Fioi, go deciso de fondar el CLUB DE L’OTAVO. Tuti dirà: Cosa c’entra el non woven con i Triestini nel mondo. Ciancele ga ciapà un colpo de sol, el ga febre. Xe vero che ieri gavevimo una legera alterazion, el termometro mostrava squasi 38 gradi, ma no xe par quel. ‘deso ve conto tuto. Ieri i ga dà ala television do film, tuti e do su Trieste. I ga mostrà le osmize. Xe tanto che no iero in una osmiza che no so più gnanca come che a xe fata. ‘sti disgrasiai i taiava parsuto, lardo bianco con un fil rosa de carne. Con pan de casa e Teran. Teran na Krasu, Kraški Teran. Al confronto, mi stavo magnando una feta de pan brustolà (toast). Macondo xe contento come una Pasqua solo par do sardoni, mi par do fete de parsuto. Se xe anca do sardoni e qualche feta de salame furlan bon, no buto via. Me sacrifico. Po i ga fato veder Piran e el torneo internazional de pandolo. Torneo internazional de pandolo. Bisogna ripeter parola par parola: torneo internazional de pandolo, scandendo le silabe. Co’ iero putel fazeimo anca tornei de pandolo in strada. A Piran iera tante nazioni: taliani, s’ciavi, croati, francesi, inglesi. E i se tunchiava par un punto. Po el zogo, pardon el torneo, ga finì e i iera de novo amizi, co’ l’otavo in man. Co’ l’otavo in man semo sempre tuti d’acordo: Val più un bicer ..... semo sempre tuti amizi. Par quel, inveze dele nazioni unite o disunite, voio fondar el CLUB DE L’OTAVO. Le iscrizioni xe verte. No costa contributo. Al masimo un giro. I ga fato anca veder el molo San Carlo cola bora e le onde, la bora in via Roma e la gente che se guantava par no svolar. Una volta, gavarò ‘vu diese/undise ani, più leger de Martin Muma, in via Navali son svolà un metro, po son rivà a guantarme pal pasaman. Adeso saria più dificile. I svantagi dela adipositas (no so cos’ che xe, ma devi eser qualcosa de bel, parchè i la ga squasi tuti) porta in questo caso vantagi. Resisto ai refoli de bora meo del tran de Opcina. Par coparme de più, i me mostra anca la Portiza, andove che me fazevo ogni tanto un nero, e Cremcafè in Piaza Goldoni: nero con pana! I ga mostrà anca Bolunz (lori i ga dito finoti Va’ Rosandra) e el rifugio (sanduic de crudo e Merlot), anca San Dorligo coi albari de olive. E de novo parsuto. Disgrasiai!
Adeso gavè capì parchè che meto el post in Triestini nel mondo. Auguro ai più giovini de poder caminar ancora qualche volta pa’le nostre strade. Ma cosa c’entra el non woven con i Triestini nel mondo. Sì, xe un poco dificile capir. Solo un genio come mi podeva partorir una frase kako teista. Non woven vol dir non tessuto. Tessuto non tessuto. E mi a veder la Trieste moderna me sento triestin no triestin. Me sento più turista che indigeno. Me manca el bar, el bufè (Cataruza, Fantoma in Cavana), la campagneta, l’aperitivo al Tergesteo, el spaceto in Via Felice Venesian, el musoler in via Cavana. ‘sti film i rovina la pase par qualche setimana. ‘demo ‘vanti.
