Babatriestina ga scrito in 'Salotin/Galli e Celti':
ma adesso spetemo la storia dela tua manualità, za gavemo sentido dei tui presepi.. che mi inveze per manualità son una disgrazia. Solo dovemo continuar de un'altra parte, che propio cola storia de Trieste fin ai Romani no ghe semo propio
Zerco de contentarte e meto un pochi de campioni de robete che go fato, tanto per far veder che no me invento.
Lassemo perder i lavori più grossi de manutenzion de casa, ma consideremo solo quel che pol esser un divertimento.
Mi provavo a far tuto quel che me passava per la testa: dopo fato, indipendentemente dal risultato passavo a altro e quel 'passatempo' iera evaso , finì e no lo praticavo più.
Go provà a piturar: go fato 3 quadreti con sogeti ciolti da foto de libri e po' basta, no ghe ne go fati altri.
Questo xè a tempera fermada dopo cola laca: una baita verso le Tofane.
Dimensioni: circa 20x15 cm.
El secondo xè a oio. Dovessi esser, se me ricordo ben, San Cassiano
Dinesioni: circa 30x40
El terzo xe de novo a tempera. Xèun rustico in Val d?Aosta
Dimensioni: circa 20x21
Modellismo: El plastico feroviario no esisti più per ragioni de spazioe de fliche. Questa xè una vecia Rolls Royce dela Poker: iera de meter insieme circa 3.300 tochi dopo gaver piturà quel che iera de piturar. Notè che i ragi dele rode iera de montarli uno a uno dopo averghe impirà un minuscolo tochetin che rapresentava i tendiragio.
Un particolar del motor
Go provà a far velieri. Tuto de piturar fin nei minimi particolari, ma el scafo xè de plastica. Xè l'amiraglia dela flota francese (me par de Luigi 16°) la Soleil Royale
Go provà anche mi a far, una volta, un veliero, ma più facile del tuo. Lo go messo in mostra sulla libreria in ingresso, ma una sera de inverno el xe naufragà colpa una balonada de mio fio picio. Adesso poderia far un diorama co la barca e i alberi tutti roti. Co'lo ga roto, no me son rabià perché volevo che el continuasi a giogar col balon.
Dopo no go provà a far più niente; me se ga esaurì la vena. Per quanto riguarda i quadri ... so disegnar solo el mus visto per de drio. Insomma "cicio no xe per barca!"
La prua: qua se vedi ben quanti 'spaghi' che xè de meter
Un sciabecco
Dopo quel che gavè visto vien de pensar che no son bon de far scafi in legno. Un campion no finì de un scafo in legno.
Questa xè la sezion de prua del Victory, cominciada e mai finida.
Xè un mio bruto difeto: se, per un qualsuasi motivo, me toca interomper per più tempo el lavor che stago fazendo, no lo ciapo più in man, come in sto caso. Notè che le fughe tra i listei de nose no ga nè stuco nè gnente altro.
Una mensola rustica per la veranda fata con tochi de rami del noser che go abatù diversi ani fa
Go provà a far qualcossa cola saldatrice a arco, la xè assai vecia e ancora a corente alternada. Ve mostro una coppia de mensole fate per tignir su una scansia bastanza grande che gaveva de soportar un certo peso. Sui suporti obliqui ghe go messo dei ganzi per impicar cichere o altro anche solo come decorazion.
Per nona picia ghe preparavo i canovacci in tela penelope per ricamar a !/2 punto; ghe ne go fati alcune decine. I pupoli xè copiai de giornai specializai.
A un erto punto ela la se ga stufà de sto hobby e i canovaci xè rimasti là in armeron in alcune cartele.
Perdindirindina!!!
son a bocca averta, che mi ste robe no so far gnanca de lontan... e la mia manualità xe orenda, mi go sempre dito che per zerte robe ghe vol un omo in casa!
però, se la tua signora xe stufa, e che inveze che a piccolo punto ( che no so far) se pol far a punto crose, i fioreti ricamar li poderia anche mi...
mi me piaseva tanto ricamar, e gavevo fatto un per de lenzioi per i mii genitori con tanti nontiscordardime. Po go provado a copiar un'intimela ricamada bianco su bianco de mia prozia Catina, go confrontado el mio lavor col suo .. e me go demoralizzado.
