Me domando se esisti ancora le vece osterie triestine...
Questi xe i 'parametri' per definir una 'vecia 'osteria'.
Prima de tutto che i vendi (quasi) esclusivamente vin sfuso per el consumo nel local. Posibilmente ghe saria dele botti drio el bancon. El vin se vendi in litri, mezi litri, quarti e otavi. I contenidori de vetro dovessi esser quei tradizionali, specialmente el quarto col manigo e l'otavo nel suo tipico bicer.
No i ga una cusina vera e propria, ma i vendi rebechini tipo polpete, ovi duri, qualche piatin de salumi e persuto ecc.
Le tavole le xe normalmente quadrate. Se le ga una specie de mensoleta per meter i biceri quando se zoga a carte, ancora mejo
El local in se stesso el dovesi esser relativamente vecio...
macondo ha scritto:Me domando se esisti ancora le vece osterie triestine...
Parlo per la zona dele parti mie.
Ghe ne iera diverse: Klun, Jeti, Cante, una sul canton (no so el nome) tra via del'Eremo e via Fra Pace da Vedano. De queste no esisti più nissuna. Jeti iera diventà un ristorante: 'i 7 saggi' , ma anche questo a suo tempo ga serà. Più in su, in starada de Rozzol, iera un'osteria che adesso anche questa xè diventada una spece de ristorante, no xè più la classica osteria: 'La Foresta di Sherwood' (el nome vecio no me ricordo).
Una volta le iera meta de gite (passegiate) domenicali; spesso se se portava drio el magnar el là se cioleva solo el vin pei grandi e le 'passerete' pei fioi.
So che anche dele parti de Guardiella qualcossa xè sparì, là no iera un'osteria ma una 'gostilna'; de altre parti dela cità no saveria dir, ma, se ghe ne xè ancora qualcheduna, le xè proprio rarissime.
ciao
sum culex
Chi se ricorda de quela osteria che iera in via Settefontane, parte alta, oltre via Vergerio, drio de la fiera, andando verso l'Ippdromo sulla sinistra? No se ciamava "ai coscritti", xe solo 1 titolo.
Quela osteria gaveva una tradiziòn, l'osto ghe ofriva un necessaire ai muli che iera de leva e i partiva militàr. Iera savòn de barba, lamette, rasoio e no me ricordo cossa altro. Iera anche de bever gratis.
L'ultimo osto me mostrava 'ste robe, credo nei ultimi anni '80, che nissùn andava più a domandarghe ma lui el tigniva lo stesso. El locàl iera frequentà de mulerìa che recitava in teatro e cantava canzoni triestine bastanza bèn. Iera anche la clapa che gavevimo inventà alcune canzonette de successo, ma non so più stà bon de trovarli.
In giro per el muro iera un mosaico caratteristico, indimenticabile, che el gaveva delle figurette che no me ricordo su sfondo bianco.
El osto iera un mulo, el xe sicùro ancora vivo. El contava che lui gaveva tignù la tradiziòn che el osto de prima el ghe gaveva tramandà e cussi via fin chissà quando. Dopo i ga fato la solita paninoteca del ketch, che mi ghe gavessi dà fogo a tute.
A proposito, savè coss che xe el "circolo della morra" a Udine? Xe un circolo de ricconi e industriài, che i se trovava per zogàr a mora cantada. Uno dei scopi sociali de sto circolo, xe (ancora) de salvàr le vecie osterie popolari, i rivava a comprarle e metter dentro chi che i voleva lori, bastava che i le lasassi come che le iera. Ghe ne xe una proprio tipica in Viale Trieste, che come anda ghe somiglia un poco a quelle che de noi iera tipo el Tirolese, la Gloria e tante altre, che le gaveva el campo de bocce, el cortìl per i fiòi, la saletta per la musica eccetera.
Penso che semo stadi assai mone a no salvarghene nianche una, no ghe voleva ssai. Mi disevo, e contavo anche del Circolo de la Mora ma nissun me scoltàva; tuti pensava che almeno una sarìa restada, inveze....
