PENSIERINI DI UN OTUAGENARIO

[Ciancele]

scavi beletristici

Go dovù andar sul vocabolario treccani per saver cosa che vol dir. El Devoto Oli no lo riporta. El Garzanti sì.

Me la go inventada. No savevo che la esistesi. In tedesco xe el vocabolo Belletristik. Xe un mio plagio.

[Ciancele]

Ieri sera go magnà un mucio de fasoi e i me devi gaver pesà sul stomigo. Forsi par quel me go insognà de ombrele. Me go insognà che i me diseva che no se devi dir cabibo, s’ciavo, furlan e teceta. Che xe una ofesa. Mi ribatevo che xe una ofesa solo se se disi: Quel m... de cabibo, de lanfur. Altrimenti xe la denominazion de una etnia. Un mio amico me ga dito ani fa che el se sposa con una cabibuza. Che saria el vezegiativo de cabiba. Se xe una ofesa dirghe s’ciavo a un, me go imaginà de Sipione l’africano. No so se el se ga ofeso parchè i ghe ga dito africano. Forsi i ghe gavarà dito Sipion grone. In latin Scipio gerni. Par fortuna me go sveià prima che i me tunchi. Iero tuto una aqua.

[babatriestina]

te vedi cossa che vol dir sognarse de ombrele vece?
sa come che xe... adesso qua per qualchedun va sai de moda sparlar dei lianta...
po Scipione l'Africa la gaveva conquistada, inveze Scipione Emiliano no gaveva conquistado el Emilia ma iera un Emilio ( che no iera un Milič resentado) adottado dei Scipioni per no perder el cognome.
E te pensi che noi cantavimo e balavimo Siamo i Watussi siamo i Watussi gli altissimi negri.. che no solo nissun se scandalizava ( xe vegnuda una moda del America anca quel) ma i poveri Watussi iera i Tutsi che dopo i ga fato un mezo genocidio. Anche genocidio qualche volta se pol dir e qualche volta no.

[Piereto]

Se sai cocoli, e ve volevo informar che da ieri podè dirghe a un che el xe omosessuale perchè la corte costituzionale italiana gà stabilì che no xe una offesa. Laso a voi el commento. Xe delle osservazioni scentifiche che va espresse con dele parole, mentre intentar un processo alle parole xe una forma de fanatismo ideologico. Chissà perchè me xe vignudi in mente i padri pellegrini calvinisti fanatici ciesoti, de cui i inglesi se gà liberà mandandoli in te la colonia americana.

[Ciancele]

Ciao Piereto e bongiorno. Go l’impresion che qualche volta se ciapa tropo sul serio le monade che scrivo. La parola lianta no la go mai sentida. Comunque no se pol, e no se devi, sparlar de nisun paese. Anca l’Italia xe un paese e un paese pol eser solo bel o bruto. Ma mai cativo. Mi dei taliani in Italia no poso dir che ben. Specialmente a Napoli, sì, in Cabibia, go trovà tanta gente bona che me ga ‘iutà. Anzi, solo gente bona. Però no se se devi risentir se se disi la verità su certe persone. El paese no centra. Purtropo xe le persone che fa el paese. Se se vien ciolti in giro, bisogna pensar che anca noi ciolemo in giro i altri. Ma anca qua andemo tropo sul serio. Se digo cabibo, s’ciavo, lanfur ecc. no xe ofesa, xe el dialeto come che lo parlavo mi setanta/otanta ani fa. Se se pensa che i inglesi, ma no tuti, a ogni parola i meti framezo quela che comincia cola efe. I jugoslavi in genere, insoma i s’ciavi, iera una parola una bestema. Ma no se ofendeva nisun. Anca qua chi che ruba xe un ladro. Ma se no te ga prove che el ga lumà lu, no te ghe devi dir ladro. Se te lo ciapi però sul fato, dir presumibile reo xe ridicolo. Ma paese che vai usanze che trovi. Far guera, in senso lato, solo par questo xe ridicolo.

[Ciancele]

Stavo vardando una roba e go visto che gavemo una sezion francese, una gnoca, una spagnola e teceta. Quel che no gavemo xe una sezion taliana. So che Trieste xe taliana. Italianissima, come che ne conta un ogni tanto. Probabilmente el se disi: Repetita juvant. Ma nel nostro forum xe un o do che capisi poco talian. Pecà, parchè i podaria imparar tante robe. Potrebbero, ad esempio, apprendere di un pezzo musicale, un musical, in cui si narra delle vicissitudini di una giovane imprenditrice parentina che impiantò un centro commerciale per la distribuzione di generi alimentari. In esso era possibile acquistare una miriade di prodotti, con rare eccezioni. Ad esempio, lo stoccafisso.
Ma dopo go pensà che forsi i me ziga e cusì laso come che xe.

