Legevo el giornal andove che i ga scrito che in una intervista el 60 perzento dela gente in Germania xe contenta dela sua situazion economica. Mi me go dito che forsi i ghe ga domandà solo a quei che i ga un posto in un partito. ‘lora capiso. Che i ghe domandi a qualche povaro pensionà cola pension al 50 perzento. Saltando de pal in frasca go leto un deto de testa lustra: Coloro che lavorano avranno il primo posto, perché la nazione di domani sarà la nazione dei produttori, e non quella dei parassiti. Se vedi che nisun de noi lavora.
Un altro deto iera quel dei oto milioni de baionete contro i paesi demo-pluto-giudaico-massonici che no i gaveva altro che qualche mila de cari armati, poche centinaia de rioplani e un per de canoni. Cosa volè che i fazi. Anca parchè el mato ga tignù par lu l’arma segreta: Almeno un milion de fionde che gavevimo noi muli. Me vien inamente una poesia sula bomba atomica: Bomba rititomica je tuto granda flozia, ma a noi no se infinozia. Voleva far paura a noi ‘sti sporchi de borghesi, ma noi no je taku nazaj kako li iaponesi che credi che suvo ‘mperator vignù je zo di luna. Par cvel rititomica ga ‘vu tanta fortuna. I disi che bomba rititomica dopo iorni fa dani, ma ciapa di Carso grembano, ti diolerà do ani. ecc. Insoma basta far creder che tuto xe come che diseva lu. Mussolini ha sempre ragione.
In you tube se trova tanta roba, qualche volta anca roba seria. Par esempio quel ch’el ga fato de bon. E no iera poco. Ma chi che se loda se imbroda. Mi a scola go vudo sempre solo ragioneria e go imparà a vardar a destra e a sinistra (dare e avere). Se vardo solo avere son un canon, se vardo solo dare son un m... Par quel fazo la diferenza e vardo quel che vien fora. Nel nostro caso poco par no dir gnente. El ne ga portà la guera e con la guera i bombardamenti. A Trieste el 10 giugno 1944. Come che go za scrito intun altro post, in quel giorno iero a l’Oberdan par i esami di amision. El 9 gnente esami parchè iera alarme tuta la matina e el 10 alarme e i ga bombardà. Co’ semo vignui fora dela scola, i dintorni iera tuto zo. Mio papà iera in barca a ciapar menole. El ga dito che quintai de menole, guati e sacheti i galegiava morti, par via dele bombe che xe cascade in aqua. Dove che stavo mi gnente. ‘pena in febraio 1945 xe cascada qualche bomba. El giorno 11 esami squasi normali. Ma no so se tuti quei che iera el 9 i xe vignudi anca l’11. Una putela ‘sai cocola la xe sparida. La iera su l’elenco dei morti. E anca un mio compagno de clase: 16 ani.
Dopo più de setanta ani sarà dificile se no imposibile de trovar una casa rovinada. O i la ga riparada o i la ga butada zo e fato una nova.
I francesi diseva: À la guerre est comme à la guerre. O, come che diseva la famosa veceta dela barzeleta, guera xe guera. Ma che no i stia a vignir a contar che solo i altri xe cativi. Ve imaginè Roma o Parigi tute zo, come Dresda? Opere de arte perse. I xe tuti compagni: Maza, maza, l’è tuto una raza.
Armiamoci e partite. Xe facile far guera co’ se pol mandar i ialtri. Quei che iera a Giarabub, Montecassino, Stalingrado, vallo atlantico i la pensa sicuro in modo diverso. E no i mandaria gnanca i ialtri.
Ogi xe el 12 giugno e me fa ricordare el 12 giugno 1945. Mi penso che par Trieste quel giorno xe sta la fine dela guera. Dopo ‘sto giorno se podeva dir che Tito xe m... Ma no’l iera m... El saveva ben quel ch’el fazeva e el fazeva apunto el m...
A noi la guera, oltra quel che se ga visto, ne ga portà cevapcici, Coca Cola e döner kebab. No so se meritava far guera par questo.
