Froson

[sono piccolo ma crescero]

Questo qua soto se un froson, frosone o frusone in italian, coccothraustes coccothraustes el nome scientifico latin. Che poi no xe vero che sia latin, perché in latin xe, me pasè la parola, un bel casotto: se vardo el Georges italian latin, el fruson xe tradoto ossifragus, ma se vardo dal latin in italian, ossifraga xe l'aquila de mar (sarà un'aquila che va in barca; forsi la vederemo per la barcolana).

Come confermerà babatriestina el nome in realtà xe grego e vol dir, però la stesa roba, frangitore di semenze, spaccabisi insoma , perché el xe bon de spacar anche i ossi dele sariese. Quindi no meteghe el dito in boca, anche perché el xe più grande de un pasero e el becco de conseguenza.



Lo go visto e fotografà ala fine de setembre 2007, una matina, sui alberi intorno ala stradeta che da Grignan va al parco de Miramar.

[Nona Picia]

Go l'impression che a piccolo e a sua moglie ghe piasi sai i volatili!

[sono piccolo ma crescero]

Mia moglie e mia cognada de pice le ingrumava i useleti cascai del nido, le li riparava e li meteva de novo per aria, se iera posibile. L'ultimo che la ga "riparà" xe sta un balestruccio in montagna quatro ani fa, che iera a terra, duro de fredo e bagnà. La lo ga coverto, scaldà e dopo la lo ga meso su un trespolo in modo che el posi svolar via e el xe andà.

Mi go comprà st'estate una machina fotografica nova e me son acorto che poso far foto naturalistiche che prima no podevo e quindi go un giogatolo novo e qualcosa de novo de far: no go fotografà solo useleti: go fotografà la marmota, el daino, farfale e inseti, me piasesi becar de novo i cinghiali e i caprioli; go provà a fotografar un levro, ma el xe spari ... come un levro prima che rivasi a cior in man la machina fotografica. In definitiva i useleti xe le bestie più facili de fotografar in natura.

Meto qua solo le foto che xe de Trieste.

Molte dele foto che go messo le go fate 'ndando da casa mia a casa de mia mama e viceversa, o in qualche caminada che go fato qua vizin. Stago diventando mato per fotografar le cinciallegre che da un pochi de ani bagola sui alberi davanti ale mie finestre, ma le se scondi, le bagola, le salta e no le sta mai ferme; gaverò una ventina de foto ma nesuna me piasi veramente. Per una question de principio zerco de no romperghe i bisi e quindi stago un poco lontan, no dopro flash, me scondo.

In general mi po' no so gnente de ste bestiuzze, e quando le fotografo no so gnanche cosa che go fotografà. El fruson, visto de soto, me pareva una ghiandaia (go anche i ociai e son un poco astigmatico). A casa ingrandiso le foto, e me toca studiar; go un poche de foto che no so cosa che sia e stago spetando conferma da mio cognà; go la foto de un useleto che magna un inseto (ciapada per puro caso) e no so se xe un fringuel o un verdon.

La resa xe modestissima: de cento foto ne salvo si e no 10, le altre xe mosse, sfocade, sotoesposte. Però me diverto.

Quel che no capisso xe perché nesun amico vol più vegnir fora con mi ala domenica a far due passi in Carso

Go fato anche foto de architetura, ma non oso confrontarme con quele de sum culex e quindi no le meto.

[ffdt]

[...]froson[...]

gnanca no savevo che 'l existesi ... e se mai lo go visto de sicuro no me go inacorto che 'l fusi fato cusi`

[Nona Picia]

Quel che no capisso xe perché nesun amico vol più vegnir fora con mi ala domenica a far due passi in Carso

Prova dirghe a sum culex, te vederà che lui vegnerà, dato che anche lui ga el tuo stesso problema!


Go fato anche foto de architetura, ma non oso confrontarme con quele de sum culex e quindi no le meto.

No xe de aver paura! Sum culex no xe professor, el xe solo fio de professor!

