do).fato el repulisti in testa col petine fiso ierimo franchi diese quindise giorni e po' iera repete.no iera tempi per i finoti,mama ne lavava in orna do volte per setimana ma la più parte dela gente no gaveva aqua in casa e per bever ,cusinar e lavarse i 'ndava a ciorla in fontana.bon xè meio no pensar ma cussì iera !!!
ciau a tuti i veceti e i vecioti
vecioinsempià

[Nona Picia]

Anche mia mama ne lavava in orna, ma per fortuna l'aacua iera in casa, trane quando, credo in tempo de guera o subito dopo, che i la serava no so perchè e andavimo a ciorla in pozo.
Ciao ciao

[vecioinsempià]

che bel saver che ghe xè ancora altri che ga i stessi ricordi.anche noi gavevimo el pozo cola carucola,a rente del gloriet ,ma i seci che nono tirava suso serviva per bagnar le vanese.e po' che festa de istà col rivava a casa de lavor con l'anguria soto scaio:verso le zinque e meza la calava in tel pozo e dopo zena la iera iazada che te ciapava i denti.el pozo lo ga fato stropar papà a metà dei ani zinquanta perchè el diseva che l'aqua iera zà quela volta inquinada.me piasi pensar a ste robe anche se un poco me se strenzi el cuor.'deso meto un altra che me xè vegnù in amente ieri,me la ricordo che iero 'sai picio,co' nona zogava con mi e la me fazeva meter el pugneto sul suo pugno pozà sula tola,e cussì un sora l'altro,e co' mi no rivavo più parchè iero pisdrul la me diseva:te ga perso!coss'che me fazeva rabiar.......e nona rideva.

pugni pugneti
gali galeti
cossa xè drento
pan e formento
cossa xè fora
pan e zivola.

[babatriestina]

pugni pugneti......
mama mia, quanti anni che no la sentivo!!
me iera restado solo che co un diseva Cosa xe fora ? i rispondeva Pan e zivola!!
( de mi in centro inveze iera sempre aqua corente fin dela fin del Otocento, cussì me contava i mii e nela casa ,che i stava del 1913, ghe son nata e aqua corente no mancava, de quele parti pozzi e fontanele iera za sparidi..)

[Nona Picia]

Mi so una in tedesco, che me la diseva mia nona che iera de Graz:

Auf dem Klavier
steht ein Glass Bier,
wer davon trinkt,
der stinkt!

Ciao ciao

[vecioinsempià]

me fa piazer che go fato vignir fora de qualche canton de la memoria robe che pareva dimenticade.a nona picia no poso vegnirghe incontro perchè noialtri a casa se parlava solo triestin anche se nona se ciamava schmutz e la sua familia se ga impiantà qua vignindo de vizin de klagenfurt,ela saveva tedesco ma noi mussi no gavemo mai imparà.chi sa quante che xè 'ndade perse per sempre de quel altro filon de la nostra cultura che iera el tedesco.pecà propio pecà.........'deso ve conto una che sicuro voi do ve sovien ,come che iera un zogo con la bala che tute le mule fazeva.po' ve contarò anche come xè che la so:
oè senza oè
senza moverse
con un piè
con una man
batendo le mani
avanti e indrio
la rioda
del mulin
fazendo la crose
e un bel inchin.

iera che ale mule ghe fazevimo dispeti,come quando che le se fazeva la casa con una piereta vizin a l'altra e noi spetavimo che le finissi po' de corsa in clapa ghe ribaltavimo tuto.po' per farse perdonar e per no ciapar qualche papin de le mari,fazevimo pase e ghe domandavimo:cosa poso zogar anca mi?no xè che me piasesi 'ssai però ogni tanto lo zogavo.forza mule se xè de coreger qualche picoleza.ciau ciau

[babatriestina]

el zogo consisteva nel tirar la bala in alto e ciorla in man prima che la caschi disendo ( e fazendo) quel che te disi nela filastroca? me par de ricordarme in Giardin Pubblico..
de mi el austriaco iera el zio acquisido, che me vardava sempre de bruto ( cussì me pareva, perchè el iera un gran stuzigon) co recitavo in tedesco -a orecia- la poesia de Nadal, gaverò storpiado tute le desinenze! de antenati austriaci mi no ghe ne go, solo ghe iera la mama de mia bisnona, tedesca, Schwarz! mama la gaveva sentida nominar de sua nona