La Fiera

[Piereto]

Te fa ben ad aver dei dubbi.

[Elisa]

Ripassando il presente tema scorgo qualcosa di suggestivo degno di approvazione: Come sono stati protetti gli alberi da eventuali danni durante il lavoro….

[sono piccolo ma crescero]

Xe da tanto ormai, do anni?, che la Fiera xe stada venduda a un grupo austriaco e che i devi far qualcosa de novo. I lavori doveria ribaltar tuto, la Fiera ma anche la viabilità.

Alora nel marzo 2018 go pensà de ricordar come che iera le robe fin a quel momento.

L'ingreso



co la sua insegna ormai malandada



Di fronte el piazal Degasperi col campo giochi e, ogni tanto, le giostre

[sono piccolo ma crescero]

Sul fianco via Rossetti col senso unico verso el piazal





e de l'altra parte l'incrocio tra via Rossetti e via Revoltella.



e dentro tuto deserto

[sono piccolo ma crescero]

Perché scrivo tuto questo? perché i ga comincià a disfar le robe e tra un per de anni doveria eser tuto diverso.

Una belissima autogrù rossa



ga cominciado a portar via la roba. Co go visto le plafoniere tute ben impilade in pachi regolari





Go pensado "Ciò se vedi che xe i austriaci drio". Altra roba però iera meno in ordine



Se i lavori va avanti e gaverò tempo e voia ogni tanto ve conterò come che va avanti le robe e ala fin, se sarò ancora vivo e co la testa a posto, varderemo come che xe cambià el mondo dela Fiera confrontandolo con le foto de desso.

[babatriestina]

Tuti che pianzi pensando ala Fiera ovio, solo a co i andava a magnar luganighe e bever bira. Chissà cossa che farà sti novi proprietari

[Ciancele]

No go capido: I buta zo la vecia fiera par farla nova o chi sa cosa che i farà? I farà la fiera in altro posto? Sicome che vigniva tanta gente de l’Austria, par quel luganighe e bira iera sempre. Dele fiere me ricordo ancora quela de Padova, che vigniva qualche giorno prima de quela de Trieste, la Smau, quela de Milano. Nel 1953 a Trieste iera legno e cafè. Mi go fato nel 1953 la fiera de Francoforte, padiglione Italia. Vin e cafè, poche altre robe. Un per de volte quela de Hannover, ‘sai importante. A Milano go fato quela dele machine utensili. Ma no se pol confrontar el 1953 col 2019. Xe sesantasie ani de diferenza. Nel fratempo xe vignude nove fiere, a causa dele nove tecniche, e altre xe sparide o xe stade spostade. Le fiere ga una organisazion che costa un mucio de bori, no solo i stand ma anca alberghi. La fiera xe una cità a sé. Se va fora solo a dormir. E no tuti dormi i alberghi de zinque stele. Ghe vol anca albergheti e camere BB. E strade par quei che no dormi a Trieste. No xe cusì semplice. Mi a Hannover fazevo 80 chilometri la matina e 80 la sera. Bagordi solo l’ultima sera. Una sola volta go dormì a Hannover una note. Intun buso che me pareva de eser in guera. Ma o cusì o in giardin. Xe logico che una cità con una fiera importante se pol bater una man sul peto.

[babatriestina]

anni 50 la fiera iera come che te conti ti, anche anni 60. Po se andava in fiera solo che per magnar luganighe e bira de sera. nei anni 70 non me ricordo chi me ga pregado de star a un stand dela Fiera, no ricordo gnanca de cossa, iera solo de star là iera un tavolin con con publicità e basta. Mi legevo i primi volumi dela recherche de Proust. Nissun me domandava gnente e no gavessi savudo risponder. de anni no i fazeva più gnente in Fiera e un austriaco ga comprado la zona ormai abandonada. No so cossa che i farà sti novi propietari.

[sono piccolo ma crescero]

De sicuro par che ghe sarà una modifica dela viabilità, per cui qua

doveria vignir una rotonda. Se vegnerà su per via Rossetti e se 'nderà via per una strada nova dentro la ex fiera. Po' i parla de suermercati e altro, ma ga cambiado tante volte le vosi che ala domanda "cosa i farà" rispondo "Mi no me pronuncio, mi fazo din don".

[sono piccolo ma crescero]

Me ga incuriosì sti sachi bianchi che se sta imuciando



Le machine fotografiche moderne ga zoom sai potenti e usì rivo a leger quel che xe scrito



Amianto: el bon vecio eternit che gaveria dovu durar per sempre e che inveze ga fato durar de meno chi che lo fazeva. E 'deso no se sa più dove meterlo e come tratarlo. So che xe la polvere quela che fa mal e che co'l xe serado in sti sachi no'l doveria dar problemi, però prima che i li porta via e prima sarò contento...