PENSIERINI DI UN OTUAGENARIO

[Nona Picia]

Quasi quasi lo faria anche mi...

[oli1939]

a mi, de picia, mia nona me dava un leggero infuso de senna e el dott. Gran - che gaveva l'ambulatorio in P.zza Volontari Giuliani - siccome mia mama tazzava - perche' a 12 anni iero alta 1.72 e pesavo poco, me ga da' l'oio de merluzzo in perle, cussi' no se sentiva el gustazz..inoltre a scola i ne dava pastiglie marron che spuzzava de vitamina....perdir...

[Ciancele]

Vedo che me gavè nominà esperto della sussistenza e perito logistico. Gavè fato ben. La baraca fa aqua e bisogna ‘ver roba in casa par almeno trenta giorni. Se ‘ndè a trovar qualchedun, premeso che el ve fazi vignir drento, colazione dal saco. E ognidun par sé. Mi go fato za scorte de un saco de fasoi. Quel che no trovo xe i subiotini. Voi, a Trieste, gavè subiotini ma no luganighe bianche de Monaco. Barato, eco la soluzion.
Me gavè lasà contar le solite monade e adeso ve digo robe serie.
La notizia, publicada anca sui giornai, ga fato impaurir la gente. Almeno quela che ga parlado con mi. I ga paura che el governo sapi qualcosa che noi no savemo e i ne prepara al pegio. Finora tuti ga dito, o domandado, cosa che se farà co’ xe finide le scorte. A Trieste se pol ‘ndar sul molo a pescar guati (ghiozzi) e sacheti (traduzione cercasi), ma qua? Ma mi penso che se el governo savesi qualcosa, no’l ghe contaria a nisun. Pol anca darse che i meti in giro ‘sta vose parchè che la gente no pensi ai problemi veri, e no xe pochi, e i parli pintosto de ‘ste monade. Qua se disi: Aborti dela fantasia. Uno dei problemi de ogi xe le babe cole coltrine davanti i oci. Un fato xe che gavemo una zaia de gente col capucio. No i lavora, parchè cusì nisun li vol, ma i vivi listeso coi soldi de tuti. Anche profughi che ga problemi cola lege i vien mantignudi. Qua ciolemo gente che va in preson e i vien mantignudi a spale dei povari. Tuti disi de mandarli al paese lori, ma el paese de lori no li vol e i xe contenti de no gaverli più. Una zaia de gente de meno de mantignir. Quei del governo (con poteri decisionali) i xe divisi tra sì e no. Ma o sì o no, lori i soldi i li ciapa e xe sempre meno par la gente de qua.
In guera gavevimo un saco de fasoi in armeron. No semo stai atenti e la gata xe ‘ndada a far i pici gatini sui fasoi. Gavemo lavà fasol par fasol e gavemo magnà. In disfrito cola polenta.
Qualchedun pensa che i ga scrito questo par incrementar le vendite. I spera che qualche roba vadi de mal e cusì i botegheri fa soldi. Noi gavemo qualche scorta, ma de marmelata fata in casa, de pomi coti par la torta e de altre robete, come, par esempio, useleti (Rouladen), sugo de pomidoro, rosto de porco, lasagne al forno. Mia molie fa diese useleti, parchè far do xe dificile. ‘lora do li magnemo e el resto in frigo. Anca pal rosto de porco no se pol crompar 20 deca de roba. Se crompa un chilo o un chilo e mezo e se fa porzioni. Una o do pize, panini e gelato de vanilia. Ma no par paura de una carestia. Voi podè ‘ndar in Friul a acaparare e podè far borsa nera. Come in guera. I francesi i disi: A la gher xe com a la gher.
Oli, cosa vol dir nel dna? No sarà miga un’ofesa. Ara che me rabio.
Sì, go ingrumado pomi e ogi magnarò, se la vecia no ga cambià idea, Apfelstrietze (pomi in camisa?). Col gelato o con salsa de vanilia.
Go anca alberi con pomi più garbi e penso proprio de far vin de pomi. Tanti ani fa gavevo do damigiane de vin de pomi. Le xe ‘ndade in asedo parchè no go filtrà el vin. Sbaliando se impara. El futuro dirà se go imparado.
Spero de gaverve fato ciaro (iluminato) e ve saludo.
Ciancele, il vostro tecnico logistico.
PS 1: La vecia ga cambià idea. Salata ale sete erbe. Con formenton e fasoi de una scatoleta. Adeso una scatoleta de meno nel nostro armeron.
PS 2: La prosima perizia sarà contro patus.

