babatriestina ha scritto:spiegheme anche alcune idee che me xe passade per la testa, guardando i mati in divisa: per cominciar, nele foto se vedi un distintivo a forma de Edelweiss, e con l'aria moderna; un lo porta sul capel, un sul colletto: cossa el xe e xe corretto meterlo in posti diferenti? xe un posto che dovessi andar giusto?
e po: le medaie:
( ve posso meter un ingrandimento de un con tante medaie, che se riconossi qualcheduna). ben, la prima roba che un se domanda xe : ma sti siori, che porta sul petto tante medaie, no i pol essersele guadagnade lori personalmente durante la prima guerra...
.
Fin a che punto xe lecito portar al petto un'onorificenza no propria, ma probabilmente comprada de un antiquario , al massimo ereditada del propio nono? o deventa un poco una mascherada de carneval o se volè una comparsa de film?
ghe xe norme sul uso dele medaie o a un certo punto, se podessi dir che dopo tanti anni.. va in prescrizion?
Orpo! Qua ghe volessi un pochi de esperti de uniformologia, faleristica e diritto internazionale! Fazo quel che posso, con le mie limitate conossenze in materia.
I
edelweiss credo che i dovessi andar solo sule mostrine, in quanto i dimostrava l'appartenenza a un reggimento de alpini (Gebirgsjaeger Kaiserjaeger o altri). Bisognassi veder se quei che te ga visto sule berete iera diversi. No me ricordo se ghe xe Kappenabzeichen a forma de edelweiss.
I
distintivi de berretto, o Kappenabzeichen, in principio no iera visti de bon ocio dele autorità, ma i soldai iera orgogliosi de portarli e anche l'erede al trono Carlo li sfoggiava quando el andava in visita ale truppe. Cussì nel 1916 i ga dovù far un regolamento per stabilir come che i andava portadi. Se podeva portar solo i Kappenabzeichen col numero del regimento, division o altro, de appartenenza e quei che ricordava bataglie o campagne ale quali el soldà gaveva partecipado. In più se podeva portar quei con l'imagine del Imperator. I andava portadi solo su un lato dela bereta e vietatissime iera le stelete a cinque punte italiane, perchè le voleva significar che el proprietario precedente iera stà copà. Anzi, par che i taliani fucilava i soldai austriaci che iera trovadi con una steleta italiana sula bereta. Naturalmente i austriaci al fronte se ne infis'ciava alegramente e certi gaveva la bereta piena de Kapenabzeichen, tuto atorno. Quando i ga comincià a portar l'elmeto no i ga rinuncià de sicuro ai sui adoradi Kappenabzeichen e i ga comincià a portarli sula giacheta, ma no sule mostrine.
A proposito de Kappenabzeichen ve segnalo:
http://www.kappenabzeichen.it
Per quanto riguarda le
medaie, so che no se pol portar medaie concesse da un Stato estero attuale, senza una autorizazion de qualche ministero.
Ma per quel che riguarda le medaie storiche, confesso la mia ignoranza.
I soldai in divisa da campo o in divisa storica pol esser consideradi dei rievocatori e tuto quel che i indossa, dai gradi ale medaie, no i lo ga de sicuro guadagnado lori combatendo. I fa parte de associazioni e i gradi i se li distribuissi lori, no so sula base de che criteri. El grupo in blu, con le berete de uficiai de marina, vol ricordar i marinai triestini. La magior parte dele medaie che i porta ghe xe stade concesse, con tanto de diploma, da una associazion de Klagenfurt, dela quale semo soci. No go osservà cossa che i gaveva indosso. Forsi qualchedun gaveva anche medaie de partecipazion a qualche cerimonia Schuetzen o anche qualche medaia del nonno. Purtropo no son mai riussida a farghe passar la voia, a un per de lori, de vestirse de albero de Nadal. E ghe go anche spiegà che le medaie va portade tute in riga, con la più importante verso el cuor e a scalar via via le meno importanti.
Comunque no go mai visto tanta gente, a queste messe. Go dovù sentarme in fondo perchè la ciesa iera za piena, co' son rivada, poco dopo le 5.