[oli1939]

bongiorno a tutti, caro Ciancele stoccafisso stocco baccala' nasello ecc quanti nomi per sto baccala' xe una roba che piasi e se lo fa in tanti modi ma sempre bon el xe..mi me piasi col sugo e polenta...

[Piereto]

Sta mula de parenzo che no vendeva bacalà.... solo per una question de metrica e figurazion ritmica musical : Fo -ra- chel ba -a -ca -là, per-chè non ma- a - mi più. E co rente el vocabolarieto po' un talian rivasi ben a comprendere.

[babatriestina]

Stavo vardando una roba e go visto che gavemo una sezion francese, una gnoca, una spagnola e teceta. Quel che no gavemo xe una sezion taliana. So che Trieste xe taliana. Italianissima, come che ne conta un ogni tanto. Probabilmente el se disi: Repetita juvant. Ma nel nostro forum xe un o do che capisi poco talian. Pecà, parchè i podaria imparar tante robe

no solo Trieste xe in Italia ( anche se qualchedun no ghe credi e spera cussì d e no pagar tasse) . Anche el forum xe talian perchè nol xe solo per i triestini, che de solito el italian lo sa anche perchè i varda la television italiana.Ma anche perchè el vol far conosser Trieste a chi che triestin no xe. E no xe obligo de bilinguismo triestin/ italian. Fin che femo quatro ciacole le femo fra de noi che za no parlemo tuti el stesso triestin. Ma co volemo dir qualcossa che interessi tuti e no solo le nostre ciacole de comari, scrivemo in lingua. Se te vol podemo meter una sezion che sia solo che obligatorio scriver in lingua...
E Olivia za sul nasello geh xe discussioni perchè qualchedun disi che xe merluzeto che no xe bacalà altri inveze disi che xe molo.
Perchè la mula no vendeva propio bacalà no go mai capido.. in fondo la podeva vender tuto " fora-che -ti-rami sù!" o cambiando merce " fora che canociai"...

[oli1939]

olivia se impegna poco e per questo la xe imprecisa ...ma credo che el ceppo sia el stesso

[Piereto]

La mula de parenzo no vendeva bacalà, perchè i istriani gà tanto pese che no coreva comprar el pese foresto.

[Ciancele]

La mula de parenzo no vendeva bacalà, perchè i istriani gà tanto pese che no coreva comprar el pese foresto.

L'unica roba xe domandarghe. Cos' te par?

[Ciancele]

Italia, un paese di eroi, pensatori e poeti. Auch Deutschland ist ein Land der Denker und Dichter. Anca la Germania xe un paese di pensatori e poeti. Pensatori forsi proprio no, se penso a cosa che i combina sensa pensar. Poeti? No so. Co’ de muli ghe diseimo a un: Te son poeta, lu rispondeva: Poeta no son e rime no fazo, e ti te son testa de can de cacia.
Ogni tanto me conto una barzeleta che non savevo e rido. L’ultima xe stada quela de quel mato che va del dotor e ghe disi che el voleva la castrazion. El dotor ghe la fa e po el ghe domanda parchè che el se ga fato far la castrazion. El mato ghe conta e el dotor ghe disi: Forsi la intendeva circoncision? El mato fa: Eco la parola che zercavo. No so parchè, ma me xe vignù inamente che i vol far l’Europa unificata: No so se i ciol una norma DIN o ISO. Forsi i intendeva l’Europa unita. Anca qua go pensà che forsi i se devi gaver dito: Eco la parola che zercaimo. E i malintesi no xe solo qua: I parla dela libertà de transito. I se ga dito: Libertà de transito. Andemo e vignimo quando che volemo. I inglesi xe ‘ndai: Brexit e i turchi vol vignir: Turchensit. Ogi come ogi no xe pericolo che se i turchi ga libertà de transito la Turchia resti svoda. I disi che qualche turco resterà sicuro. Qualche zoto. Ma i ga profughi dela Siria e de altri paesi.
Iera un, me par zio Nito, che diseva un popolo, una lingua. Se vedi ch’el no xe mai stado intela Basa. Ma anca i altri fa o disi robe sensa pensar. Popolo di pensatori. Sicuramente i pensa. Par esempio, come impignirse le scarsele. Stati Uniti de America = Stati Uniti de Europa. I stati uniti de Europa xe tanto uniti che ognidun vol far par conto suo. Qualsiasi monada devi vignir tradota nela lingua del paese. Ma no tuti quei che fa le traduzioni xe cianceli. Forsi par questo i se capisi cusì ben. Basta veder cosa che i fa.
Co’ no se saveva cosa o come far, una volta se andava a cior consilio dei veci. I anziani. Anca ogi gavemo qualcosa de simile, el senato. Go leto l’etimologia dela parola. Deriva del latin senilis che saria senile. Per i veci veceti che no sa rangiarse gavemo qua un uficio de asistenza. Tuti impiegati giovini. Zac zac. Me go dito che forsi lori me pol ‘iutar intele mie dificoltà. Son ‘ndà là, i me ga scoltà e i me ga dado un consilio par come risolver i mii problemi. ‘deso ve laso e vado a far quel che i me ga consilià, vado a giogar ala sisal. Ve contarò. Steme ben.