"mi credo che i scrivi sta roba per insempiar la gente" ( La Cittadella)
Un'altra roba che xè pochissimi far xè disegni col fil de rame. Quel che vedè no xè disegnà cola chiina o altro, ma el xè fato de fil de rame de 1,5 mm. tuto saldà a stagno tochetin per tochetin e dopo impicà sul muro.
Eco un altro campion. Alcuni altri xè andai distruti e diversi xè stai regalai.
E per ultimo un QUIZ
Quasta xè l'arte del ricupero.
Go rivestì in sto modo due paredi dela cusina; ve mostro un campion: con cossa go fato sto rivestimento? No steme dir de legno perchè se vedi e xè scontado.
Come che gavè visto no fazo solo foto, in cambio, rispeto a Voi son un ignoranton semianalfabeta. Me consolo almeno un poco pensando: una roba o l'altra, tuto no posso, no son in grado.
Delle navi go dito, bellissimi quei col fil de rame (ma e le rece nere, el naso, el nero de i oci come i xe fati?).
Per le perline della cusina no go idea. Qualche volta la righeta bianca me par che gabi le vene della parte scura che continua, come se fussi solo color diverso, e altre volte me par no, come se fussi legni diversi, ma de dove le vegni no so proprio.
Però un'idea me xe vegnù mentre che scrivo: forsi te ga ciolto de note i assi delle panchine de legno dei giardini?
Per el rivestimento dela cusina credo te gabi usado roba de recupero. La magior parte dele liste de legno xe sotili o almeno cusì par. Me vigniria de dir el legno dele casete de 'naranze, ma quel che te ga usado el me par più groso e de qualità migliore (anche se te lo gaverà piturado). E poi quel xe in genere legno dolce, mentre qua certi tochi i par de legno duro.
Altre robe de recupero? Boh... tochi de barca? de mobili? parcheti diria de no... el toco più a destra sembra anche de legno più pregiado, mentre el primo toco largo da sinistra el sembra de legno meno nobile... no so... me arendo.
sono piccolo ma crescero ha scritto: quei col fil de rame (ma e le rece nere, el naso, el nero de i oci come i xe fati?)
No xè dificile: finido el lavor col fil de rame se ciol un toco de cartonzin, se ghe disegna sora, doprando come guida el pupolo, le parti de far diventar nere, se lo ritaia dela misura. Fato questo se meti i tochi de cartonzin ritaiai dentro el fil de rame e se ghe passa tuti i orli cole resine epossidiche de modo che el carton se incoli sul fil e contemporaneamente tapi eventuali sfese. Per evitar che el carton sorbi più color del resto ghe dago una passada de resina anche a tuta la superficie, co xè suto se pitura tuto insieme (mi de nero opaco, ma se poderia far col color che se preferissi; per esempio la ligua rossa e cussì avanti). Xè più dificile spiegar che far.
Prima ghe go risposto a 'crescerò' per le rece e i oci adesso ve conto come e cossa sul quiz del rivestimanto del muro dela cusina.
Nela casa dove che abitava mio cognà, qualcossa più de 35 ani fà, i ga deciso de sostituir tuti i rolè de legno con quei de plastica. In cortil i ga messo tuti sti rodoli per portar in discarica. Alcuni iera bastanza discreti, altri iera proprio in disarmo e più de qualchedun ga ciolto sti legni per far fogo in stua. Mi con mio cognà gavemo scielto un pochi de rodoli fra i meno rovinai e me li son portai a casa.
Smontai tuti completamente e scartade le tavolete più rovinade, quele bone le go passade tute in due passagi con una picia spiana eletrica per netarli e cavar via la vecia vernise per portarli a legno vivo se no la tinta no ciapava in modo suficientemente uniforme. Fato questo li go tinti col paiz e per far la righeta bianca li go passai, due si e uno no per po' alternarli sul muro, sula sega circolare che cucava fora del banco pena pena quel tanto che ocoreva per cavar la tinta e lassar cussì quela righeta ciara. Dopo li go montai normalmente come perline e ghe go dà una o due man de turapori nitro.
