Rozzol

[babatriestina]

ma allora sti comuni censuari, costituidi nel 1819, i xe ancora in funzion a 190 anni de distanza? e adesso a cossa i servi? solo a scopi tavolari?
devo dir che a leger sta roba me vien de pensar che vivo 100 anni indrio...

[1382-1918]

Sì, i xe ancora in funzion, solo a scopi tavolari (ma de conseguenza anche catastali). Per questi scopi i xe però fondamentali per l'identificazion dei beni e per le rendite dei terreni.

Su wiki ghe xe la pagina in tedesco (e qualche altra lingua) per "Katastralgemeinde", ma no i disi niente de più: http://de.wikipedia.org/wiki/Katastralgemeinde

[oli1939]

Prima che i sparissi, visti i lavori della superstrada, volevo meter la foto de sti paracarri: non saveria datarli, ma i sebra vecioti.
In più el fato de esser diversi nello stile me suggerisi ancora de più l'idea dela veciaia.

Felice de esserme sbagliado... no i xe sparidi, li ga restauradi e messi in piedi come soldatini (anche se invertidi ! )


Mi vedo tre de sti veci paracarri scaneladi messi nel contesto dela viletta che i ga apena ristruturà in str.de Rozzol angolo via Bolaffio (la caseta ex Arcigay per dirla tuta). La de fronte iera anche una bela fontana (soto la madonina): i la gà murada, no se sa perchè. Adesso i sta metendo a posto tute ste casette vecie dela via Bolaffio e della via Schiavoni. Se tratta tutto de giovani sposi. Noi dalla nostra terazza vedemo tuto, me par de esser in plancia de una portaconteiner!. La via S.Pasquale me par che i la gà costruida qualche anno dopo el 1960, quando noi semo andai a star de quele parti. Me ricordo che iera un grande cartel con una data de fine lavori entro tre anni circa, ma po i xè andai avanti ale calende greche. Disevimo che i soldi stanziadi intanto produceva interessi in qualche banca. Ma, chissà. Prima stavo in via S.Pasquale - case dei marittimi - po se gavemo calà in via Schiavoni, là del treno, vedi "isola de pase" in mezzo al traffico. Son nata a S.Luigi, ex via dei Porta, e vissuda tra Rozzol alta e Rozzol bassa. Sempre là insomma. Saluti, Oli.

[oli1939]

Ah, sì per el spazio verde soto Catinara mi optassi fermamente per piantar alberi sopratutto querce, che vedo cresser sai ben de quele parti. Abbasso el cemento!

[spaos]

immagine del quadrilatero ancora in costruzione, foto trovata in rete, presumibilmente del 1978

[babatriestina]

Bella, grazie!

[AdlerTS]

I due lati "bassi" xe stadi finidi prima, mentre i ga assegnado i apartamenti dei due lati alti verso el 1980-81. Qundi diria che la foto poderia esser del '77

[spaos]

qualcosa su cattinara (quindi un pò più in su di Rozzol)
spero non dia fastido se scrivo comunque in questa sezione..

[AdlerTS]

su una casa se leggi ancora delle scritte curiose.

Non più, da questa settimana la scritta xe stada cancellada: altro reperto storico del ns. forum

[sum culex]

Se me ricordo ben la no ghe iera nissuna strada o stradina, esisteva solo campagna a pastini. Le uniche strade iera la via marchesetti e la strada de Rozzol.
sum culex

L'unica strada prima asfaldada e po sterada che rivava a Catinara da Rozzol iera la vecia srada de Rozzol, prima che i fazi la via Forlanini. Ogi, purtropo, la xè completamente blocada dove che iera el bosco de roveri dela tenuta de Melara dai riporti dei scavi per la costruzion de case.
Al izio dela stessa 'stradela', co go zercà xe trovarla dala parte de Catinara, xè un mucio de rovi (more de spin) che impedisi completamente l'acesso; xè solo un picio torentel che dovessi esser l'inizio, dala sorgente, del torete 'stette fontane' che se scondi soto tera in galeria al inizio dela via Cumano.
Zinqunta ani fa la go fata con un mio amico, ogi defonto, tantissime volte per andar insieme in gita a pie in Carso: Rpzzol/Catinara/Scala dele vacche/Basovoizza/ecc.
ciao sum culex

[Ciancele]

Una domanda ai rozolesi o rozoliani, insoma a chi che xe de Rozol: Cossa xe adeso Rozol 1 de zento ani fa? Come faria a 'rivar là? Grassie par l'informazion.
PS: Par domandarghe a mio nono dovaria far una seduta spiritistica.