[Ciancele]

Legendo i post dopo el mio me go dà ragion. I me ga zigà. Quel dela sezion taliana iera naturalmente un witz. Mi volevo solo meter la mia traduzion par talian dela mula de Parenzo. Go sentì dir che i ga tradoto el tran de Opcina. Parchè no la mula de Parenzo? Se capisi che se volemo che tuti capisi bisogna scriver par talian. Ma no credo che sia vitale capir quel che scrivo, par quel scrivo in dialeto. Xe una specie de alenamento. Mi no parlo mai de politica, parchè se fa sempre barufa. Se fa barufa quando che no se parla. Figuremose quando che se parla. Confermo che Trieste si trova in Italia ed è quindi una città italiana. Cusì go fato contenti tuti e me dispiasi se qualchedun no se contenta. Po devo ‘ver comincià a perder colpi (a divagare), parchè me xe vignù de pensar un poco a tuta la storia de Trieste. De quel che go capì, Trieste no xe stada fondada dai Romani. Qualchedun iera za là e i Romani lo ga scazà via. I disi che iera i Iliri. Un popolo slavo? Anca i gnochi ga scazà via slavi nel teritorio dela Slesia e dela Prusia oriental. Nel corso del tempo semo stai soto i Longobardi, soto Venesia, Francia, Austria, Germania. Per quaranta giorni ierimo parfina soto Tito. Adeso semo soto l’Italia. Vedaremo soto de chi che saremo dopo la prosima guera. Se vinzi i americani no cambia gnente. Semo za mezi americani. Se vinzi i rusi se ciamaremo forsi de novo Trst. Se vinzi i Cinciuncian se ciamaremo forsi Tri Est Cian. No so. Cantemo ‘lora un’altra canzoneta triestina: Ne go pasadi tanti, te paserà anca ti. El mio, forsi el nostro, problema xe quel de tute le cità de confin. Cosa semo? Che lingua se parla? In cità se parla solo talian. Ma za a Opcina, a pochi chilometri de piaza Granda, se parla slavo. Co’ digo che i parla slavo, i me ziga: se disi sloven. Pol darse, però noi gavemo sempre dito slavo. Per antonomasia se intendeva naturalmente sloveno. Ma se diseva slavo. E slavi, in senso lato, iera i s’ciavi. O i vis’cia, se se vol. Dir che Trieste ogi xe una cità taliana xe vero, ma dir che xe sempre stada taliana me par un poco esagerado. Vedi sopra.

PS (1) par Oli39: No sta bazilar. Magna quel che te vol e ciamilo come te vol. Pensa che in guera mio papà no diseva pan, ma stuco. Iera dificile distinguer tra pan e stuco, ma i ne lo vendeva come pan, co’la tesera.

PS (2) pai signori aministratori: So che la polemica no xe permesa. ‘lora se quel che scrivo xe polemica, prego de scancelar tuto e domando scusa.

[babatriestina]

De quel che go capì, Trieste no xe stada fondada dai Romani. Qualchedun iera za là e i Romani lo ga scazà via. I disi che iera i Iliri. Un popolo slavo? Anca i gnochi ga scazà via slavi nel teritorio dela Slesia e dela Prusia oriental.

