Novi modi de dir

[mandi_]

Mi me permetto de far na riflession, che val per tuti i dialetti, compreso il mio. Cior en considerazion anca el dialetto dei zoveni xe opportun? O xe meio cior per bon sol el dialet dei veci?
Io ho sempre parlato dialetto con parenti amici e conoscenti, con i figli no, quando erano piccoli. Naturalmente me fioi i l' ha imparà dai amici, e sentendo noi parlare...
Però vedo che oggi i giovani usano un parlare tutto loro, inventando a tutto spiano parole nuove, che non appartengono al dialetto, per me...
Insomma non so cosa pensare de sto "zencon", anche se naturalmente no conosso el dialet triestin...

[babatriestina]

secondo mi, se vien fora parole nove, xe che una lingua xe viva. Se no la xe mumificada.

[Nona Picia]

Credo che dapertuto in ogni epoca vegni fora parole dialetali nove.Se no sbaglio xe un mucio de parole nove anche nela lingua nazionale, anche se adesso no me vien in mente nissuna...

[Ciancele]

Nona Picia sarà picia, ma la xe granda quando che la meti le bele foto de Trieste, foto che fa vignir voia de vederle del vero. Grazie anca a Macondo che me capisi e me ‘iuta nele traduzioni. No so de quando ch’el manca de Trieste, ma se vedi che el parla el triestin dei veci.
Dopo 'ver leto i post dei ultimi giorni go dito tra mi e mi: scrivo o no scrivo. Se no scrivo no cambia gnente e se scrivo no cambia gnanca gnente. Ma qualche roba se devi far e alora me go meso a scriver. Ma dove metemo el post? Paesi carsici, napoleonica per Mandi, novi modi de dir o dialeto strento? No gavendo una flica (monetina) go butà in aria una banconota e xe vignù Novi modi de dir. No xe colpa mia, ma colpa del fato, del destin. Veramente xe lo steso colpa mia, parchè mi son sempre colpa de tuto. Se meto la traduzion i se lamenta, se no la meto i se lamenta anca. Se scrivo in dialeto i se lamenta, se scrivo in lingua me lamento mi, parchè no son bon. El mio problema xe che, come che go dito in un altro post, co’ scrivo in dialeto, scrivo nel dialeto de più de 60 ani fa, quando parole tipo gnoco (tedesco), cabibo (meridionale), s’ciaveto (di origine slovena, del contado), cin ciun cian (cinese) iera vocaboli normali del dialeto e no ofese. Per ofender bisognava premeter le parole “ciò m... de ecc.” Le traduzioni le meto par quei che no capisi ben el triestin. Quei che capisi no ocori che i le legi. Par talian se diria: cancellare ciò che non interessa. Confiteor (confeso) che qualche volta spando (esagero) metendo parole del dialeto negron, del mio dialeto. Par talian se diria de umili origini. Ma no penso che qualchedun diventa roso a legerle. Tanti de voi no se inacorzi gnanca che i parla un dialeto diverso de quel de noi veci. Parchè voi vivè a Trieste ogni giorno e no ve acorzè dei cambiamenti dele parole. Ieri gavè dito gúa e ogi disè arotino (con una ere). Doman dirè ‘sta parola con do ere. E dirè che xe dialeto triestin. Adeso dir cosa che xe meo, el dialeto dei veci o le parole nove (neologismi) dei giovini, xe dificile parchè xe question de gusti. Baba Triestina ga ragion co’la disi che el dialeto, o la lingua, vivi quando che xe parole nove. Ma quala xe una parola nova? No de sicuro “pignatta” con due t. O prenderci o ciorci o inveze de ciorne. No bisogna confonder parole nove del dialeto con parole in talian triestinizade o, pezo ancora, parole triestine con le dopie acentuade. Mi podaria coreger una infinità de post, ma fazo come nel padre nostro: rimetti a noi ecc. Ti no sta coregerme a mi e mi no te coregio a ti. Ma per un vecio triestin xe un dolor de cuor veder come che el dialeto vien storpiado. No xe dialeto, xe ... Lasemo perder, parchè no se devi dir parolaze.
Taio (Chiudo) augurando a tuti bon mercoledi.

[Nona Picia]

Caro Ciancele, i tempi pasa e tuto cambia, anche el dialeto, sia triestin che altri e la lingua italiana. E per quel che so mi, anche nela lingua tedesca xe tante parole nove e penso che per i dialeti tedeschi sarà preciso.Xe l'unica roba in sto mondo che progredisi alegramente....senza far tropi dani.

