Come che vegnivo su per via Nicoletto D'Alessio, nota arteria de scorrimento per liberar la quale i vol far un tunel da via de l'Istria a via Costalunga ma le Bele Arti no ghe lo lasa far
, me ga taià la strada, caminando co la fiaca, un riccio. 
Quando che el ga visto che lo fotografavo, el la ga molada in mezo ala strada (maceta in baso a siniostra) e el se ga sconto soto un'auto.
Soto l'auto iera anche un gato, ma i se ga ignorà e dopo un poco el riccio xe vegnu fora de l'altra parte
el xe andà verso un poco de verde
e el se xe sconto in mezo.
Go un problema: ma se un riccio ve taia la strada, porta pegola come un gato nero
, porta fortuna o xe indiferente ? Vederemo i prosimi giorni; intanto me spiza la gola. 
E adeso qualche notizia in più: no ste ciorveli in casa; intanto no so se se pol e poi un mio conoscente se ne ga ciolto uno che el ga trovà fora del porton; i fioi tante feste, ma no i podeva carezarlo perché el sponzeva, la moglie ghe ga dito o mi o lu, perché el spuzava, ma sopratuto per tuta la note el girava per la casa tegnindo svei tuti. E cusì dopo qualche giorno el lo ga liberà in Boscheto.
Go capì anche perché che se ne vedi tanti rulai dai auti. El caminava cusì pian, ma cusì pian, che el pareva una cagoia.
Qualche nota scientifica: mi lo go sempre ciamà porcospin, ma secondo wikipedia porcospin xe l'istrice, che xe un'altra roba; el suo nome scientifico, me lo ga dito lui mentre che lo fotografavo, xe Erinaceus europaeus e el ghe ga tegnù a sotolinear l'europaeus
, senza confini insoma!
L'unico problema xe in primavera quando se ris'cia de separar la mama dala cuciolada: alora ghe vol star 'tenti!
ma qua semo proprio sula linea de separazion fra Riccio europeo (Erinaceus europaeus) e Riccio orientale (Erinaceus concolor), anzi qua a Trieste gavemo zà l'orientale, che se distingui dal precedente per la parte inferiore sai più ciara, quasi bianca.
