Terrapieno de Barcola

[AdlerTS]

Gavè sentido le novità ? A parte el problema già discusso della diossina nell'area del terrapieno, adesso sia l'ex sindaco Cecovini che un ex maresciallo de PS sostien che a Barcola podessi esserghe ancora armi sepolte dai anni 50, i tempi della temuta invasion de Tito.
Va ben che dopo Gladio bisogna aspettarse de tutto, ma spero che i le gabbi anche za portade via.
O forse per questo che inveze de bonificar l'area i voleva subito serar tutto soto un bel metro de calcestruzzo !

[babatriestina]

Qua ( e co digo qua no digo nel forum, digo nei mass media o per lo meno no se specifica sempre ben) se sta fazendo un grosso casin, confondendo due terrapieni , imbunimenti li ciamava i mii veci:
Uno xe quel che va de Barcola in avanti, dove che xe la Pineta atual, che ga fato i Aleati e che dovessi contegnir sconte anche ste armi. Mi me ricordo de ssai picia come che iera la riva prima che i imbunissi. La pineta me par che gabi piantado ancora i Aleati.
El secondo xe quel che va più o meno del Cavalcavia fina prima dela canottiera e del ex Excelsior, che xe stado fato nei ultimi anni, diria dopo el 70 se no me sbaglio, nol xe stado mai averto al publico e i ghe ga butado dentro scovazzoni, e xe là che i ga trovado i materiai inquinanti. Mi, de bona citadina de tradizioni civiche austroungariche, ligia ale leggi, avendo visto che nol xe verto al pubblico, no ghe go mai messo pie ( e adesso son contenta che cussì so che no me go inquinada! )
Quindi stemo atendi che co i disi El terapien de Barcola, andassi diti se quel prima o quel dopo Barcola
La storia dele armi, no xe una gran novità se no per el posto: se saveva che nel 53 Tito fazeva la vose grossa minaciando de far un colpo de man su Trieste ( discorso fato nel 53 a ex Sambasso-Okroglica -vizin Gorizia) forsi iera solo che un bluff per arivar ala spartizion del TLT senza discussioni e rosigando ancora un tochetin de zona A? e de l'Italia i gaveva mandado armi, De Castro conta nele Memorie di un novantenne che un per de anni dopo i ga trovado un deposito murado in stazion central.

[palpio]

La pineta me par che gabi piantado ancora i Aleati.

Me par che l'imbunimento xe scominzia' qualche anno dopo che i iera andai via, forsi nel '57 o 58.

[babatriestina]

Iera prima che andassi mi a scola, e mi go cominciado scola nel 54, e po me ricordo che i mii diseva Un bel regalo che ne ga fato i Aleati, forsi i pini i li ga piantadi dopo...
ara ti, e no savessi dove zercar per controlar..

[palpio]

Iera prima che andassi mi a scola, e mi go cominciado scola nel 54, e po me ricordo che i mii diseva Un bel regalo che ne ga fato i Aleati, forsi i pini i li ga piantadi dopo...
ara ti, e no savessi dove zercar per controlar..

Anca mi no so dove zercar, a meno de trovar foto de quel periodo.
Pensandoghe ben, probabilmente te ga razon ti per l'imbunimento: i lavori ga continua' per anni e i primi pini xe stadi piantadi nei anni che digo mi...

[babatriestina]

I me disi che quel dela pineta ga cominciado soto i aleati ma xe stado finido nel 64.
Comunque i continua a far confusion sul Piccolo fra i due terrapieni, perchè nel 53 no i podeva scarigar armi in quel che xe stado imbunido dopo el 70.. forsi i confondi cole ferovie perchè nel 54 i ga trovado le armi murade in stazion, ma lo ga contado De Castro tante volte, anca sul Piccolo.. me sa che i fa un poco de rivelazioni sensazionali ..
me sa che i scrivi sta roba per insempiar la gente.
Cussì i pensa ale armi e i se dimentica dela diossina e altri sporchezzi vari. Le armi, inquina?