[Nona Picia]

Caro Ciancele, per rivar a Rozzol, te pol ciapar la 11, la 22 e la 25 per la parte alta.....con la machina, xe meio che te spieghi qualchedun altro....che mi te manderia chissà dove.... Con la 11 te rivi al Ferdinandeo, con la 22 e la 25 a Cattinara-Ospedale. Me dimenticavo de dirte che de domenica al posto dela 25 xe la 26/

[Ciancele]

Caro Ciancele, per rivar a Rozzol, te pol ciapar la 11, la 22 e la 25 per la parte alta.....con la machina, xe meio che te spieghi qualchedun altro....che mi te manderia chissà dove....

Nona Picia, grassie par le tue informazioni. Se andarò a Rozzol, me ciolerò una guida par no sbaliar strada. Se no finiso a Bolunz e sensa voler me trovo al rifugio sentà co’ l’otavo davanti.
Adeso domando serio: A mi me interesaria saver cosa che xe ogi S.M.M. Sup. 152, Rozzol 273 e Scorcola 1.
Tuto per ricerche genealogiche.

[AdlerTS]

[mod] me son reso conto de gaver fatto un po' de caos tra Rozzol e Cattinara, quindi le foto del "dazio" le go spostade nel topic giusto https://www.atrieste.eu/Forum3/viewtopic ... 0&start=20 - chiedo scusa ! [mod]

[sono piccolo ma crescero]

In questo post https://www.atrieste.eu/Forum3/viewtopic ... 0&start=35 e in quei che vien dopo se parla de una Madonnina de Rozzol. Sicome mancava una foto completa e ogi ghe semo pasai davanti, penso che posi interessar veder come che xe ogi sta edicoletta.



No la go misurada, ma a naso la me pareva lunga più de 40 cm. E confermo, xe via Veruda 14.

[AdlerTS]

Me pareva che gavessimo parlado da qualche parte, ma non la trovo... me riferisso all'edicola con la Madonna che se vedi in fondo alla foto



per un po' de tempo l'edicola jera svoda, ma da qualche giorno i ga rimesso la statua al suo posto e domenica prossima ore 10.30 ghe xe la benedizion ufficiale !

[Nona Picia]

Anche questa edicola xe a Rozzol

[triestin in monte]

Caro Ciancele, per rivar a Rozzol, te pol ciapar la 11, la 22 e la 25 per la parte alta.....con la machina, xe meio che te spieghi qualchedun altro....che mi te manderia chissà dove....

Nona Picia, grassie par le tue informazioni. Se andarò a Rozzol, me ciolerò una guida par no sbaliar strada. Se no finiso a Bolunz e sensa voler me trovo al rifugio sentà co’ l’otavo davanti.
Adeso domando serio: A mi me interesaria saver cosa che xe ogi S.M.M. Sup. 152, Rozzol 273 e Scorcola 1.
Tuto per ricerche genealogiche.

Provo ad aiutarte anche se dubito te servi ancora:

• Scorcola 1=Piazza tra i Rivi 12

• S.M.M.sup. 152=via dei Caldana, forsi 14 o 16, non rivo ad esser preciso

• Rozzol 273=via del Pollaiuolo, non so el numero (16?), ma xè la penultima casa (per modo de dir, adesso credo sia un rudere da quel che se vedi nelle foto aeree) andando verso via Settefontane sulla sinistra: https://www.google.it/maps/@45.6402458, ... a=!3m1!1e3

Spero de esserte stado d'aiuto

[Ciancele]

