Trieste: zità de veci? ...No! de zente vissuda!

[El poeta]

Carissimi putei e putele, de ieri e de ogi!

Col titolo che xe in ogeto: "Trieste: zità de veci? ...No! de zente vissuda!" me presento al publico con una racolta de 30 poesie in triestin moderno (cussì lo pol capir anche chi che mastiga poco el nostro dialeto...) in un audio-book zà in vendita in librerie e edicole e de cui gà zà parlado, el Picolo, Arte&Cultura de aprile e gà fato servizi televisivi Rai Tre e Telequattro (dove a giorni tornerò ospite in una trasmission al'ora de pranzo) da sto audio-libro, con poesie e musiche originali, xe nato un recital, un spetacolo, che go zà portado gratuitamente ala Sala Bartoli el 20 aprile scorso, ala Sala Panta Rhei de via del Monte 2, quela del'asociazion culturale, el 24 aprile, po' alla Sala dela Libreria Minerva in via San Nicolò el 5 magio e ala Sala Rovis dela Pro Senectute de via Ginnastica, 47 el giorno 13 magio, e presto gaverò altri spetacoli in altre sale triestine e non solo!

El progeto xe de sensibilizar più gente possibile sul'anzianità, la terza età e i raporti sociali. Me son stufado de sentir chi che disi che Trieste xe una cità de VECI! bisogna capir che VECI = VISSUDI e quindi gente piena de esperienze e de sageza, quela che una volta, nel'antichità jera considerada come oro! Xe dai anziani che se pol inparar qualcossa de più de sta vita, grazie al loro vissudo, ale loro esperienze, ale loro corse col tempo, fra luti e disgrazie, fra ilusioni e delusioni ma anche fra gioie e esultanze, una vita costelada de tanti "domani" zà vissudi e perciò drìo le spale! In una poesia "I doman de drìo" digo: "NISSUN SA COSS'CHE SARA' DOMAN... MA NOI (VECI) ALMENO UN POCHI DE DOMAN LI GAVEMO ZA' DE DRIO! CHE I ALTRI SPETI, PRIMA DE CIACOLAR!"

Sè d'acordo con mi???

Xè ora de finirla de indentificar i triestini come veci, mati e inbriagoni!!! e con un dialeto dale vocali 'verte!!! Noi gavemo avudo e gavemo gente ilustre fra i nostri concitadini!

Perché in Italia pol razolar dialeti napoletani, romani, siciliani, veneti, sardi e el nostro gà de esser de serie "B"??? Xè ora de finirla! O mejo... xè ora de incominciar a darse de far!! per portar el nostro dialeto e la nostra sageza, anca fora de Trieste! Farse aprezar per quel che semo veramente e non per quel che i vol far creder i altri!!!
Col nostro dialeto semo capaci in poche parole de sintetizar i più svariai argomenti! perciò scominziemo a darse de far!!!

Ve chiedo aiuto!

Perché solo col vostro aiuto poderò portar 'vanti questa mia bataglia de sensibilizazion! fazè el passaparola!
Star ziti e boni non vol dire esser "mone" e se questo inveze xe quel che se pensa alora basta col star ziti! Scominziemo a far sentir la nostra vose! ma no per pianzerse 'dosso ma per far capir che qua, in una zità "anziana" xe 'ssai de inparar!!! Che i altri se meti in fila e incominci a 'scoltar!!!

Scuseme lo sfogo ma in questo progeto ghe credo veramente e con tuto el cuor!

Diseme el vostro pensier, positivo o negativo che sia, ma movemose! Perché a star fermi se xe più facili bersagli dele "cagade in testa" dei colombi... (scuseme i termini papali papali....)

A presto!

Per altri raguagli xe qualcossa scrito anche soto el forum AUTORI, nel'argomento "go scrito un libro in dialeto triestin"

El poeta
Emmanuele

[AdlerTS]

Perché in Italia pol razolar dialeti napoletani, romani, siciliani, veneti, sardi e el nostro gà de esser de serie "B"???

Effetivamente la TV xe piena de accenti e termini dialettali italiani.
Solo noi se vergognemo del nostro

[El poeta]

Perché in Italia pol razolar dialeti napoletani, romani, siciliani, veneti, sardi e el nostro gà de esser de serie "B"???

