El novo piano del trafico

[sum culex]

Tuti a pie su e zo per i colli.

Mi abitavo fin al '56 nela ultima trasversal (via Ressman) tra via Michelangelo e via Chiadino. Andavo a scola al Oberdan e per andar a scola me fazevo a pie la via Chiadino, la via Pascoli, Piazza Garibaldi, la via del Bosco, la scala Sthandal, e la via Veronese; idem al ritorno e questo ogni giorno col peso dela borsa: libri quaderni, ecc. I giorni che gavevimo ginastica de dopopranzo fazevo quel percorso 4 volte (due per andar e due per tornar casa).
De più picio andavo in ala scola elementar Giotto e ale medie al Dante: percorso a pie via Michelangelo, via Rossetti, viale XX Settembre e via Palladio; per el Dante proseguivo per via Palestrina, foro Ulpiano e zo fin quasi in piazza Oberdan, andata e ritorno. El giorno che iera ginastica de dopopranzo gavevo la palestra in via Candler e dovevo percorer a pie un altro bel trato de strada.
Ogi no se usa più: o bus o machina che quela volta no iera nè l'un nè l'altra: un bon esercizio fisico che fazeva ben al salute!
Ala mia età pgi no ghe la faria più.
ciao
sum culex
P.S.: scuseme sto intervento, ma col programa de pedonalizzazion volevo evidenziar le diferenze.

[Piereto]

Trieste che xe una cità collinare, se ga svilupado ocupando sia i fondo valle che le colline, e per no dover far giri longhi, tra una valle e l'altra, xe vignù logico sbusar i colli e far le galerie. Questo fin che xe esistida una volontà e un potere locale nel far le robe, e non avendo più nisun ne la stanza dei botoni, ga comincià a farse strada el no se pol. Si Sum Culex gà ragion : una volta se caminava sai depiù ,ma ghe iera anche più tempo per far le robe. Se penso al fradel de mia nona che el lavorava al San Roco e el stava a Trieste, el ga dovesto durante la guera andar a lavorar a Monfalcon in cantier, e più de una volta el xe andà a pie perchè no iera schei. El se alzava a le 4 e el tornava a casa de sera. . Altri tempi e altri omini.

[babatriestina]

L'inaugurazion de la galeria de piaza foragi o de Montebello me par che xe stada nel 1944. La iera nata come cunicolo antiaereo e po i la gà slargada e la xe longa 720 metri.

l'inaugurazion xe del 1947, e prima i la doprava come galleria antiaerea, per questo domandavo :
1 in che anno i l ga cominciada?
2 subito col intenzion de far la galeria o quando i ga deciso de trasformarla?

( per andar a pie... la sorela più vecia de mia nona, zia Luisa, verso i 95 anni- la xe morta a 100- la andava ogni giorno a pie su e zo de via Cereria, dove che la abitava, in via Giulia dove che stava sua sorela che iera imobilizzada a casa in poltrona)

[sono piccolo ma crescero]

Qualche notizia in più se la trova su un forum su Trieste, atrieste.eu me par che el se ciami , dove che se parla dele galerie in ocasion dei bombardamenti

https://www.atrieste.eu/Forum3/viewtopic ... 57&start=3

Più o meno la stesa roba se la trova sempre sul steso sito qua https://www.atrieste.eu/FotoMacondo/sotterranei.pdf publicada da Macondo...

[Piereto]

Legio che nel 1944 la galeria de montebello iera za verta e no certo un cunicolo. Un altra galeria sai utile xe quela de chiarbola del 1953 fata dal GMA sulla ex camionale. Quindi le gallerie gà avudo la funzion de allegerir el trafico per non imbotigliar le vie centrali . Quel che inveze no se gà rivà a far xe una circonvallazion collinare che per altro la iera prevista nel piano regolatore del GMA del 1952 come el collegamento Strada del Friuli- Universita ogi Via Aquileia da una parte e via Cantu dall'altra e che gavesi dovesto intersecar a mezo monte via commerciale.( utile anche per el svilupo edilizio che per altro xe avenudo in stli far west ). Altra bona idea iera anche quela cominciada con Via Angeli e che a mezo monte saria sbocada po in via Farneto.

[Nona Picia]

Quela de via D'Angeli però se ga fermà al'incrocio con via del'Eremo....

[sum culex]

Sta circovalazion, se me ricordo ben quel che me contava mio papà, doveva cominciar dala fin de via Cumano per girar in via D'Angeli. De quà traversada la via del Eremo andar fin ala via Delmestri e proseguir oltre San Luigi dove che finissi la via Michelangelo, zo per el boscheto per colegarse ala vai Cantù e pò scender verso Roian. Dopo che i do, tre tochetini xè stai fati xè scopiada la guera e no xè sta fato mai più gnente.
ciao
sum culex

[triestin in monte]

Ricordo de gaver visto una mappa, penso in una mostra, con la strada progettada che passava in mezzo alle campagne de Roian se non sbaglio. Probabilmente un primo tratto Fabio Severo-Commerciale già se vedi (tratteggiado) in una mappa del 1928 allegada al libro "Il Duce a Trieste". In questo caso al posto della via Cantù iera in progetto una strada più bassa che doveva passar sull'ultimo tratto de vicolo Castagneto, poi via Monte Grappa e ricollegarse con la via Romagna dall'altezza di via Montello e proseguir fino via Commerciale con un tracciato ovviamente più largo e lineare. Un'altra strada "monca" che non go mai capì esattamente dove doveva andar a finir xè la via Felluga, ma credo non c'entri niente.

