Iera diversi anni che no me capitava de "divorar" un libro in sto modo. 355 pagine lete in poco più de do giorni! (per mi no xe una roba abituale)
Stago parlando de "Cella 2455 braccio della morte", scrito da Caryl Chessman. Nela mia biblioteca se trova la prima edizion, uscida l'anno in cui la ga scrita, el 1954, ma no la gavevo mai leta.
Chi iera Caryl Chessman?
Per quei più giovani, che forsi no i lo conosi, Chessman iera un famoso criminale, nato nei USA el 27 maggio 1921 e morto nela camera a gas el 2 maggio 1960, dopo 12 anni ! de detenzion nel braccio dela morte dela prison de San Quentin. El libro xe una autobiografia, scrita in carcere, che gaveva fato epoca e che fa molto pensar. Lui no nega de gaver visudo nel crimine (furti, rapine, evasioni, ecc.), anche se el giustifica la sua condota da un odio interno dovudo a quel che gaveva subido dala vita. Ma el nega decisamente de gaver comeso i crimini per i quali xe stado condanado ala pena capitale (iera stado acusado de eser el "Red Light Bandit"). Tuti nega? Certo, ma persino un raporto de l'FBI aferma che probabilmente no iera lui el colpevole. Durante el proceso el se gaveva autodifeso (nol iera sicuro un ignorante), nonostante enormi dificoltà, e anche questo gaveva fato epoca.
El libro xe oltremodo interesante proprio perché el vedi la vita dala parte de un "fuorilegge", fuorilegge non tanto per soldi, ma per spirito ribele. Ghe xe considerazioni psicologiche che fa pensar, tanto che el libro steso iera diventado un simbolo dela lota contro la pena de morte.
Xe anche interesante notar alcune robe:
1) Chessman xe stado condanado in base ala lege cosideta "Federal Kidnapping Act" (o "The Lindbergh Law", cioè lege de Lindbergh), che prevedeva l'ergastolo e anche la pena de morte per el rapimento; da notar che come "rapimento" podeva intenderse anche solo el spostamento forzado de una persona per pochi metri; tale lege xe rimasta in vigor fino ai anni '70
2) Chessman no xe mai stado accusado de assassinio
3) la lege de Lindbergh iera stada fata dopo el rapimento, con sucesiva ucision, del fio de un anno e mezzo, del celebre pilota american de origine svedese Charles Lindbergh, che el 20 maggio 1927 gaveva compido la prima trasvolada atlantica; del rapimento iera stado accusado e condanado a morte (sentenza eseguida el 3 aprile 1936) Bruno Hauptmann, de origine tedesca, ma no xe per niente certo se fusi stado porprio lui; el rapimento ga ispirado anche el romanzo de Agatha Christie "Assassinio sull'Orient-Express"
4) no ga niente a che far col rapimento né con Chessman, ma sembra che sto Lindbergh no fusi poi tanto eroe: el iera de simpatie naziste e el gavesi voludo che i USA se schierasi a fianco de Hitler o almeno i restasi neutrali
5) in america, za ala fine dei anni '30, i gaveva dele carceri de nova concezion come el Chino (California Institution for Men (CIM)), dove se puntava sopratuto ala vera rieducazion dei carcerati, con misure meno opresive, insegnandoghe un lavoro e curando la loro istruzion; me domando se in Italia xe mai esistide robe simili
Queste e tante altre considerazioni vien fora del libro o comunque el libro me ga fato conoser, in modo più o meno direto. In un periodo in cui semo sotoposti a alte ondate de criminalità, e de conseguente giustizialismo, penso che el libro steso posi eser più che atuale. Se no altro xe un punto de vista molto diverso dal solito. Ve consiglio la letura.
Concludo citando alcune frasi:
Avete mai pensato, voi, alla possibilità di commettere un delitto? E se sì, perché vi siete astenuti dal commetterlo?
E perché, secondo voi, un altro invece ha ceduto al proprio istinto?
Solo il tredici per cento dei criminali all'opera nel paese finisce in prigione [...] le carceri e le prigioni sono sature fino a scoppiare di detenuti... che tuttavia rappresentano appena il tredici per cento della totalità dei criminali all'opera nel paese [...] se tutti i rei di delitti maggiori potessero essere acciuffati nello stesso momento, sarebbe umanamente impossibile incarcerarli dopo l'arresto, giudicarli e condannarli, a meno che non si cotruissero e non si mantenessro carceri, tribunali e prigioni per un numero otto volte superiore a quello attuale
Migliaia di professionisti del delitto vivono nel lusso e negli agi, mentre voi, io e la polizia non sappiamo chi sono