Go fato un giro

[ffdt]

Cuesta, inveze, sempre su via Rossini, xe la zatera de 'l ristorante "panada" ... me par che sia de 'l panada ... se no xe de cuel xe de 'l bar la` a rente ... co' 'l bel tempo i meti i tavolini e i ombreloni e se ghe pol andar a magnar per de sora ...

[ffdt]

Andemo un pochi de metri piu` avanti e vedemo, a destra, piaza ponteroso ... semo ancora in via Bellini ... ogi no xe giorno de mercato cusi` se pol parchegiar in piaza ... co' xe le tende de le barachete la piaza la xe piu` alegra ...

[ffdt]

E finalmente rivemo in piaza S. Antonio ... la fontana la xe xvoda e la ne da l'ocaxion de veder el fondo de la vasca

[ffdt]

In piaza S. Antonio iera la fiera de i dolci ... robe de la sezion de cuxina ... https://www.atrieste.eu/Forum3/viewtopic.php?t=230 ... ande` pur andar a vardar i dolzi ... dopo pode` tornar cua ... perche`, in efeti, mi cusi` go fato: iero dentro de i dolzi e dopo son andado avanti co' 'l giro.

Sta statua vivente de madona co' 'l fio, che la iera su 'l canton de via Dante con piaza S. Antonio, la go fotografada dopo che son vignu' fora de la vixita de la fiera de i dolzi ... par una maschera piu` tipica de Venezia che no te Trieste ... pero` la stofa che la iera fata la go za vista in vendita a 'l Emporio Istriano ... una strada piu` i la`, in via S. Caterina ... no voio dir che la sia stada ciolta la` ... de sicuro i la vendi anche in altri negozi, pero` xe roba che se trova anche cua de noi, eco ... cuindi gaveria podudo anche eser un triestin ... o una triestina ... va ti a saver ... podevo anche eser mi ... con cuela maschera chi capisi chi che xe ...

[ffdt]

Ecola ciapada de un poco de piu` lontan ... me gaveva fato bel de vederla

[ffdt]

Sta foto cua la xe un pel mosa ... stava vignindo scuro e mi no go ben capido cuanto tempo che go de star fermo prima che la machineta la gabi finido de far la foto.

Con cuela mecanica la roba la xe facile ... basta spetar el scato che fa 'l oturador co' 'l se sera e se sa che la foto la xe fata ... co' sta trapola eletronica, inveze, xe de farse 'l ocio ... e sicome che la gavevo de poco tempo no gavevo ancora 'l ocio alenado.

Alora, me dire` voi, podevo anca sparagnarme de publicar sta foto ... ma cosa vole` che ve digo ... poco xe poco e gnente xe gnente ... mi go pensado che a cuei che i xe lontan podeva anca farghe cusi` piazer de veder via Dante che i gavesi preferido una foto mosa piutosto che gnente ... no iero la` per un concorso fotografico ma per mostrarghe la cita` a chi che no la pol viver ogni giorno

[ffdt]

Eco la cexa de S. Antonio novo ...

[ffdt]

Eco via Ponchielli ... la foto la xe mosa, ma almeno no se capisi gnanca chi che i xe cuei che i pasa per strada e cusi` la privacy la xe salva.

[ffdt]

Cuesta la xe vignuda un poco meio

[ffdt]

Su 'l canton de via Ponchielli con via S. Caterina ghe iera sto cartelon cua ... e ghe iera anche el mato de drio che 'l sonva el sax, ma mi ghe go fato la foto a 'l cartelon, perche` no savevo che ghe fusi sta iniziativa:

[ffdt]

Iera una roba per fioi che a mi me dava de fata de i ricreatori ...

[ffdt]

E intanto me son inacorto che in te la vetrina de Carniel ghe iera un avixo che i sera botega ... "liquidazione per cessazione attivita`" ...

Me ga fato un pel triste perche` cuel negozio el iera la` de prima che mi nasesi e lo go sempre visto ... iera un poco come Orvisi ... una de cuele robe che un el se speta che le resti per sempre perche` el le ga sempre viste la` ... solo che gnente xe per sempre ... trane che i diamanti, come che ne ricorda la De Beers (che pero` i se dimentica de ricordarne che un diamante el xe per sempre solo perche` una volta comprado no se riva mai piu` a rivenderlo ... domande` un poco in giro)

Ben ... i negozi no i xe diamanti e no i xe per sempre ... difati ogni tanto sera un ... e sto giro ghe toca a Carniel.