Effetivamente la TV xe piena de accenti e termini dialettali italiani.
Solo noi se vergognemo del nostro

Te ga ragion! Ma no te par che sia ora de finirla? No gavemo gnente de vergoniarse! Anzi! Noi semo un intrecio de popoli come pochi altri e el nostro pensar e ciacolar no gà de esser secondo a nissun!
Quel che dovemo, secondo mi, inparar dei altri xe l'aiutarse! Altre cità e regioni va fiere dei loro cantanti, scritori, poeti ecc. qua de noi inveze, per el fato de far qualcossa par spesso che sia solo monade! Dove xe finido el campanilismo? Forza e coragio! Se me aiutè porteremo anche el nostro dialeto in giro per l'Italia e pel mondo!!! Ma el nostro dialeto con anca la nostra "sageza"!!!
Ciao e grazie!!!

El poeta
Emmanuele

[refolo]

Nominar sempre Trieste? come citta' dei veci me sembra un scusa
giornaliera......ma siccome mi ( non tanto) ma son vecia a rispetto de voi tutti, me par che ste' esagerando.

Ghe xe gente a Trieste con educazion, rispetto, sui? circa 48-53 anni d'eta' (basadi sui fioi delle mie rispettive amiche e anche i mii cugini) con educazion a un livello superiore. E con questo posso dir che dipendi tanto dalle famiglie, dalla vita quotidiana.

Non tutti xe scienze, ma non tutti xe m...... per el solito sistema de discuter, e de pensar? forsi semo differenti, tutto dipendi come ditto su'
da un'educazion famigliare, che non vol dir ""FA' QUEL CHE DIGO, MA NON QUEL CHE FACCIO"" ma una regola istruttiva, che dovessi esser assorbida per una futura generazion.

Maria aka Refolo

[El poeta]

Nominar sempre Trieste? come citta' dei veci me sembra un scusa
giornaliera......ma siccome mi ( non tanto) ma son vecia a rispetto de voi tutti, me par che ste' esagerando.

Ghe xe gente a Trieste con educazion, rispetto, sui? circa 48-53 anni d'eta' (basadi sui fioi delle mie rispettive amiche e anche i mii cugini) con educazion a un livello superiore. E con questo posso dir che dipendi tanto dalle famiglie, dalla vita quotidiana.

Non tutti xe scienze, ma non tutti xe m...... per el solito sistema de discuter, e de pensar? forsi semo differenti, tutto dipendi come ditto su'
da un'educazion famigliare, che non vol dir ""FA' QUEL CHE DIGO, MA NON QUEL CHE FACCIO"" ma una regola istruttiva, che dovessi esser assorbida per una futura generazion.

Maria aka Refolo

Ciao,

scusa ma non go capido a chi che jera riferida la risposta? Mi go scrito le poesie su vari argomenti ma uno fra i più importanti xe quel de smeter de considerar che Trieste xe una cità de veci (ma non che lo disemo noi a Trieste! xe quei de fora, del resto de l'Italia e ormai anche nel mondo che disi che Trieste xe una cità de veci!) e per questo me stago dando de far! per far capir anche a quei de fora che primo: se se riva a una magior anzianità vol dir che proprio cussì mal qua no se vivi! no te par? secondo, per mi, xe sopratuto dai anziani che se pol trarre i maggiori insegnamenti!
No te son d'accordo con mi su questo?

No me pareva che c'entrassi l'educazion... Mi me par che nel'istruir le nove generazioni se devi insegnar magiormente la comprension assieme al rispeto, perché solo se se riva a comprender anche i altri, se pol migliorar la vita... ti coss'te disi?

In tuto questo no me par de trovar esagerazion, se inveze xe cussì alora spieghime mejo perchè no te go capida... grazie, ciaooo a presto!

El poeta
Emmanuele

[refolo]

Non iera una risposta, solo un paragon, un'idea fatta su' quel che leggio e sento.

Mi son al telefono con gente a Trieste, che purtroppo certi conferma che la
sta subendo una crisi, per quei che xe veci, per'altro noi doveria metter sul giornal certe fotografie,dove che te vedi sti anzianotti ancora sentadi in Giardin Pubblico, perche' ghe xe pochi ospizi.

Questo volevo, dir, per l'educazion s'intendi che certi ga' studia', e non solo invecidi per non far niente. Se in pension se va' a 60 anni?.......adesso i xe oltre i ottanta?
ghe ne vol de spettar, nel frattempo i disi chei xe un cattivo esempio per la muleria de oggi! Non atirra nianche el turismo.

