Semo partidi da Ceroglie lungo el sentier 8 che el va su impiradin, sopratuto se confrontà co i altri sentieri del Carso; per un toco el pasa soto l'eletrodoto, ma sicome i ga rasà el bosco soto dei fili, xe el punto in cui se ga un belisimo panorama su tuto el Carso, fin al monte Nanos (fili de l'eletrodoto a parte naturalmente).
L'Ermada porta pesanti i segni de i tragici eventi de sto secolo pasà (penso che l'agetivo tragici ghe vadi ben a tuti, filoitaliani, floasburgici o filosloveni): trincee ormai piene de vegetazion e cartei ruzini, che averti del confin, ne li ricorda.
Speremo, o iludemose, che da adeso in poi se ghe vadi su solo per vardar le Alpi Giulie piene de neve (se ghe fe clic sora i pupoli, ve se doveria verzer le foto grandi che rendi meio la beleza del panorama, sopratuto se le scarighè col Download)
Voltandose de l'altra parte, tra i alberi se vedi anche el mar, ma la foto in controluce no rendeva e no la meto.
Tanto per restar in tema de guere, semo tornai zo per la strada militar fata probabilmente dai austriaci e tegnuda in eficenza da l'esercito italian che gaveva, fin pochi anni fa un posto de oservazion sula cima del monte (e se provavi a fotografar i ve dava per le man). Sula foto de Google maps go segnà in roso la salita e in blu la discesa.
Ah sì, gnanche un useleto (li gavemo sentidi e intravisti, ma gnente foto) o bestie. In compenso gavemo visto i primi crochi.
