Canal navigabile

ffdt · Messaggio da **ffdt** » dom 29 gen 2006, 2:50

Finalmente rivo a meter un poche de foto che go fato ani indrio, in te 'l 1988, perche` le grue che iera la` quela volta le me gaveva un certo fascino ... robe grande ma lasade la` a diventar ruzini ... me dava proprio de monumenti a l'inutilita`.

Con tuta la fadiga che devi gaver costado de costruir sti mostri el lasarli andar in gnente proprio no me piaxeva. E cusi` ghe go fato un poche de foto. El logo el xe la riva Giovanni e Sebastiano Caboto ... un de i do bordi de 'l canal, apunto.

Dopo gaverle fate le go lasade la` per ani anorum fin che a un certo punto (iera i primi de 'l 2005) no me son 'corto che le grue no le iera piu` e cusi` me xe vignuda quela de pasar le foto in te 'l scaner e publicarle. Xe foto che gavevo za meso su TriesteMia e che volevo meter za de bel principio anche cua ... le meto solo adeso perche` apena adeso go trovado in te la cache de Google i testi ;-D ... le foto le go sempre mi, ma i testi no me li iero scriti ;-D ... meno mal che Google salva tuto ;-D

Per cuel che val per le grue mi piu` che fotografarle no go fato ... se qualchedun conosi la storia e/o storiele de sti afari che 'l zonti pur.

Comincemo co' la prima ... sta qua iera una bestia bela granda e go avudo necesita` de tirar fora tuto el mio coragio per montarghe de sora ;-D gavevo un 22 ani circa ;-D

Qua le xe vista per de soto, pero` quel che no se vedi in te la foto xe le rode e circa meta` de le gambe. La se moveva su le rotaie che penso che le ghe sia ancora e le rode le iera alte de sicuro piu` de 1 metro e mezo.

In baso de quel che se vedi de la scala ghe iera una porta de fero che pero` c'o son rivado mi qualchedun gaveva cavado za de tanto tempo. La scala la gaveva un altro per de rampe prima de rivar fin la` pero` no me par de gaver fotografado tuto. Se trovo meto anche quel.

Ciau

Franco

ffdt · Messaggio da **ffdt** » dom 29 gen 2006, 2:55

Qua iero sora de la gabina de comando. La gabina la iera quela roba enorme piturada de roso e la gaveva dentro anche i motori e i argani per comandar sia el movimento de 'l brazo che quel de la piataforma ... insoma quel che serviva per girarla e per farghe tirar su e zo i pexi. I motori de le rode i iera tacai driti su le rode.

La gabina la iera serada co' una cadena co' l lucheto, pero` la porta la gaveva una finestra e se rivava a vardarghe dentro ... anche qua no me par de gaver fato foto

Iero con do amici e ve poso dir che de tre che ierimo semo rivai fin la` solo in do ;-D ma vardar in zo per tuto el tempo de far la foto xe stado un ato de eroixmo ;-D ;-D ;-D ;-D

Difati c'o se ga tratado de tornar zo per le scalete semo andai per indrio, pianin pianin, che no gavevimo stomigo de andar zo a muxo in avanti e vardar tuto sto xvodo ;-D e ste scale che le ne pareva ripidisime ;-D ;-D

ffdt · Messaggio da **ffdt** » dom 29 gen 2006, 2:58

Questa no me ricordo ben de indove che la go fata ... penso che sia in baso, in t'un pianerotolo prima de la porta de fero che no iera piu`.

In efeti se vedi ancora le zate. Quela roba in primo pian (fotografico) no xe una scaleta ma xe le guide e i ripari de una serie de cavi de aciaio che serviva per mover no me ricordo cosa ... quele robe che par scalini le iera distanti una de l'altra de un bon metro.

ffdt · Messaggio da **ffdt** » dom 29 gen 2006, 2:59

Come che se pol leger de le scrite che xe sora de la zata de destra (in sta foto) sta roba la iera stada fata in URSS. Come che la sia finida qua no go idea.

Per leger le scrite, che le xe soto sora, xe meo girar la foto de 180 gradi e ingrandir el particolar ... ingrandindo de 4 volte vien fora sta porcheria indove che pero` se riva a leger qualcosa:

Immagine

ffdt · Messaggio da **ffdt** » dom 29 gen 2006, 3:02

Un'altra foto ciapada stando sora de la grua "sovietica": oltre de la strada se vedi quel che quela volta iera el deposito de la Saipem.

ffdt · Messaggio da **ffdt** » dom 29 gen 2006, 3:03

Qua semo sora de 'l teto de la gabina, inte 'l posto de dove che vien fora i cavi che comanda el brazo. Carucolete de gnente, no?

ffdt · Messaggio da **ffdt** » dom 29 gen 2006, 3:06

Qua se vedi bastanza ben le paserele piu` alte che gaveva sta roba.

Quel pilastro che parti su drito xe, apunto, proprio el brazo de la grua, che el xe piegado. La paserela in zima xe quela che xe in te 'l punto piu` alto de tuta la strutura e quela che se vedi a destra xe quela che la xe in zima de 'l brazo, la indove che pica i cavi de 'l ganzo.