Boh! Per conto mio la prima roba i doveria rinfrescar o tirar via xe el nome de CITTAVECIA! cussi' i faria contenti veci e giovani!
Maria aka Refolo

[Nona Picia]

Mi me par che no ghe sia solo Trieste de cità de veci, ma anche "qualche " altra. Comunque Mi go 65 ani e NO me sento ancora vecia, anche se qualche volta penso che saria ora che comincio a comportarme de persona adulta.
E no son gnanche pessimista riguardo ai giovani, che a guardarli ben, i xe assai più sgai e umani de quel che ierimo noi.
E no solo quei che ga studià xe persone che ga fato qualcossa! Xe persone che per vari motivi no ga studià e che senza tanta publicità ga fato cose bellissime, anche solo limitandose a tirar su i fioi tra mille difficoltà.
Penso anche che "CITTAVECIA" sia un nome che ai triestini ghe disturba assai poco. No disemo sempre:"Viva là e po' bon?".
ciao ciao

[El poeta]

Mi me par che no ghe sia solo Trieste de cità de veci, ma anche "qualche " altra. Comunque Mi go 65 ani e NO me sento ancora vecia, anche se qualche volta penso che saria ora che comincio a comportarme de persona adulta.
E no son gnanche pessimista riguardo ai giovani, che a guardarli ben, i xe assai più sgai e umani de quel che ierimo noi.
E no solo quei che ga studià xe persone che ga fato qualcossa! Xe persone che per vari motivi no ga studià e che senza tanta publicità ga fato cose bellissime, anche solo limitandose a tirar su i fioi tra mille difficoltà.
Penso anche che "CITTAVECIA" sia un nome che ai triestini ghe disturba assai poco. No disemo sempre:"Viva là e po' bon?".
ciao ciao

Scuseme tanto...
Da quel che se legi e senti in giro l'età del'essere uman se gà inalzado tantissimo e pertanto se incomincia za a parlar de una quarta età... comunque per el mio modo de veder le robe, xe proprio el termine "vecio" che no me piasi, perché per mi vecio xe solo quel che no servi più a gnente e se buta via, vestiti consunti, ogeti roti e cussì via... vecio mi lo contraporìa come termine al "novo" mentre per contrapore a giovine xe el termine anzian... no ve par? se disi forsi "quei fioi i xe cussì novi..." o se disi "quei fioi xe cussì giovini..." e alora? Basta col dir che l'esser uman diventa "vecio" pol sembrar che cambi poco ma se ghe pensè su vederé che qualcossa pol cambiar! Comunque a prescinder de l'età, ribadisso, quel che conta xe verzer i cuori e conprender anche le vite dei altri, giovini o anziani che sia, e questo secondo mi, xe fondamentale! Xe tropo facile giudicar stando de fora dele situazioni, e sicome in una situazion pol saver le robe solo chi che ghe xe dentro, alora mejo no giudicar, mai!
Bona giornada a tuti-e!

El poeta
Emmanuele

[refolo]

Bravo!!!!
te son un poeta de 50 anni? va avanti cussi'! te ga' 20 anni in fronte de mi', che purtroppo non posso tornar indrio.

Quel che se devi ametter xe che se te se senti giovane come che me sento e mostro mi" ( non scherzo......ai mii 70 vado per 50).

Dipendi de come che te vivi, come che te fa' la vita e anche che non te se butti zo' come che ga' fatto mio mari'. Pauroso, ma fumador accanito che 60 sigarette al giorno lo ga' copa' e distrutto prima de morir.

el dovessi esser contento, del magnar e de tutto quel che fazo per tegnirlo in vita. Ma quando un vecio xe vecio, purtroppo xe poco de far.
I diventa fioi.

El ga' paura de morir? el vol che porto le ceneri a Trieste ? HA!!!HA!! con un refolon de bora el me torna Down Under.

non me interesso, lo tegno su' de morale solo fazendoghe paura che lo lasso in un ospizio? bisogna esser filosofi....
el xe stremenzi'? ma l'indomani el me fa' la settimana egnigmistica senza batter ocio, domande- risposte de una persona normale.

Mia fia e genero parti domani mattina per un viaggio intorno al mondo...digo cussi' perche' i unici posti che noi va' sara' Africa-America-Asia Minore.

Mia fia ghe ga' domanda' a suo papa? te vol vegnir con mi'? e te lasso a Trieste?......lui la ga' guardada e dito: cossa per farme metter in istituto dei poveri? Te vedi che quel che pensemo xe una roba normale.

Una mia amica la ga messo el mari'..... Scusa me par in zona via Imbriani? indirizzo nascosto.....
un posto dove i tien le persone malade senza ricupero? ela sicuro non la me disi ne come ne cossa.