[AdlerTS]

Le armi, inquina?

Forse no, ma se s'ciopa !?

[babatriestina]

Le armi, inquina?

Forse no, ma se s'ciopa !?

dipendi se oltre che ale armi ghe xe vizin anca le munizioni! armi scarighe no fa ssai mal..

[palpio]

Se no xe una bomba de aereo, no xe problema.......

[babatriestina]

Ogi sul Piccolo xe un altro, che disi che el terapien dela pineta ( no quel dela diossina) xe stado fato fin al 53 cole macerie dei bombardamenti dela guera, ga fato i Aleati cussì i ga trovado dove disbratar sta roba e dar lavor ai disoccupai triestini.
per lu le armi nel 53 iera tropo tardi per el terapien dela pineta, che iera za quasi tuto imbunido, e le gavessi dovudo esser vizin dela stazion, al Silos, che saveva Spaccini che quela volta lavorava ale Ferovie. Lu disi che i Aleati nel 53 gaveva dito : se Tito attacca e occupa Trieste, noi no ve difendemo ma se ritiremo ( quel che po diseva Cossiga dei italiani, dopo..), ve demo le armi per difenderve un poco e dopo contratachemo! Se xe vero (perchè qua tuti parla e straparla e el Piccolo riporta tuto- ogni giorno una- bisogna pur vender) me sa che qua nissun voleva difenderne -o meo nissun voleva risciar una terza guera mondial per Trieste!

[ffdt]

[...] me sa che qua nissun voleva difenderne [...]

Sempre che sia vero tuto cuel che i conta in giro xe anche de dir che Trieste no la iera sai ben difendibile da un ataco che 'l vignisi de la yugo ... i ne iera intorno per 3/4 e tuto cuel che se podeva far per tignir la cita` iera de doprar el model de Stalingrado, come che za voleva far i tedeschi ... te impinisi le strade de gente co' un s'ciopo in man che i ga ordine de tirarghe a tuto cuel che se movi senza controlar chi che i xe ... fora che cuel cos' te vol far per una cita` che la xe in t'un cul-de-sac come la nostra?

E difati tuto cuel che ga fato l'italia per difender Trieste xe stado de impinirla de militari de leva ... no i ga miga meso trupe scelte ... iera tuto gente sacrificbile ... adatisimi a vignir butadi per le strade e lasadi la` a rangiarse e a crearghe problemi a 'l nemico per chi sa cuanto tempo.

Ciau

Franco

[AdlerTS]

Altra nova: adesso i vol far una barriera de 11 km dal Scalo Legnami a Muggia per evitar che metalli pesanti ed idrocarburi che i ga trovado in ste zone finissi in mar

[Tirabaralla]

No conosso ben la zona ma me iero sempre chiesta come se fa a tociarse in mar diretamente de fronte ad un industria, come sucedi in zerte zoone de Mugia...

[ffdt]

[...] come se fa a tociarse in mar diretamente de fronte ad un industria [...]

A mi dime ... che de picio me ricordo che i mii noni (de parte de papa`) i me portava a 'l bagno la` de le noghere ... ;-D ... iero picio e dopo no i me ga portado piu`, pero` me ricordo che per andar in acua schivavo le mace de petrolio che iera su le piere ... gavero` gaveudo un 4 ani, mi calcolo ...

Ancora adeso c'o paso per cuela strada me torna cuel ricordo e me fa senso ;-D ;-D ;-D ;-D ;-D ;-D ;-D ;-D ;-D

Ciau

Franco

[Tirabaralla]

I me ga portà anca a mi nei dintorni...me ricordo che el mar iera limpido..ma che impresion vederse ste ciminiere là davanti... ma cmq se trata de mare balneabile.

[babatriestina]

Mah, una volta no se gnanca discuteva de "balneabile".
Papà me portava al bagno el Excelsior che par che iera un scarigo de fogne no lontan, perchè el diseva che cussì me fazzo i anticorpi, una specie de mitridatizzazion