Confronte` co' la prima foto che go meso e capire` meio. Me gira la testa za solo a pensarghe ;-D

ffdt · Messaggio da **ffdt** » dom 29 gen 2006, 3:08

Qua, inveze, cambiemo sogeto. Anche questo me par che xe un ordegno che no existi piu` e de quel che go capido doveva servir a scarigar carbon de le navi e farlo rivar drito in te la fabrica che xe de l'altra parte de la strada.

No son sicuro che fusi carbon, pero` son sicuro che fusi roba sfuxa perche` sta strutura ga una specie de gramparela e una specie de piria. Sora de la piria ghe iera una gradela (che mi calcolo che serviva come filtro per no far pasar cuele robe tropo grose che podeva finir per xbalio in te la stiva de la nave) e soto de la piria ghe iera un nastro trasportador che, corendo in t'una specie de coridoio, el pasava sora de la strada.

Quel toco che xe tirado su (a destra) el se xbasava, la gramparela la andava fina sora de la nave, la se calava dentro in stiva e ... ben, insoma,

el resto xe facile de indovinar, no? ;-D

Su sto trespolo son rivado fin la` de la gabina de comando (una roba enorme za quela) e no go pensado gnanca per un momento de rampigarme piu` in alto de la`. El iera sai piu` alto de la grua de prima e fazeva impresion vardar de soto. Ancora piu` impresion fazeva pensar che iera tuto fero ruzine e sentir che 'l se scasava tuto soto i colpi de 'l vento. Xe de dir che iera una giornada senza vento, pero` la` su el ghe iera e la strutura la vibrava tuta.

ffdt · Messaggio da **ffdt** » dom 29 gen 2006, 3:10

Qua no xe sai de dir ... xe sempre quel solo visto de l'altra parte, vardando verso 'l mar. Difati se vedi quel altro pontil che pero` no so de chi che 'l sia ... forsi de la SIOT?

Quel che se vedi meio xe, a destra in baso, la parede e 'l teto che coverzeva 'l nastro trasportador ... e la sagoma de la piria, naturalmente.

ffdt · Messaggio da **ffdt** » dom 29 gen 2006, 3:13

Questa la xe ciapada stando de soto, in zima de 'l molo, vardando in alto e mostrandoghe la schena a l'altra riva de 'l canal. La gramparela e la piria le vignisi a star davanti de chi che varda e un poco piu` in baso de quel che se vedi qua, pero` me sa che le saria comunque sconte drio de i travi de fero che se vedi subito qua de sora.

Anzi, vardando meio diria che se vedi proprio un toco de la gramparela, sora de quei travi. Pero` de quel che me ricordo no la iera poxada per sora ma la picava ... e quei travi doveria eser una paserela co' la balaustra che ghe girava intorno ... facile che sia el bordo de sora de la piria.

ffdt · Messaggio da **ffdt** » dom 29 gen 2006, 3:15

Qua se vedi un pochi de comandi eletrici ... anche se saria meio dir quel che resta de lori. No go mai capido perche` che ghe xe gente che va a disfar le robe che i trova in giro ... mah?

Comunque (de quel che me ricordo) ghe iera una specie de pianerotolo pien de robe eletriche che se ghe rivava calandose zo per una scaleta che partiva de una paserela: iera de scavalcar la balaustra e de calarse zo per circa un metro e mezo.

ffdt · Messaggio da **ffdt** » dom 29 gen 2006, 3:16

Qua xe un poche de le rode de sta specie de grua ... de la grandeza de le piante se capisi che za cuela volta no la iera doprada de un poco de tempo. ;-D

ffdt · Messaggio da **ffdt** » dom 29 gen 2006, 3:18

Qua se vedi la gramparela. De quel che me ricordo no la iera poxada sora de la gradela. La gradela, inveze doveva eser una roba che serviva solo percio` che qualche gnampolo no 'l finisi in te la piria quando che la machina no la lavorava. Ma a chi mai ghe gaveria podudo vignir l'idea de rampigarse la` de sora, 'po? ;-D ;-D

Sempre andando a memoria, me par che vardando dentro in te la piria se vedeva una seconda gradela piu` larga ... ma poderia anche confonderme

ffdt · Messaggio da **ffdt** » dom 29 gen 2006, 3:19

Eco un'altra foto de la gramparela ... la xe un pel diversa de quela de prima.

ffdt · Messaggio da **ffdt** » dom 29 gen 2006, 3:21

Qua, inveze, se vedi un toco de 'l coridoio de 'l nastro trasportador. Anche se par che sia drito, in realta` sta parte xe quela che andava de per tera fin a l'alteza necesaria per traversar la strada pasandoghe per de sora.

La` in fondo ghe iera un altro nastro che partiva verso sinistra. Saria andado piu` dentro per far altre foto, solo che quela iera diventada una caxa per gati e ghe iera una spuza che za per far sta foto qua me ricordo che go dovesto tignir el fia` ... e nisun altro ga gavudo el coragio de vignir fin a quel punto.

Devo dir che afrontar la spuza de i gati iera piu` dificile che no afrontar el senso de vertigine che ciapava andando in alto de quei afari de fero tuti trabalanti. ;-D ;-D ;-D ;-D

E questa xe l'ultima foto ... se gave` voi cualcosa zonte` pur

Ciau

Franco