Cari amici, bona sera. Go leto i post sule Noghere, ma i xe tuti veci de diversi ani. Vedo però che tanti de voi se stai là e forsi me podè dar qualche informazion (ciamemola) giografica. De giovine andavo a pie al stadio par far le gare e anca le campestri le iera de solito drio el stadio. De l’altra parte ciapavo la strada che portava a Bolunz. No me ricordo de Basoviza, San Giusepe o Dolina (San Dorligo) de picio. De grando, ‘sai grando, andavo in machina e poco poso dir. Le Noghere iera sempre estero, come anca Skofie. A Muia son sta poche volte, ma sempre a pie sula costiera. Forsi una o do volta col famoso vaporeto de Muia. L’osteria ciamada de Hitler la go vista in machina, ma iero za ani via de Trieste. Insoma volevo dir che la zona no la conoso e par questo ve scrivo.
Mia bisnona stava in Santa Maria Madalena Superiore. Forsi che anca mio bisnono stava de quele parti, forsi no. Ma i ga ciapà el permeso de sposarse a Capodistria. Adeso comincio a far congeture. Santa Maria Madalena Superiore dovaria eser Coloncovez o squasi e dipendeva forsi dela parochia de San Giacomo, parchè a San Giacomo go trovà nel registro dela cesa el batesimo de mio nono. SMMS xe ‘sai lontana dele Noghere? Le Noghere xe ‘sai lontane de Muia? Po’l darse che le Noghere le dipendeva de Muia? Se sì, po’l darse che Muia dipendeva de Capodistria?
Ani fa go scrito a gente col cognome de mio bisnono e tuti i me ga risposto. I nomi li go trovai sula guida telefonica. Purtropo con risultato negativo. In che comun xe trova le Noghere? Se le Noghere no xe ‘sai lontane de Skofje, soto che comun xe trova Skofje?
De mia bisnona go trovà un mucio de roba, parfina l’ato de nasita del mio trisnono e quadrisnono. Ma de parte de bisnono no go gnente.
Mio nono xe sta batezà a San Giacomo. Go trovado l’ato de batesimo. Go anca el suo stato de familia. Mia nona, devi eser stada una mula de Rozol, forsi la fia de un colega, parchè el stava a Rozol. Prima el stava a Scorcola. L’informazion sula parochia de S.M.M. S. xe forsi più importante, parchè podaria saver qualcosa su mio bisnono.
Tuto questo interese xe vignù forsi tropo tardi, parchè mio papà me gavaria podesto dar qualche informazion. Ma in familia se parlava poco par no dir gnente de questo.
No xe furia par la risposta, ma grasie in anticipo.

Ciao Triestin in monte, te ringrazio pal tuo post. El mio problema xe che manco de Trieste del 1953 e no so se e quando vegnarò de novo zo. Comunque sempre e solo par qualche giorno. Tute quele vie e strade xe nove par mi. Imaginite che qualche ano fa iero in piaza Venesia e legio via Torino. Me go dito: Via Torino? Mi la conoso come via Pitteri. E cusì xe par tante altre vie. A Sant’Andrea go domandà un mato indove che semo. Via Locchi. Mai sentida. Co’ son ‘ndà via mi iera tuto ancora campagneta. El post che precedi lo go scrito tempo fa e no me ricordo se lo go mandado. Lo copio per farte saver de cosa che se trata. Grazie ancora.

 

[babatriestina]

De una cugina go savudo che anche alcuni bisnoni de parte de mama vegniva dela zona de S Maria Madalena superior,c he anche mi identificassi con Coloncovez.
Fino al Otocento poche parochie ghe iera in cità, prima iera quasi tuto a san Giusto, po i ga zontado prima S Antonio novo, e po le grani cese parochiali otocentesche san Giacomo,s an Giovanni, Roian..
le Noghere xe sula strada per Muia che no xe comun de Trieste ma no so ben dove che xe le confin comunal. Skofje xe ormai oltreconfin, ex zona B adesso Slovenia. Muia xe storicamente Istria, gnente de strano che la dipendessi de Capodistria.
Anche per mi iera lontan e per mi iera tuto "zona industrial"