In t'un primo momento, ve dixevo, me ga fato tristeza ... ma dopo me son dito che no xe colpa mia se 'l sera e che inveze la divinita` la me ga dado l'ocaxion de rivar la` in tempo per fotografarlo e cusi` go fato ...

[ffdt]

Eco altre do foto ... cusi` almeno restera` un ricordo de sto negozio ... che ricordi ... mi de picio che camino su cuel pavimento ... mia sorela de picia ... mia mama de giovine ... eh ... se cualchedun el conosi un modo per xbuxar el tempo per andar avanti e indrio mi gavesi ancora caro che 'l me lo spieghi ...

[ffdt]

Eco ancora una foto de via S.Caterina se vedi ben la tenda, la gente, le caxe, i balonzini scampadi che i xe restadi ingropai tra le luci che i ga za meso per nadal ...

[ffdt]

Un'altra ancora ... par che la sia una copie de la stesa de cua de sora, ma la diversa espoxizion ga dado do rixultati bastanza diversi ... in te la seconda se se varda ben el bordo de 'l teto de la caxa de destra la` de la terza fila de luci de nadal se riva a veder una stela ... la go fotografada mi cuindi xe la mia stela e anche se stago metendo robe "vece" sto aceno no poso no farlo ... spero che me capire` ...

[ffdt]

Ghe xe una libreria su 'l canton de via Ponchielli con via S. Caterina ... Borsatti ... i gaveva in vetrina sti calendari cua ... "piaze de Trieste" ... no xe che ghe stago fazendo publicita` ma i me ricorda tanto le foto che iera in te 'l forum ... cuel forum...

[ffdt]

Bon ... andando oltra e continuando per via Ponchielli ve mostro sto bareto che fora el ga un per de xgabei e sta bota per far de tola ... naturalmente el logo el se ciama bar ponchielli

[ffdt]

Sempre in via Ponchielli, cuesta xe la porta de la cexa de S. Antonio novo ... go de dirve che i ga candele finte la` dentro, cuindi se vole` impizar un cero forsi xe meio se ande` de un'altra parte ... xe anche vero che la luce eletrica no la infumiga i muri, cuindi se vole` impizar un cero e ve senti` intimididi de 'l fato che dopo i ga de restaurar la cexa ande` pur la` (ma a mi me par che la fiamela vera la funzioni meio) ... l'ultima volta che ghe iero la me pareva un pel xvoda ... sara` che la xe una cexa granda, ah ...

[ffdt]

Eco cua ... de la serie "ve mostro cuel che no xe piu`" cua iera el negozio de zogatoli de Orvisi ... iera el piu` grando negozio de zogatoli de Trieste e in te 'l Internet se lo trova ancora citado ... mi go un sai bel ricordo de cuel negozio ... de picio ghe andavo dentro co' i oci spalancadi ... la carta de pachi de Orvisi la iera sempre per S. Nicolo` ... tanto che "el" ricordo de S. Nicolo` per definizion xe, apunto, i pacheti de carta de Orvisi ... no iera un regalo se no gaveva la carta de Orvisi ... insoma ... cuei ricordi de fioi che dopo no i te va piu` via ... un ricordo afetuoxo ... un poco triste ... de cuei ricordi de robe che no xe piu`.

E xe, apunto, per amor che ghe go fato sta foto a sto posto ... che adeso no xe piu` Orvisi. La me xe vignuda con tropa luce ... ma meio no go rivado a far ... chi che ga ricordi capira` isteso ... e me vien de dir "torneme indrio tuto cuantoooooooo"

[babatriestina]

Sempre in via Ponchielli, cuesta xe la porta de la cexa de S. Antonio novo ... go de dirve che i ga candele finte la` dentro, cuindi se vole` impizar un cero forsi xe meio se ande` de un'altra parte ...

te ga vardado in furia, davanti dela statua de S Antonio forsi i do ceri grandi laterai xe elettrici, ma xe un dei pochi posti dove che se pol meter lumini veri. Un altro posto cussì xe oviamente la Madona dela Salute a S Maria Magior. Anca se credo che la sera, co i sera la cesa, i distuda tuto.

Ma se volè una bela candeletta giala, andè ale cese ortodosse, là i ga più de noi catolici l'abitudine de meter candele