[Ciancele]

A mi, de picia, mia nona me dava un leggero infuso de senna e el dott. Gran - che gaveva l'ambulatorio in P.zza Volontari Giuliani - siccome mia mama tazzava - perche' a 12 anni iero alta 1.72 e pesavo poco, me ga da' l'oio de merluzzo in perle, cussi' no se sentiva el gustazz..inoltre a scola i ne dava pastiglie marron che spuzzava de vitamina....per dir...

A mi de picio mia nona me tunchiava cola bacheta. Tre colpi par ogni cuciar de minestra, oio de bacalà (olio di fegato di merluzzo), siropo Ruspini par l'apetito. Qualche ano dopo i me dava pirole contro l'apetito. Iero el Martin Muma dela clase. A 17 ani gavevo un metro e sesanta. A diciasete e un mese gavevo un metro e otanta. Go sempre mostrà meno ani de quei che gavevo. A 13/14 ani mostravo diese o undise. Anca adeso mostro 'sai de meno.

[oli1939]

Ciancele te son grande...te me ga fato rider anche se no gavevo voia....Mi credo che noi che gavemo visto guerra e pati' fame e restrizioni ne xe restada la necessita' de far provviste e cussi' impinimo dispensa, frigo e surgelator de proviande...

[oli1939]

capisso el superappetito...cresser 20 cm in un mese... i ossi se coreva drio...

[Ciancele]

Bongiorno a tuti. De ogi in qua co‘ ‘ndarò in paion me ciogarò un indormio (quando vado a letto prenderò un sonnifero). Cusì spavo (dormo) e no me fazo pensieri. Stanote me xe vignù inamente una dele beatitudini: Beati chi che gaveva clanfa in matematica che no i senti ciapadi pal fioco (presi in giro). ‘deso ve spiego. ‘sti giorni go ciapà una letera de l’asicurazion che i ga aumentà legermente i premi. Inveze de zento costa zento e tre, un aumento de soli 3 Euro. El costo de un bicer de bira. Grando, se volè, ma sempre solo un bicer. Po’ go comincià a calcolar. Prima me costava 100. Più la tasa sule asicurazioni del 5 parcento fazeva 5 euro. Somado 105. Adeso me costa 103 + el zinque parcento (5,15) fa 108,15. L’aumento no xe ‘lora de soli 3 euro ma de 3,15. E cusì xe tute le robe che paga tase, par esempio l’IVA. Sula luce, sul gas, su l’aqua. Ma queste tase i le meti sempre de parte e no i te disi de quanto che le aumenta. ‘deso savè par cosa che gavaria volesto ‘ver clanfa in ... Vado a farme una altra scudeleta (tazzina) de sbicia (caffè).

[oli1939]

bongiorno Ciancele e tuti, questi piu che pensieri xe incubi. Lassa star le tasse e sluchite un grapin. Za, cmq, le dovemo pagar! Bona giornada serena...piu' possibile a ti e a tutti i amici! ♡

[Ciancele]

Oli39, bongiorno a te e grazie pal consilio. Me xe vignù inamente anca a mi. Te conto una altra roba e vedemo se te me pol consiliar qualcosa. Te parlerò dela casa mutua. La mutua costa el quindise parzento dela paga lorda. La metà (7,5%) la paga el paron e l’altra metà (7,5%) l’operaio. Tempo fa i gà aumentà de un parzento, ma no i ga diviso. L’operaio paga ‘deso 8,5%. Chi che xe ciulà (fregato) xe el cosideto “lavoratore autonomo”. I ghe ga dito che la metà de un xe paron e l’altra sua metà xe dipendente. Cusì i ga diviso anca qua. La parte dipendente paga anca solo la metà. Inoltre la mutua ciapa el 2,3 parzento dela paga lorda per un ricovero per disabili, che saria quei che ga bisogno de un/una badante. Insoma la mutua costa squasi el 19% dela paga lorda. Tuti i parla che la mutua costa solo l’8,5%, ma i se dismentiga de dir che (vedi sopra). Anca ciorse la vita no servi parchè el funeral no xe più pagà dela mutua. No i te dà gnanca un carton vecio de seconda o terza man.

