PENSIERINI DI UN OTUAGENARIO

[Piereto]

No te legerà mai sul libro de storia che l'italia xe stada fata da la alta borghesia de tanti principati regni e città diverse, che per una volta i ga pensà in grande. Più grande xe el stato, più xe spazio per tuti e se pol far novi afari. Visto che ogi semo in tanti e che el stato xe in man de un manipolo , la gente pensa che tornar all'antico no sia mal. Pici stati, sarà anche co pochi afari, ma le legi sarà fate de chi che xe del posto, e questo vol dir risover i problemi . In più se pol sempre far parte de una futura federazione europea. Daltro canto ti te fa parte ciancele de una federativa, l'austria xe una altra federativa, i svizzeri anche , e sembra a noi che semo de fora, che la de ti no sia poi cusì mal. La Sassonia decidi una legge che no ghe va ben a la Baviera , ma i sassoni xe contenti. Prova a pensar inveze in Italia. I veneti vol una legge e a Roma i ghe disi de no, che no se pol che xe anticostituzionale. Saria de far un lavoreto a Treviso, e inveze i bori va a Catania. Xe settanta ani che una parte del paese vien frenada. Anche Trieste gavesi de dir la sua. Pensa che
cinque giorni fa i ga aprovà el decreto attuativo del porto franco triestin. EL IERA FERMO A ROMA DA SESSANTA ANNI.

[Ciancele]

Fioi mii, scolteme a mi. No ‘ste diventar veci veceti. Lo digo par esperienza. Se perdi colpi (momenti di aberrazione mentale) e vien inamente monade che no se taca gnanca pai muri (fesserie inimmaginabili). Ieri la putela me ciama de vignir a veder la television. I dava de un cogo talian che fazeva piati con zuchini, pomidori, peveroni e melanzane. Go tentà de spiegarghe che ‘sta roba la fazo anca mi. Solo che no son cogo talian. In Francia i la ciama ratatouille. Par gnoco matschepampe (trad.: paston?). In Italia caponata. Par triestin no so. Forsi gomitadura de gato. Xe nel vocabolarieto. Solo come contorno. De secondo i ga de tuto, anca BBQ de vermi. Ad alto valore proteico. Go dovesto trovarghe in internet anca la lista coi prezi de ‘sto ristorante. Prezi basi, ma come in Italia el contorno xe a parte. ‘lora xe facile far prezi basi. Cusina tipica sua, el disi. Stanote me go insognà che volevo verzer anca mi un ristorante con cusina tipica mia. Pensando ala carta me xe vignù inamente el prete che se lamentava de dover magnar ogni giorno galine roste. Go deciso ‘lora de cambiar el mio atavar in Bertoldo: solo robe semplici e de facile digestion tipo pasta e fasoi e giardineti. Xe più facile e se fa più prima a leger la carta. Par fortuna me go sveià e el mondo ga un problema de meno.

[babatriestina]

zuchini o zuchete?

[Ciancele]

zuchini o zuchete?

Scusa, scusa. Naturalmente zuchete.

[Ciancele]

Oggi xe el 20 luglio. Un mio amico ga el compleano. No quel che credè voi. Quel xe morto. ‘sto mio amico xe vivo e el fa 85. L’altro ano gavemo parlà de quei che xe nati in lulio. Ogi parlaremo dele robe che xe sucese in lulio. I film de Ton Mics (Tom Mix) e de Chenmainer (Ken Maynard) ne contava che el 4 xe stada la dichiarazion de indipendenza in America. El 14 iera la presa dela pastilia in Francia. In lulio iera anca el sbarco sula luna e la rivoluzion rusa. Tute robe che ga cambià el mondo. El 5 lulio 1935 iera la mia cresima.

[babatriestina]

el compleanno mio, quel de mio nipote e de una mia gata... go volesto andar una volta a Parigi per el 14 luglio ( podè veder le foto in forum). Come ch e me ga dito mio cugin, el modo meo per veder la sfilata xe in television. Però iera bei i foghi de sera soto la Tore Aifel ( come che disevo de picia che savevo tedesco ma no francese). Po però per tornar in albergo go dovudo far una caminada e una ressa sule poche linee de metro avete..

[oli1939]

bon compleanno Luciano! Auguri di ogni bene...un abbraccio!

[Ciancele]

Bon compleanno Luciano! Auguri di ogni bene...un abbraccio!

Oli mia, te ga de novo pegola. No go compleani in lulio. In lulio gavevo la cresima. Ma ogni tanto i me cresimava (mi picchiavano). Tute le bele cose sono tre. La terza volta, in otobre, te gavarà forsi più suceso.

[oli1939]

ahah scusa...se vedi che no son piu tanto attenta...a risentirci!

[Ciancele]

Domani xe la fine del mondo. Se sa a che ora? Dovaria 'ndar a crompar de bever. No aqua. Ma merita? Tuti pensieri che fa diventar mati. Sicome che no i ga dito cosa che se pol far par schivar, vol dir che xe veramente la fine. Mi me ricordo che sul Topolino de tantisimi ani fa iera un profesor che ga sbarà un colpo de canon e el spostamento ga fato cambiar direzion ala tera e la se ga salvà. Se domani sentì un colpo, xe sta 'sto canon. E saremo de novo salvi

[Ciancele]

Bongiorno, bongiorno. Qua xe festa, festa nazionale. L’anniversario dela riunion dele due Germanie. Stago vardando fora dela finestra. Fa un poco de sol. No xe cambià gnente e me domando se xe za vignuda la fine del mondo sensa che se acorzemo. Xe diese giorni che la speto. Me par de leger la balada del prode Anselmo. Pasa un giorno pasa l’altro e no vien la fin del mondo. O la storia de Giovanino che gridava al lupo. Baba Triestina diria: Mi credo che i conta ‘ste robe par insempiar la gente. Baba Triestina: Condivido. Mi piace.

[oli1939]

Bisogna esser sempre pronti perchè no xe sta dada una data sicura...le vergini xe sempre pronte con la lampada acesa...no se sa mai. Xe meio tenir sempre a portada de man 1 litro de oio.....

[Ciancele]

Bisogna esser sempre pronti perchè no xe sta dada una data sicura...le vergini xe sempre pronte con la lampada acesa (impizada) ...no se sa mai. Xe meio tenir sempre a portada de man 1 litro de oio.....

Cara Oli1939, mi no son vergine e no go oio. Go un litro in riserva, ma de una altra roba, che brusa anca ela se ghe ghe dà fogo. Comunque par tuto vien una fine. Gnanca Roma iera eterna. Te te ricordi el 16 lulio 2013? Quel giorno go scrito el primo mesagio con i primi pensierini de un otuagenario. Nel fratempo xe 192 mesagi e ogi scrivo l’ultimo. Un grasie a tuti quei che ga risposto e i ga dito la sua. Tuti, otuagenari e no, pol però continuar, se i vol. Aguri, aguri.

[Nona Picia]

Come mai te scrivi l'ultimo?

[sono piccolo ma crescero]

Ciancele, per favor, dine che te ne ga ciolto in giro!

[Nona Picia]

Come mai te scrivi l'ultimo?

Miga te sta mal?

[babatriestina]

el ultimo perchè te cominci una nova serie?

[Ciancele]

el ultimo perchè te cominci una nova serie?

Baba mia, te dovaria 'ndar a far l'indovina. Come te sa? te ga butà le carte?

[oli1939]

el titolo sara'.... pensierini de un mulo triestin?

[Ciancele]

el titolo sara'.... pensierini de un mulo triestin?

No.