bise

[ffdt]

no son sicuro de che tipo de bestia che sia ... per mi e una bisa ... la sara` stada longa un 20 centimetri, no de piu` ... tanto per dar l'idea de le dimensioni tigni' conto che cuele piere intorno de ela xe giarina

cualchedun la conosi?

[Lugara]

... per mi e una bisa ...
cualchedun la conosi?

Ovvio che si, xe un orbitolo (in italian "orbettino" o "serpente di vetro") e se ne trova anche de più grandi de quel che te ga fotografado ti. Non xe una bissa ma una lucertola a cui se ghe ga atrofizado le zate. In caso de attaco de un predator la pol perder la coda, che xe longa quasi la metà del corpo, per scampar. Xe una animaleto molto utile perchè magna larve, insetti e vermi vari. El pol magnar solo prede picie perchè non el pol slargar la boca per inghiotirle come fa le bisse propriamente dette.
Ciau!

[sum culex]

Mi no rivavo a capir perchè el xè sai nero, quei che go visto mi i iera più maronzini con due fassete un poco più scure longo la schena.
A proposito de orbitoli, ve conto una che me xè sucessa co iero mulo, gaverò avù più o meno 15 ani:
Un orbitolo me ga fato andar el sangue in acqua e vignir la pele de oca!
Iero andà d'estate in cine al aperto nel oratorio dei frati francescani drio la cesa de via Rossetti. Co son tornà a casa iera logicamente scuro, ma go volù controlar lostesso in porton la casseta dela posta. Qualche bela anima ga volù far un scherzo e ga messo drento la casseta un orbitolo, co go verto la caseta e messo la man dentro sta bestia me se ga rampiga sul brazo e in scuro no se capiva proprio cossa che iera, ma solo che iera un 'serpente'.
Ve lasso imaginar che salto e che baticuor. Tante volte penso che per fortuna go verto mi la casseta e no mio papà che iera malà de cuor e no so cossa che ghe gavessi podù suceder. Se me fussi sucesso de giorno forsi el scherzo podeva anche esser fin a un certo punto acetabile, se se tratava veramente de un scherzo.

ciao
sum culex

[Nona Picia]

Benrivado o benrivada Lugara!

[sum culex]

Benrivado o benrivada Lugara!

Anche mi me associo!
Solo una domanda: che bestia te sta rapresentando? No sarà miga che la morsiga? Guardandoghe le rece no me sembra un gato.
ciao
sum culex

[ffdt]

[...] xe un orbitolo [...] se ne trova anche de più grandi [...]

pensavo che i fusi tuti piu` grandi

grazie de la spiegazion

ciau ciau

Franco

[Tirabaralla]

Cioè, Franco...te me vol dir che i "bisi" xè quei pici tondi verdi e cussì boni e le "bise" le xè ste bestiazze qua?
Perchè no te dopri quela santa doppia esse? Mi no capivo mi ga fintanto che no go visto la foto!

[babatriestina]

Cioè, Franco...te me vol dir che i "bisi" xè quei pici tondi verdi e cussì boni e le "bise" le xè ste bestiazze qua?
Perchè no te dopri quela santa doppia esse? Mi no capivo mi ga fintanto che no go visto la foto!

concordo con Tirabaralla, anche mi me go domandado cossa che xe le "bise".
Chi che dà e dopo ciol, ga la bissa soto el cuor!
( xe vero che per lui, se no, el gavessi scrito le bixe e se gavessimo domandado ancora de più de cossa che el parla! )
Mi go pensado ala "bise" el vento in francese..
Anche perchè invece el bisato ga una s sola - ma Franco scrivessi bixato che a mi me paressi quasi bissato cioè fato el bis...

[Tirabaralla]

Go mal de testa

[ffdt]

https://www.atrieste.eu/Forum3/viewtopic ... 1&start=61

[babatriestina]

ti te son libero de far quel che te vol, perchè no ghe xe ancora un'Accademia dela Crusca triestina, però fazendo riferimento al venezian, che xe stado scritto a livello letterario se no altro de Goldoni, ricordo che la Bissona xe un tipo de barca, che deriva del veneto Bissa che vien de Biscia. Quindi ti te scrivi come che te vol, ma noi liberi de no capirte al primo momento.
e anche i cavei tipo damine del settecenti xe i Bissoni, e se fa ben sentir le do esse. E speto, per assonanza che anche el stilista Missoni, che xe dalmato e ga vissudo anche a Trieste, te me lo scriverà Misoni per la tua guerra contro le doppie . Ara ti, le scrivo aposta, qua!

[Lugara]

Benrivado o benrivada Lugara!

Son baba, grazie del benvenuto Nona!

[Lugara]

Mi no rivavo a capir perchè el xè sai nero, quei che go visto mi i iera più maronzini con due fassete un poco più scure longo la schena.

Tipo questo:
Le femine e i giovini ga color più scuro, a ogni modo i varia dal grigio argento al marron.
Che bruto scherzo che i te ga fato, vara! Mi me piasi le BISSE ma trovarme una cussì ala vigliaca anderia insieme de sicuro...

[Lugara]

Benrivado o benrivada Lugara!

Anche mi me associo!
Solo una domanda: che bestia te sta rapresentando? No sarà miga che la morsiga? Guardandoghe le rece no me sembra un gato.
ciao
sum culex

Grazie anche a ti del benvenuto. Xe la mia gata - per la precision - che me rapresenta. Ela no la morsiga, mi qualche volta inveze SI...!
Ciao

[Nona Picia]

Scusa Lugara, ma xe un gato classico o xe un gato speciale? Dela foto el par ungato molto particolare, almeno a mi.

[Lugara]

Xe una gata siamese e - si! - la xe speciale. Da ogni punto de vista. Ciao!

[babatriestina]

De quei gati che più de un ga battezzado Yoda
i siamesi ga carateristiche speciali. Ma anche i norvegesi ( la mia xe un ibrido de norvegese) no scherza-
PS: spostemo sta parte in salottin, me par che xe un thread sui nick e avatar? che ormai no xe più bisse qua

[ffdt]

[...] no ghe xe ancora un'Accademia dela Crusca triestina [...]

cuel "ancora" xe un sai bel augurio ... magari che cualchedun se metesi a farlo seriamente ...

[angiolina]

[...] no ghe xe ancora un'Accademia dela Crusca triestina [...]

cuel "ancora" xe un sai bel augurio ... magari che cualchedun se metesi a farlo seriamente ...

Presieduta da Baba?

[Nona Picia]

Xe una gata siamese e - si! - la xe speciale. Da ogni punto de vista. Ciao!

Distinta la tua gattina!