[oli1939]

Anche mi go pagà per 23 anni el 40% della mia non piccola paga del Lloyd per pension e mutua e desso par che i ne fazi un regalo ogni mese, paghemo sempre el ticket su tutto e i ne tira via sempre qualcossa. A mi me xe toca pagar un anno de pension su consiglio del dott. sottile... Amato ma no so de chi....e ancora ben me xe andà...Per dar el giusto i stenta ma per cior...a piene man. Coraggio paghemo el lusso de esser ancora vivi..Bona giornata omo, no stemo rabiarse che za no servi niente, nianche a votar perchè quei che dovessi subentrar xe ssai pezo de quei che governa e de cui se sempre lamentemo. Alora cantemo... ogni speranza è vana e tiremo a campà el più possibile, per farghe rabia anche. Oli.

[oli1939]

[Ciancele]

Fioi mii, a tuti una bona sera. No son più sentà in mudande parchè fa frescheto. No zima (freddo), ma frescheto. Son cole braghe longhe de frustagno. Nel 1965 ogi iera giovedì e la putela iera in ospedal. La sera, circa a ‘sta ora, son ‘ndà a trovarla e ghe go portado rose. No quele de Atene, come che cantava la baba, ma del mio (nostro) giardin. Rose longhe, che in negozio gavaria costà un patrimonio. Quel ano iera un otobre de oro. Ala fine del mese caminaimo pal bosco (i la gaveva molada fora = era stata dimessa) e gavemo ingrumà in un altro giardin foresto, ma salvadigo, pomi codogni. Squasi 50 chili. Gavemo fato marmelata. Adeso no xe più albari ma vilete. Par far marmelata me toca crompar pomi, e peri codogni, fora. Za de almeno do ani i pomi codogni ga el vermo e ‘sto vermo te rosiga se te vol taiar el pomo. Mala tempora ...

[Nona Picia]

ciao ciancele! Anche qua fa frescheto, go fato una volta marmelatra de cotogni ma no la fazo più...tropo de bazilar per spelarli. Forsi farò marmelata de cachi se la mia amica me ne regala abastanza... E se me gira de peri....Bona giornada!

[Ciancele]

Ciao Ciancele! .... Forsi farò marmelata de cachi se la mia amica me ne regala abastanza...

Ara che se li pol forsi anca crompar.

[oli1939]

no se spela i cotogni perche' perdi la pectina che xe nela scorza!

[Nona Picia]

Ciao Ciancele! .... Forsi farò marmelata de cachi se la mia amica me ne regala abastanza...

Ara che se li pol forsi anca crompar.

Ma no i xe boni come quei dela mia amica..

[Ciancele]

Ogi son sta del dotor par via de un panaritz (patereccio). ‘sta volta no’l ga taià, ma el fato solo una penelada de iodio. Me xe vignù inamente che in otobre del ’44 iero in un ospedaleto de campo. Zinquanta brande (lettini) in fila. Iera domenica e xe vignù a visitarne el Deutsche Berater, una specie de segretario federale del partito fasista. Par quel i ne ga dà pastasuta e no una brodaglia qualsiasi (liquido di riciclaggio di defunti?). El ghe domanda al primo: Cosa te ga? El mulo rispondi: una ferita in supurazion che fa materia. Cosa i te fa? Penelade de iodio. El tuo desiderio: Guarire e scombatere pal Führer. El secondo: Go la scabia, i me fa penelade de iodio e voio guarire e scombatere. Quel dopo: Go le emoroidi, i me fa penelade de iodio e voio guarire e scombatere. Co’ el vien de mi: Go una laringite, i me fa penelade de iodio. Volaria che i cioghi un penel fresco co’ me toca a mi.

[sono piccolo ma crescero]

Ciancele Ciancele, la storiela me la contava mio papà...

[Ciancele]

Ciancele Ciancele, la storiela me la contava mio papà...

E probabilmente lu la gavarà sentida de su papà. Tuto quel che conto mi ga 70/80 ani de vita. Le barzelete che mi conto le vien scoperte dai più giovini solo con i cosideti scavi beletristici. Ma la prima metà del quel che go contà xe vera.

[sono piccolo ma crescero]

scavi beletristici

Go dovù andar sul vocabolario treccani per saver cosa che vol dir. El Devoto Oli no lo riporta. El Garzanti sì.