El legno poderia esser pino dela Norvegia, almeno quel se usava de solito per i rolè.
No c'entra con sto lavor ma Ve voio contar sta roba lostesso, xè fora tema ma riguarda ugualmente i rolè.
Portai a casa sti rodoli, li go acatastai in giardin e logicamente in centro iera el buso. Quela volta gavevimo due soreline cagnete de cacia bastardine forsi de pointer.
Questa xè la premessa per contave la colaborazion tra le due bestiuzze.
Ben, lore ga nasà o ga visto che dentro el buso dei rodoli se gaveva sconto una pantigana, ghe ne girava e qua ghe ne gira ancora diverse: alora una se ga messo a puntar davanti ai busi dei rodoli e l'altra xè montada sula catasta e se ga messo a saltar fin che la pantigana xè scampade fora e la prima la begada e 'eliminada'.
OT: Go ancora un esempio de colaborazion tra ste due cagnete che voio contarve (se i MOD vol spostar sta roba fora tema che i meti pur de un'altra parte).
Se pol intitolar el braccio e la mente:
Una, la nera Cindy, iera più mingherlina, delicata e intraprendente ma de un'inteligenza super, l'altra, Daisy, iera più, come dir, un buldozer, anche se no xè el termine più appropriado. Ghe xè sta un periodo che le voleva scampar fora del giardin per andar a torziolon. Trovai i punti de dove che le filava in contro seravimo; alora le ga pensà de scavar soto la rede de recinzion che in certi punti soto el livel del teren iera marza; come che la nera ga fato a intuir mi no go ancora capì.
Per scampar cossa le fezeva? Cindy caminava lungo la rede e con una zatina la sgrafava in qua e i là el teren fin che la trovava un posto che ghe comodava, in quel posto la dava do, tre gratade e la se tirava de parte; rivava Daisy e la se meteva a scavar de bona lena in quel punto fin che la rivava a crear un passagio e le filava tute due nel giardin vizin de dove che iera facile andar in strada. Quel che xè una roba incredibile xè come la bestia trovava el punto giusto per indicarghe ala sorela dove scavar.
Le xè sempre tornade a casa, ma senza scavar o far fadighe: semplicemente co le iera davanti al cancel le tacava a baiar in un modo un poco diverso del solito per ciamarne e verzerghe.
Xè un romanzo, ma me pareva bastanza cocolo per portarve via un fià de tempo per leger ste aventure canine, d'altro canto semo in salotin e el xè fato aposta per le ciacole.
ciao
sum culex
P.S.: Co ierimo via per un pochi de giorni le cagnete le curava un nostro vicino. Se vedi che le baiava più del solito o chissà cossa altro, fato sta che i le ga invelenade: una se ga salvà (la rossa, Daisy) a son de flebo, ma la nera (Cindy) che iera più delicata xè morta in un per de ore.
sum culex ha scritto:i le ga invelenade: una se ga salvà (la rossa, Daisy) a son de flebo, ma la nera (Cindy) che iera più delicata xè morta in un per de ore.
Mi ghe daria velen a chi lo ga fato, proprio senza alcun rimorso.
gavevo sospettado rolè, ma no arivavo a capir perchè alcuni gaveva una stricca ciara e altri no
per la cagnetta, posso solo dir che la cativeria umana xe tremenda. come se pol invelenar una bestiuzza cussì solo perchè per qualche giorno la te dà fastidio? però mi son sempre de l'idea che le bestie de casa, più se se le tien strente e meo xe: per i gatti, mi son una sostegnitrice dela teoria Gatti dentro! per i cani no se pol, ma uscite regolamentade. Ma no go mai pensado de cior un can, anche se ghe xe stai dei cani che frequentava casa mia che per mi de picia iera più amici, che cani!
"mi credo che i scrivi sta roba per insempiar la gente" ( La Cittadella)
... a proprio ris'cio e pericolo ;-D