[macondo]

Caro Ciancele. Una roba xe adotar parole italiane e 'triestinizarle' che xe ridicolo se le sostituisi parole in dialeto che xa esisti. Positivo me par inveze el arivo de nove parole come zencon, urbo ecetera. Per quanto incomprensibili a noi piu veci, le dimostra che el triestin xe un dialeto vivo che se evolvi.

Qualche anno fa (qua meto la dopia, per evitar confusion ) in un altro forum gavevimo meso esempi de frasi sentide in giro dove, per darse de finoti, zerte persone se sforsava de parlar talian usando parole triestine 'italianizade', del tipo: "Stai attento Gianluca di non finire nel plocchio", o robe del genere...Gavevimo fate certe ridade

[sum culex]

Me par de gaverla za dita, comunque la meto de novo.
Intesa ala fermata del bus, un signora con una picia che gaveva una pupeta in man.
"Sta atenta di non perderla!"
Ala muleta ghe casca la pupeta per tera e su mare:
"Ti avevo detto di stare atenta e di non lasciarla CASCARE; adesso INGRUMALA!"
Italian perfeto per insegnarghe a parlar ai fioi in lingua forbida.
ciao
sum culex

[babatriestina]

Ve devo dir che sempre meno me capita de sentir finto italian tradotto del triestin e sempre più invece , nei neo-cultori del triestin, triestinizzazioni de parole italiane, perchè no i sa più la vecia parola triestina che andassi ben.
( es Lo go portà a riparar inveze che a governar, ma ghe ne xe de più vistosi.. co i me passa per le man ve li segnalerò)
Comunque no xe el tema de questo discorso, che invece voleva portar novi termini rivai in dialetto doprai dele nove generazioni.

[Nona Picia]

La prima parola triestina italianizada che go sentida, la ga dita bilbo a due anni: per dir "go serà la porta" el ga dito "Mama go ciudato la porta"

[babatriestina]

un che me par un neologismo triestin, perchè ai mii tempi no lo go sentido doprar de nissun xe civa per cevapcici.
Za i cevapcici, che ga una loro antichissima origine balcanica a sua volta rivada dei Turchi ( i vari kebab no xe solo el doner kebab che gira sul spiedo e che i imigranti truchi ga diffuso dela Germania in giro) , no fa parte dela cusina tradizional triestina, no s eli trova nei libri dela Stelvio o dela Prato.. i se ga difuso imagino cole magnade "in yugo" ( ma za i diseva che ala secession in Slovenia i diseva Quela roba balcanica no xe cusina nostra) e adesso no xe sagra che i manchi. Ma civa xe poco tempo che sento dir..

[sum culex]

Mi 'civa' no go mai inteso! Sempre e solo 'civapcici' e i me anche piasi.
ciao
sum culex

[Nona Picia]

civa in genere disi la muleria....se vedi che mio marì in autobus no scolta le loro ciacole....

[babatriestina]

Mi civa go letto tante volte su facebook

[Ciancele]

civa in genere disi la muleria....se vedi che mio marì in autobus no scolta le loro ciacole....

Una volta no i diseva vado in Jugoslavia, ma vado in Jugo. Neologismo.

[babatriestina]

e spesso Yugo cola y, come sule targhe automobilistiche. I lo dopra ancora anche se i va solo che il Slovenia, in pratica vol dir andar oltreconfin sperando de trovar la roba ( benzina anzi "benza", magnar, e fin el dentista ..) più bon prezzo che de noi.

[AdlerTS]

l'altro giorno parlavo con mia fia...ghe contavo de uno che ga ciapado botte e ghe go dito "el tipo ga ciapado una rochetada" . Ela non capiva, per mi jera un espression comune.

[sono piccolo ma crescero]

Zontada sul vocabolario. E za che iero go meso anche rochetada e rocheta.

[Ciancele]

Per noi rochete iera anca i foghi artificiai. Mio papà diseva: 'ndemo a veder le rochete.

[molighe el fil]

Go sentì da tanti zovini dir ULMO per pien.
No so da quando xe in uso sta parola, ma me par che la sta sparindo

[Nini Naridola]

Go messo poco fa un commento su ULMO, ma el xe sparì ...