El Rinascimento a Trieste

[babatriestina]

El Rinascimento a Trieste... praticamente no esisti!!
gavemo oper d'arte del trecento, de San Giusto al polittico de S Chiara de Paolo Venezian, gaveremo un poche de cese barocche, ma el rinascimento qua se limita a un per de quadri veneti, un Carpaccio a S Giusto, un per de quadri de Peranda allievo de Palma il Giovane... cossa nasseva a Trieste intanto che che iera in giro Michelangelo, Leonardo, Raffaello, Tiziano, van Eick, Cranach, Duerer , Altdorfer.. ( per la par condicio, no go messo solo che pittori italiani)???
No so, la risposta che me vien xe che per el Quatrocento e bona parte del Cinquecento a Trieste iera guerre e pestilenze.
Ma ste guerre iera anca un poco tuto in Italia e le pestilenze anca no conosseva confini, e a Trieste no xe stade, che mi sapio, gnanca le grandi guere de religion che xe stade i Francia e Germania.. ma che mortorio!!!Gavè spiegazion migliori? Sofigada de Venezia nonostante i Asburgo? Opere rinascimentali? l'unico che se ga fato notar xe Pio II Enea Silvio Piccolomini, magari faremo una ciacolada su de lu e la sua biblioteca, ma se pensè coss che lu ga fato de bel in Italia, fra Siena e Pienza..

[ffdt]

Me sa che iera solo che barufe co' i capodistriani per via de i trafici de sal, un rovinarse i ulivi con cuei de Muja ... tignir de ocio veneziani e pirati de la parte de 'l mar ... bramar che i Asburgo no i vegni a romper i bobi e rugnar perche` i voleva cambiar i statuti ... robe cusi`, insoma ... una vita in picio ... strenti de tute la parti.

Per mi la condizion geografica la ga iutado bastanza ... ricordemose che el dialeto de cuela volta el iera piu` simile a 'l ladin che no a 'l veneto ... facile che come che la Trieste taliana la xe in sto cul de sac co' la Slovenia cuela ladina la sia stada in te la stesa condizion co' la Serenisima, el patriarcato ... i von Haubsburg e i sui capitani ...

El rinascimento no xe roba che la gabi gavudo sai ocaxioni de pasar per Trieste ... la sua rinascita la xe stada co' 'l porto.

Ciau

Franco

[MUSTANGS13]

come go leto sul forum e su vari libri .... secondo mi el 500 xe stado un bruto periodo per Trieste. Se parla del 1511 come el famoso terremoto, maremoto o quel che xe stado dopo i parla de peste .... casotti vari ....se po' se parla de uan città con una popolazion ridotta ala fame come che i disi probabilmente i gaveva poco de pensar all'arte .........

[AdlerTS]

Della catastrofe del 1511 ghe ne parlavimo qua