Cari amici, un buongiorno a tutti. Sì, go de novo bisogno de una informazion. Stago zercando la mia vecia Trieste. Premeto che i unici palazi che conosevo iera quel dela RAS e Carcioti. Son sicuri che i nomi dei altri palazi xe vignudi dopo el 1953. Baba Triestina ga fato pupoli cusì bei dei palazi liberti e de casa Trauner. Mi me vergogno, dei liberti, de no eserme mai interesà de giovine dela beleza de ‘ste case. Xe una, con un ponte tra do case, che diria: Friburgo in Brisgovia, zità vecia. Davanti pasa el tran e sula sinistra (o destra, dipendi che de parte che se vien) xe Mac Donald. No, dirè voi. ‘lora xe el municipio de Francoforte. Soto pasa el tran. Anca qua dirè de novo de no. Conteme ‘lora andove che xe. Co’ de muli zogaimo ai mestieri muti se doveva indovinar cosa che uno fa. Se gaveva tre risposte. Se no se indovinava se diseva: Merda pisa gato. Cioè: Mi arrendo, non lo so. Roba de meter tra i modi de dir. Scusè l’OT.
Casa Trauner, via dele Mura. Via dele Mura iera le fodre (stradine interne) per ‘ndar in via Cavana. Sul canton iera un bar, una torefazion (me par che la esisti ‘ncora o almeno la esisteva ancora l’ultima volta che iero a Trieste). ‘ndaimo a bever cafè solo par veder la casiera. Un toco che no ve conto (Una ragazza molto carina e simpatica). Ma torniamo a bomba. Za che semo in via Cavana pasemo soto un portico e ‘ndemo in via dele Mura. Ciamar piazeta quel toco subito dopo el portico me par de esagerar. E no poco. Sula sinistra iera una casa. Baba Triestina diria: un lupanare. Par triestin se disi sotoca. Continuando se riva in piazeta Barbacan. I primi metri iera solo par gente suta (persone magroline). Dopo se slargava un poco. In che posto xe ‘sta Casa Trauner? Lumaro vintisie (Numero ventisei) dovaria eser in alto, più su piazeta Barbacan? In che posto xe esatamente ‘sta casa? Go leto le recensioni de gente che iera là. Un ga scrito che no xe posto par auti. Un altro ga scrito inveze che se podeva rivar in auto e postegio tacà (vicinissimo) e tanti bei ristorantini nei dintorni. Tacà? Dove? Tuti ga scrito silenzioso. Me imagino. Chi pasa più par de là. Forsi qualche imbriago che ghe tien. Adeso xe dificile anca imbriagarse, parchè le betole e i spaceti xe diventai ristorantini. Credo ben che zità vecia come che me la ricordo mi, no la esisti più. Via Sporcavila col famoso bar Baldasare. Un forumista ga scrito che el bar ga adeso tavolini sula strada. Tempora mutantur etc.
Grato a chi che me ilumina. Noi muli diseimo a chi che me fa ciaro.
Baba Triestina, forsi me son spiegà mal. Mi domandavo dove che iera ‘sta casa e volevo dir che una casa squasi compagna la xe a Freiburg (dove che xe Mac Donald) e una a Francoforte. Ma ti te ga dito che xe el ex palazo Tonello. ‘deso so come prima. In che via xe ‘sta casa?
Dove che xe la casa Trauner go visto meio dopo el tuo post sula via Pozo de Crosada. In Google go visto via dele Mura e el numaro 26. Squasi sul canton con piazeta Barbacan, dove che via dele Mura xe un pocheto più larga. Ma la casa me par ‘sai streta. Comunque no xe mii problemi. Ma vardando ‘vanti pensavo come che mi caminavo quela volta. Via del Bastione traversavo via Felice Venezian e ‘ndavo in via Sporcavila. Le vie de sinistra e destra no le conosevo gnanca. Via Pozo de Crosada iera fora man. Via Capiteli no pasavo e no savevo che la va in alto verso San Giusto. Dopo in via Crosada e ala fine in via Riborgo. Via Cavazeni no pasavo. Le vie de destra de via Cavana, vignindo de piaza Granda, no le fazevo mai. L’unica iera via del Sale, parchè là stava un amico de mio fradel, pianista, colpa anca sua se no go interese par la musica tropo moderna. Anca le straduze tra la Portiza e via Riborgo le go fato pochisime volte. Più de grando che de picio. Xe o iera una spece de spaceto andove che se podeva bever un otavo fora in pie.
A proposito de imbriaghi: Te vol meter ciapar una bala co’ l’otavo in mano in spaceto sule bote o bever una bira in scatola, in pie?