prova a zercar illiri sul forum e te troverà parecchi informazioni. Una parola che vol dir tante robe a seconda del periodo che se la dopra ( e che qualchedun fa aposta a confonder perchè ghe fa comodo). Adesso xe i Albanesi che giura e spergiura che i soli discendenti dei iliri xe lori. perchè tuti sa che tuti i Slavi ( nord slavi, sud/jugo slavi) iera prima de qualch e parte intorno dela Polonia del nord e xe andai verso ovest intorno al VI, VII secolo dopo Cristo insoma dopo la caduta del impero roman de ocidente quindi no i podeva esser za qua prima che vegni i romani. E i gnochi che ga scazado i slavi nela Slesia e Prussia oriental i lo ga fato ai tempi de Carlo Magno, ma lori conta che prima che rivassi i Slavi ( sempre cole migrazioni , insieme coi Avari, nel VI secolo) là iera za cruchi... perchè tuti conta che lori iera prima e che i altri xe rivai dopo, oviamente per giustificar che i gaveva ragion d e butarli fora in tempi più recenti.. Come se i fussi vegnudi fora dela terra tuti insieme e per quel i se autodefinissi autoctoni. Che po paressi ( ma adesso i ga messo in dubio anche quel) che in realtà i xe vignui tuti del Africa atraverso el Medio Oriente. A pie, no in barconi...

i Illiri li citava i Romani e forsi anche i greghi classici e apunto no se sa ben chi che i iera e dove che i iera nela penisola balcanica, ma po xe vegnudo Napoleon e i classicisti e i ga deciso de ciamar regno de Illiria quel che i ga conquistado de Trieste , Laibach , e in zo per la Dalmazia. Lori pensava de doprar un termine classico, come che i ga ciamado el nord Italia Repubblica Cisalpina come la Gallia Cisalpina. Ma intanto qua nel Setecento Illiri i ghe diseva semai ai Serbi Ortodossi ( anche perchè no iera Serbi non ortodossi), quei che vegniva qua e che noi ciamavimo Sc'iavoni dela cesa, ma no xe dela Slavonia che xe tuto altro e che no xe gnanca la Slovenia.

prova a leger Iliria si wikipedia in italian https://it.wikipedia.org/wiki/Illiria
e in tedesco https://de.wikipedia.org/wiki/Illyrien
e a sta cartina e te vedi dove che era el Illiricum ai tempi dei Romani

Ma a tergeste prima dei Romani par che no iera illiri, ma un mix de Carni e Celti.. e semai li assaliva i Giapidi come che ben sa chic he cita Cesare el de bello gallico co el parla de Tergeste.

[babatriestina]

e in tedesco questa pagina https://de.wikipedia.org/wiki/Moderner_Illyrismus
o questo in inglese
https://en.wikipedia.org/wiki/Illyrian_movement

[Ciancele]

El nostro scambio de opinioni ga portà efeti positivi parchè son 'ndà in internet sula migrazione dei popoli, dale origini ai giorni nostri. Tante interesanti informazioni he solo in parte savevo. Grazie.

[babatriestina]

El nostro scambio de opinioni ga portà efeti positivi parchè son 'ndà in internet sula migrazione dei popoli, dale origini ai giorni nostri. Tante interesanti informazioni he solo in parte savevo. Grazie.

xe vero? perchè adesso se parla assai . Una volta s e ghe diseva de bruto invasioni barbariche, ma anca quel termine no se pol più doprar. Perchè i discendenti dei vari "barbari" se ofendi.

[Ciancele]

Si stava meglio prima. Si stava meglio prima? No so. Anca soto l’Austria le case pai povari no gaveva nè riscaldamento nè ceso nè bagno. El ceso iera in comun sul pianerotolo e bisognava meterse in fila. E gaver fortuna. Per bisogni urgenti, insoma co’ la iera in zima, se gaveva el bucal.
Le case fate nel famigerato ventenio, par esempio quele de l’ICAM, gaveva ceso in casa. No ocoreva più vestirse e de note gaver una candela par andar. Le dite che fazeva bucai, tipo arsenal (mi lavoro in arsenal, fazo fondi de bucal), ga comincià a falir. Par fortuna xe stada la corsa ai armamenti e xe vignude le guere. Con legere modifiche ai stampi inveze de bucai se fazeva elmi. Co’ xe finida la guera iera tanti elmi là e no se saveva cosa far. Ghe xe vignù l’idea da far legere modifiche ai stampi e de far farsore. Con la tecnica di lavorazione dello stampaggio a freddo. Dopo questa guera i ga fato solo case con bagno e riscaldamento. Prima la sera se ‘ndava in paion col pluzer. Adeso ga comincià a falir le dite che fazeva pluzer. Po con legere modifiche ai stampi i ga fato i bocai per bever bira. Insoma, come che diseva Lavoisier, nula si crea e nula si distruge.

[babatriestina]

però te parli dei bucai metallici o smaltai. Perchè iera quei più de lusso de ceramica o adiritura porcelana che ve go postado la foto nela colezion de Fulvia Costantinides, esposta al Museo Morpurgo. In bagno, naturalmente. E quei inveze no andava ben come elmi e se rompeva sempre i manighi. Ma i li ga riciclai per i vasi de fiori