La vecchiaia xe terribile, specialmente per quei come dito su' i xe soli e i speta la morte senza che nessun li guardi. Xe doloroso, ma purtroppo ste robe le xe per tutto el mondo.

Per finir, la citta' xe vecia per nome......e non so' quanti veci-giovani xe in lista, mi go' solo le statistiche del 1954.
Impressionante anche a quel periodo.
Maria aka Refolo

[El poeta]

Carissimi tuti-e,

su consiglio de Nona Picia, publico una poesia tratta dal mio audio-libro de poesie triestine "Trieste: zità de veci? ...No! de zente vissuda"
el titolo xe "Le bancarele a Nadal" e ve ricordo che in Corso Italia, 29, fra Arbiter e Calzedonia (al'altezza de via Imbriani) gò fato una vetrina dove che podè veder alcune foto e le poesie e un video dei spetacoli che gò fato in questi do mesi,
ciao e 'speto i vostri comenti,

chi che volessi cior el libro-parlado recitado dele poesie (come gè fato Nona Picia) lo pol trovar nele librerie Fenice, Minerva, Saba e Nero su Bianco, e in tante edicole del centro, de via Batisti, via Giulia, Rotonda del Boscheto, Pz tra i Rivi, Via Valdirivo, Via Carducci, Pz.Repubblica, Pz Goldoni, in stazion là dei binari Via dell'Istria, entrata de S.Sergio, via Flavia, ecc. ecc. E adesso anche ONLINE sul sito della libreria Nero Su Bianco www.nsb.it

ciaoooo
El Poeta
Emmanuele

poesia:

19. Le bancarele a Nadal

Varda le bancarele,
quante luzi, quanti colori,
come sufia la bora,
poveri lori,
drìo a sti bancheti,
a spetar la zente,
che se riprometi
de comprar tanti doni
de far pei altri,
come paremo tuti boni,
co ‘riva el nadal
e se mascheremo de bontà,
come de maschere
pel carneval…
Dimentichemo spesso
de chi che sarìa la festa,
ma tanto cossa inporta?
con tuto quel
che se gà per la testa….
No inporta
de chi che xe el compleano,
dai che presto xe un novo ano!
I propositi xe quasi senpre i stessi
saremo più bravi,
saremo più boni,
se solo se se vedessi…
tuto un corer, tuto un spender,
pien de man da tender,
per farse tanti auguri,
che finissi i tempi scuri
e intanto, nel scuro,
qualchidun xe de sicuro,
quei che no gà soldi,
che no gà dove ‘ndar,
che no gà con chi festegiar
e, magari, se ricorda mejo
e forsi anca de più
coss’che vol dir pregar…

di Emmanuele Bonnes

tratta dall'audio-book "Trieste: zità de veci? ...No! de zente vissuda!"
un libro-parlato e recitato su musiche originali, contenente 30 poesie e
tutti i testi scritti, audio-book da cui è stato fatto il Recital omonimo presso la Sala Bartoli del Rossetti, la sala Panta Rhei, la sala della libreria Minerva, la Sala Rovis della Pro Senectute...

[El poeta]

Un'altra poesia tratta dal mio audio-book....

02. Picia mia
Te tegno nel cuor picia mia
te tegno drento de ‘sta poesia
te tegno sempre con mi
anca co son ‘ssai lontan de ti
Masìno chilometri a nastro
per vignir fora a trovarte
masìno chilometri a nastro
che me par d’esser fora de mi...

Gò fato del fato virtù
svolando de fato più su
de un cocal sora el mar
che col vento felize se meti a zogar
de spetar gò fato anca un’arte
ma el limite ormai xe alle porte
e no servi che coro più forte
perché el tempo no cori con mi...

Fedele ti là te me speti
fazendote sempre più bela
e mi, stando distante,
sofro le pene de un povero amante
chi xe là, con ti, pol goderte
mentre mi vivo solo de trasferte
chi xe là, con ti, pol vederte
su quel molo, a San Zusto, su per l’erte

Masìno chilometri a nastro
e per poco no combìno un disastro
oramai son vizin stago rivando
te vedo vignirme incontro,
come sempre, da quanto?
come sempre nella tua frescheza
con la bora, si, che te acareza

Coi coli e col mar tuto intorno
starò con ti finché la note se fa zorno
caminando in silenzio per le tue vie
sconfizendo tute le mie fobie
da triestin fato e finido
in esilio ormai da tropo tempo
con nel cuor sempre sto tormento!
sempre sto tormento,
sempre sto tormento...


e questo xe el link dove podè trovar la scheda online sula libreria Nero su Bianco de via Oriani:

http://www.nsb.it/Shop/SchedaPro.php?&I ... d=TRIESTEZ

Un abracio a tute e tuti!
El poeta
Emmanuele

Un cuor da Trieste, per Trieste nel cuor del mondo!

