Oggi sul Piccolo xe un articolo de un'indagine su una sessantina de case de riposo, i parla de 3000 persone, no so se nelle 60 o in general, e i descrivi quel che anche mi go visto, andando a visitar qualche vecio solo.
Ve xe capitado de andar a trovar qualchedun in casa de riposo?
ben, mi me ga ssai ratristado.
Al de là de esser andai via de casa, regalado i mobili, abandonado el gato... per cominciar le case xe serade a ciave. te vol uscir? forsi.. i disi che pochissimi va fora de soli, e no i xe tuti non autosuficienti. Telefono? forsi el ghe xe, ma i ospiti no pol telefonar o far telefonade, no so come che xe adesso coi telefonini, ma mia povera mama che iera a casa no la ga mai podudo far una ciacolada cole sue amiche in casa de riposo. Television acesa tuto el giorno, e i veci sentai là sul canapè, ogni tanto passa un col Alzheimer.. nissun ghe bada.
Pannolon per tuti, che ocori o no, che xe più pratico.
Giornai no go visto. Biblioteca gnanca.
I disi che i ghe dà sedativi, che i li blocca in leto ( capisso, mama se alzava de notte e cascava, ma no sarà tuti cussì) e spesso roba per ligarli.
Detto fra noi, go visto istesso in ospedal co ghe iera mama: co i protestava, zac una siringa e i stava tuti boni, pecà che a forza de star ferma e cola camiseta de ospedal verta de drio la se ga ciapado un decubito che la ga portada in un pochi de mesi al altro mondo.
In zerte case de riposo no xe permesso gnanca avicinarse ala finestra, che no i se butti zo, come che ga fato la nona de una mia amica e ogni tanto se legi, a volte me vien de dir che no i ga tuti i torti.
Insomma, me par che i trata meo i mati che i veci.
E daltronde la famiglie che lavora ga dificoltà a assister in casa i propri veci. Ma xe propio triste. Ve dirò che co legio Anziano muore in casa nel suo letto - trovato dopo un paio di giorni- mi digo che el xe stado fortunado a morir a casa propria.
PS: esisti ancora el tribunal del malato?
