el decalogo del commesso triestin

[babatriestina]

Lo go trovado qua
e ve lo ricopio, esisti varianti? che origine el ga? mi credo de averlo leto le prime volte sula Cittadella de Carpinteri e Faraguna
1. No tignimo
2. No esisti
3. No i fa piu'
4. Quel no dopra piu' nissun
5. Ghe volessi ordinar
6. Gnanca che la zerchi
7. Gavevimo, ma xe andado via
8. Mai inteso, forsi sa el paron ma el xe fora negozio in sto momento
9. La provi in Friul, forsi lori
10. La cioghi sto altro, xe la stessa roba

...e dulcis in fundo, ma un poco più sotovose "Uccio, va a veder in magazin se xe ancora quel che zerca 'sto mona !!!"

[serenutis]

la gavevo za leta altre volte ma la xe sempre bela

[Lugara]

la gavevo za leta altre volte ma la xe sempre bela

E vera.
In un negozio me xe capitada questa: un cliente gaveva chiesto un informazion che la comessa no saveva darghe. Alora la mula xe andada nel uficio dela parona, seguida a poca distanza dal cliente. Risposta dela parona (che no saveva che el tizio podeva sentir): "Dighe che el me magni el c**"...!

[sum culex]

E vera.
"Dighe che el me magni el c**"...!

Bon apetito

[sono piccolo ma crescero]

Mi la gavevo letta sulle segnalazioni del Piccolo e conservada perché tri(e)stemente vera.

Lo so, la ga più de 800 pixel, ma se la rimpicciolivo no se legeva niente.

[Nona Picia]

Sacrosanta verità! Per trovar qualcosa de particolare e no tropo caro, bisogna "emigrar" fora cità! I triestini se lamenta sempre, a cominciar dai negozianti e de seguito tuti i altri, ma pensar a far qualcossa per migliorar, nisba! Semo nobili, noi, decaduti, ma sempre "nobili"!

[babatriestina]

1. No tignimo
4. Quel no dopra piu' nissun
7. Gavevimo, ma xe andado via
10. La cioghi sto altro, xe la stessa roba

ricerca, in un negozio, de scatolette Hill's per gatti anziani:
risposte n
1-4-7-10

po xe bel de lunedi: un negozio xe serado tuto el giorno, un xe verto solo de matina, un xe verto solo de dopopranzo... e ricordarse de ognidun!

[babatriestina]

1. No tignimo
2. No esisti
5. Ghe volessi ordinar
6. Gnanca che la zerchi
8. Mai inteso, forsi sa el paron ma el xe fora negozio in sto momento

queste xe, più o meno con varianti, le risposte ala mia ricerca de un libro novo de un'autrice al suo esordio:
1-2-5-6-8.
La 5 a volte xe nela variante : no podemo ordinar...

[babatriestina]

questa xe oggi: fazzo una spesa e pago con carta de credito in una nota libreria del centro, e se vedi che.. go dimenticado sul banco el portafoglio ( insempiada mi, vero!) vado subito dopo in banca e co i me disi un documento, digo Zerto, verzo la borsa e no vedo el portafoglio. Ghe digo la me speti che devo gaverlo lassado alla cassa co pagavo in libreria. Vado in libreria: Gavè trovado el portamonete che go lassado qua? Risposte dele commesse :
Aaahhh, noooo , ma la xe sicura? ma la vardi ben in sua borsa, dove la xe andada dopo?
Quela che me ga vendudo: Aaahh, me dispiasi, propio no so, nooo, no gavemo trovado, la zerchi ben in borsa!!!
ribalto la borsa soto dei loro oci, torno in banca, e po, prima de andar a far denuncia in Questura ( e gavessi ben specificado in che negozio go pozado el portafoglio ala Cassa) ripasso e ghe digo Se per caso trovassi un portafoglio grigio, savè che xe el mio. El terzo commesso me fa Lo gavemo trovado, el xe qua el verzi un cassettin e el iera là!! Ma digo, le do babe, miga che le gavesi fato el sforzo de domandar, zercar o de verzer el cassettin???
Insomma, tutto è bene quel che finisce bene, ma intanto go perso una bona mezora andando su e zo..

[babatriestina]

Dimenticavo un classico, che riguarda riparazioni o oggetti in garanzia, particolarmente valido per oggetti ciolti in negozi che ga serado:

La lo ga ciolto de noi?

[Desert RAT]

Qua in America i servizi xe abbastanza boni, ma quando i manca mi digo i ga bisogno de piu' fame.

[carsolin]

Ghe volessi, ogni tanto, far cambio.

No fazo el commesso, lo fa mio fradel e me ne conta tante, ma tante, che qualche volta un lanciafiame soto al banco ghe volessi.

[Nona Picia]

Bisognassi sempre sentir le due campane prima de giudicar, ma xe più facile dir la nostra da clienti.......

[babatriestina]

in effetti, ghe staria ben anche el decalogo del cliente...

[Nona Picia]

Chissà se el fradel de carsolin ne lo podessi dar......

[macondo]

Me ricordo de una batuda (vera?) che i me gaveva ditto i coleghi, quando de mulo gavevo fatto el comesso per un par de anni:

Cliente: "Volessi tre metri de tela blu, no proprio blu, ma BLU!"
Comesso: "Siora mia, perché no la va a dar via el c**, no proprio el c**, ma el C**!!!"