[Tirabaralla]

Toccante.

[El poeta]

Toccante.

GRAZIE DI CUORE!

ciao!
Emmanuele

[giuli]

Toccante.

questa fa al caso tuo Jo
Molto bella comunque!

[El poeta]

Toccante.

questa fa al caso tuo Jo
Molto bella comunque!

GRAZIE del commento!

Ciao
Emmanuele

[Tirabaralla]

Sì, Giuli...te ga razon...sarà per quel che la me ga colpido
You are welcome, Emanuele.

[El poeta]

Sì, Giuli...te ga razon...sarà per quel che la me ga colpido
You are welcome, Emanuele.

Grazie

Meto un'altra poesia... cussì, se ve va... me darè el vostro parer, ok?

06. DRENTO LA VETRINA

La varda una vetrina,
mile colori e mile robe sparse,
dove jera tuto questo?
co jero zovine, la pensa...
e un refolo de bora
la fa un poco trabalar,
per fortuna la gà le borse
a farghe de zavora,
ormai xe zà do ore
che la xe ‘ndada fora
e ‘desso xe ora de rincasar,
el corpo scominzia a moverse,
seguindo i pìe che va,
ma i oci, xe ‘ncora fermi là...
...drento la vetrina,
là, la gà lassà un saco de ricordi
de quel che jera e de quel che no xe stà...
co la jera muleta
ben altri jera i svaghi
e i gaget no esistiva
jera za bon se jera de magnar
e, dopo zena, la sera zà finiva...
Altro che ‘desso!
Celulari, compiuter, television...
e chi più gà, che più ghe meti
viva là e po’ bon!
Le sere xe più longhe,
le noti senpre più curte,
tropi pensieri e poco dormir,
ma prima o dopo, se smeti de sofrir!
cussì, almeno, la pensava
co la jera putela,
co i muli, che ghe coreva drio,
con ela no fazeva tela,
e ‘desso? Cossa la darìa?
Per no esser più sola
e no aver solo la television
che la consola...
zerto, a saver prima le robe,
forsi se farìa un’altra vita,
podèr salvarse un poco de energia,
pei tempi futuri...
e anca de compagnia
pei tempi più duri...
Intanto, ecola rivada in cusina,
zivola, oio, via col disfrito in tecia,
orca la TV, presto inpizzarla,
xe presto la nova puntata
de quela telenovela,
fra tute le droghe,
questa almeno, no la xe vietada,
ancora,
sì la te inbunbissi la testa,
te rendi insenpiada,
ma almeno le disgrazie, i corni e i luti,
xe dei altri, e i tui passa in secondo pian,
solo un poco però...
fin co xe ora de dormir,
perché là, ala fine, te son sola,
te seri i oci e te se rivedi,
de muleta in su
e no servi proferir parola,
gnanca te podarìa,
perché te gà senpre el nodo in gola...
intanto bonanote a tuti,
pel bonzorno, forsi, doman...

Ciao,
Emmanuele

[El poeta]

Ciao a tute e tuti,

me farìa piazer se passando per 'sto forum me lassassi qualche comento sule poesie, se no ve seca... positivo o negativo, insoma quel che pensè de quel che go scrito... giusto per farme un'idea del lavor che go fato...
grazie!

Ciaooo
Emmanuele

[El poeta]

Per chi che pol interessarghe,
Ve informo che martedì 18 luglio, ale ore 21,00
nel piazal antistante el supermercato Bosco,
in via Paisiello 5/8,
ghe sarà la rassegna estiva del Festival dela Canzone Triestina,
mi sarò ospite verso le 21.30 con alcune poesie che reciterò dal vivo,
me farìa piazer se qualchidun venissi a sentirle...

grazie!
Ciaooo
Emmanuele

[ffdt]

[...] me lassassi qualche comento [...]

Cuaxi tute le ga almeno un pochi de versi (e tante volte gnanca pochi) che me toca cualcosa dentro ... ben in fondo ... cusi' tanto in fondo che no rivo a legerle con legereza.

Te ga arte, omo ... e no te trati de robe de poco conto ... e no rivo a parlar de 'l stile e de come che me piaxesi a mi gaver meso le virgole se fusi stado a'l posto tuo perche', apunto, el senso de cuel che te scrivi me riva drito in stomigo.

Xe per cuesto che no metero' altri comenti

Ciau

Franco