[Lugara]

Anche mi de solito salvo 10 foto su cento, Picolo...
I tui amici che no vol più vignir con ti a far due passi in Carso no i sa cossa che i se perdi!

[babatriestina]

quel che no capisso xe perché nesun amico vol più vegnir fora con mi ala domenica a far due passi in Carso

per le prossime domeniche in Carso, ghe ne riparleremo: ti coi useleti e mi coi fioreti podessimo far dele bele escursioni: po femo tante foto, butemo via la magior parte ( el vantaggio del digital) e postemo le meio sul forum

[sum culex]

1) Mi go comprà st'estate una machina fotografica nova

2) de cento foto ne salvo si e no 10

3) Quel che no capisso xe perché nesun amico vol più vegnir fora con mi ala domenica a far due passi in Carso

4)Go fato anche foto de architetura, ma non oso confrontarme con quele de sum culex e quindi no le meto.

1) Mi me toca contentarme dela mia vecia che va ancora ben anche se el zoom xè modesto e foto de useleti.... I scampa prima ancora che penso de farli!

2) Mi go el bruto difeto che no go el coragio de butarghene via quasi nissuna anche se xè doppioni e no proprio perfete. Logicamente se le xè assai sfogade (raro) o ben mosse e/o irrecuperabili me toca anche a mi eliminarle, ma in una percentual assai picia.

3) Mi capisso perfetamente: Me fermo per studiar l'inquadratura e i altri va avanti, me sposto in qua e in là per trovar un primo pian e i altri no speta o i rugna e cussì avanti. Beata l'ora che trovassi qualchedun che gavessi la santa pasienza de star con mi, magari co me fermo a spetar che un nuvoleto che ga sconto el sol sul primo pian se sposti.......
Unica roba xè cossa che te intendi per 'due passi': nè mi ne nona picia che vigniria con noi, sempre che se metemo dacordo e che combinemo, rivemo a caminar tanto; disemo che inveze de due passi fazessimo un passo e mezo! Sentimose, grazie.

4) Meti meti e osa che se confrontemo!! Cussì posso anche imparar qualcossa de novo. No son miga 'superspeciale', son solo un modesto hobbista. Dati i comenti dei amici del 'bucum' me rendo conto che qualche mia imagine pol anche esser valida, ciò nonostante, se no te ne mostri le tue come podemo dir che no le xè altretanto bele se no superiori?

ciao
sum culex

[sono piccolo ma crescero]

SO che ghe gavevo meso una foto de sto useleto un anno fa, ma questa me par più bela e se vedi come che el se fato.



Sempre un frosone (Coccothraustes coccothraustes), foto fatta el 24 dicembre là del sincrotrone (el beco ghe cambia color in primavera e el diventa blu, almeno cusì i scrivi).

[Zigolo]

Bel mas'ceto!

Quela de un ano fa, de quel che se vedi, probabilmente xe una femina, che ga i colori sai più smorti.

[babatriestina]

La prima foto se la ga magnada el host de immagini, la seconda xe ciarissima, e mi ve zonto delle vece stampe, nei anni '50 le case de medicinali regalava ai medici stampe, de qualità per i nostri attuali gusti modeste, ma che costituiva comunque dele serie che mio papà ga salvado e po le go conservade anche mi e ve mostro sto useleto disegnado, de qualche album e che go tirado su col scaner

[sono piccolo ma crescero]

La prima foto se la ga magnada el host de immagini...

Ripristinata

[sono piccolo ma crescero]

Mio cognà me ga mandà che pubblico qualche foto de un froson che el ga fato in sti giorni. El sta in periferia de Trieste- El pensa che poderia eser una femina e comunque le foto le me par foto superbe che merita vardar ...

[Zigolo]

Sì, femina, anche se la prima foto ga una dominante rossa che la fa quasi parer un mas'cio.

Comunque sto ano xe pien de frosoni, in tute le parti d'Italia.