[babatriestina]

Due giugno, giorno de festa, via Mazzini verso l'ora del tramonto.


le famose maxi stricche nove



pochi pedoni, ma gnanca traffico per via Imbriani. Tuti in giro fora per el ponte?

[babatriestina]

la via verso el mar, el rosa del tramonto


con le fioriere in primo pian, par assai bel

[Nona Picia]

ogi te fazo concorenza...

[Piereto]

Chi sa se a qualchidun ghe xe vignù in mente de pensar che forsi far mezo borgo teresian fin el canal pedonalizà , o quasi tuto anche oltre el canal sia come svodar Trieste. Mi da le foto dei forumisti me par tuto un mortorio, de una calma piatta. Dove xe la gente che caminava per i marciapie che i spetava i bus, che i andava su e zo per via mazini per via roma No sarà che forsi i dozentomila triestini i vivi tuti in te le periferie e i se luma in centro solo co fa scuro ?. Forsi i gira in altre vie.

[babatriestina]

credo proprio che gran parte dei dozentomila che te disi staghi nele periferie.. va a farla spesa nei centri comerciali o in Jugo.. e se cala in centro la sera per impignir i bar e ristoranti che spunta come funghi nele vie pedonalizade. O i lavora de giorno e no i ga tempo per far shoping in Borgo teresiano..

[Nona Picia]

Certo che el percorso slongado ghe costa un bel poco de soldi...finirà che i diminuirà ancora le corse e aumenterà biglieti e tessere.

[babatriestina]

scuse per aumentar i trova sempre e comunque

[sum culex]

Per mi iera meio el progeto original del mio cugin acquisido ing. Camus. Se me ricordo ben: pedonalizar el Corso e lasar la via Mazzini a dopio senso solo per per i autobus, taxi e i mezzi de socorso.
Per conto mio (no me ricordo el progeto original) per i auti le vie Torrebianca, Valdirivo e Milano. E dopo saria de sistemar le vie Battisti e San Francesco a senso unico in su e in zo. E tantissime altre robe per el Borgo Teresian, per cui iera stado fato un studio aprodondì, ma i ga cambià tuto stravolgendo completamente e pegiorando tuti i studi che iera stai fati.
ciao
sum culex

[Piereto]

Certo xe più logico far el corso pedonalizà, visto che el xe vizin a cita vecia o a quel che ghe resta de ela, e anche in ragion del silos soto san giusto un parchegio per le machine de chi che va in centro. Giustamente via mazini per i soli bus. Me par de ricordar che via torebianca iera per i auti che andava in su evitando el corso e sbocando in via carduci e po se gavesi imbocà via san francesco in su al contrario de ogi. Inveze volendo far quasi tuto el teresiano zona-pedonale, xe evidente che per le strade che ghe gira intorno bisogna crear zone de parchegio, altrimenti nisun vien in teresiano a far la spesa. Ma forse me ripeto : me par una esagerazion el teresian pedonalizà in raporto al numero de abitanti che gavemo adeso. Grande area pedonale va ben se fusimo in trecentomila e alora venisi bon anche el novo quartier de porto vecio.

[babatriestina]

mi propio ieri che passavo in Corso no rivo a imaginarlo pedonalizzado: el xe tropo largo, de solito se pedonalizza strade strente... via Mazzini xe larga metà del corso. Tuti a pie in Corso altroc he le svodo che i disi adesso in via mazzini.. e po resta el problema del contorno dle Borgo teresiano, el Ring come che i lo ciama per schizar de ocio a Vienna, che ga un centro quasi tutto pedonal e un largo Rong in giro percorso a tutta velocità de tram ( ocio!! che no i se ferma..), de tre 4 corsie de macchine e de larghi marciapie sui bordi dei quali scorri piste ciclabili con ciclisti che no ga assai riguardo per i pedoni... ma de noi el Corso xe apunto una dele trade periferiche che sera el Borgo teresian, insieme cole Rive e via Carducci ( e el asse de via Ghega verso la stazion. Serar el corso volessi dir per el traffico privato ( i bus se volè rimettei pur in via Mazzini...) che per andar dele Rive a piazza Goldoni , no podendo andar suso per via Milano che buta in via Carducci a senso unico, de dovessi passar oltre el colle de san Giusto ...voi rivè a imaginar el idea de incanalar el traffico atual del Corso su per via Felice Venezian? e dopo? via san Michele? via Santi Martiri? via Belpoggio? per andar in qualche modo a confluir tuti su Galeria Sandrinelli per rivar in Piazza Goldoni??? o zo per via del Bosco? a mi me paressi apocalittico.. a meno de una roba folle: riaverzer i do tratti laterali dei Galleria Sandrinelli , averzerli al traffico slargandoli e ... no so cossa propor al incrocio central: una rotonda? un semaforo mi imagino che saria una follia per el inquinamento del aria dentro.. e costassi una follia.. perchè el problema del posto del Corso xe che serado quel riva le colline...

[Piereto]

No iera meio lasar le robe che xe andade ben o mal per tanti ani, visto che el numero de abitanti xe sempre in calo e i auti e i motorini xe sempre quei ? Cambiar per darghe de lavorar a qualche amicheto ?

[babatriestina]

adesso par che i pensa a modifiche..
te disi che xe meo el "se ga sempre fato cussì"?
mi comincio a pensar al slogan " Trieste no xe per auti" che mi za una trentina de anni fa gavevo sintetizado "semo come fasoi in pignata" tropi che se urta come rider.. adesso po no go capido che ogni giorno o quasi xe un per de lori che se capota in strada ( no nel Borgo teresian)