Trieste in svendita

[babatriestina]

Meto qua, podevo anche scriver in salotin, ma i tochi che sta andando in vendita fa parte dei tochi bei de architettura triestina: ogi a leger el Picolo me se ga strento el cuor :
El Comun pensa de vender palazzo Carciotti, che xe considerado ( disi lori) el più bel palazzo neoclassico de Trieste ( e se vardè le foto de Zoom Culex podemo esser dacordo), e che sta andando abastanza arremengo, el Comun no ga soldi per restaurarlo, e cussì i pensa de venderlo senza vincoli de destianzion, cussì i lo vedi più facilmente, insoma i disi che i podessi trasformarlo in albergo! tegnì conto che al interno xe pien de afreschi, la cupola xe tuta afrescada...
un per de pagine dopo: le Ferovie vendi el palazzo dele Ferovie in Piazza Vittorio Veneto ( vulgo, el palazzo di fronte ale Poste).
anche perchè i sera alcuni uffici ( ara ti, quei che fa orari, manutenzion.. e cossasomi) , anca perchè i iera nela parte de Campo Marzio ormai venduda, e i li sposta a Monfalcon e cussì el palazzo no servi, meo vederlo e ciapar bori.
E dopo cossa i me vien a cianciar de coridoio 5, no farà ferovie, le strade se intaserà sempre più. i trafici paserà sora le Alpi e noi redeventeremo no un vilagio de pescatori ma un paesetto de veceti in casa de riposo

[AdlerTS]

Se fussi compradi da mecenati che provassi amor per la conservazion dei edifici, nessun problema. Fa paura pensar a chi compra solo per poi lucrar.

[Nona Picia]

Stemo a veder se prima o poi noi venderà anche le nostre case, per darghe itrreni a qualchedun che vol far alberghi !
Ciao ciao

[babatriestina]

Stemo a veder se prima o poi noi venderà anche le nostre case, per darghe itrreni a qualchedun che vol far alberghi !
Ciao ciao

ben, xe quel che i ga fato dela mia, dove abitavo in affitto: i veci proprietari ( che la trascurava) la ga venduda a una agenzia immobiliare de Trento, i mati ga cominciado a vegnir per la casa, prima i me ga girado per tuto el quartier misurando tute le camere, le finestre, i muri, po i se ga inacorto che in principio del novecento xe stade murade dele finestre, questo no ghe piaseva e cussì i me ga comunicado che i riaprirà le finestre che iera 100 anni prima, naturalmente mandandome i operai a far lavori mentre che mi ghe abitavo, po i ga deciso de cambiarme tute le finestre, via sburti, scuri, dopie lastre , finestre de legno, antine de legno massiccio, e su nove finestre moderne de plastica ( mi intanto za pensavo de andarmene..) , po i ga cominciado a piturar la casa e go dovudo eliminar tute le piante del pergolo, meno mal che go podudo trasferirle nela nova terazza,e finestre inciodade per mesi, po i ga piturado la corte, e là me go rabiado perchè un giorno piturando i ga spacado tute le lastre dela cusina e mi rientrando in cusina la go trovada tuta coverta de polvere e frammenti de lastre rotti e per finir i ga trovado un spandimento in bagno e i me ga proposto, visto che stavo per traslocar, de serarme l'aqua in bagno e se volevo, de andarme a lavar in un quartier sfitto del pian de sora!!! a sto punto son veramenta andada fora dei gangheri, visto che mi l'affitto lo pagavo e come, e giuro che co son andada via con lori no go mai più voludo aver de far, i ga smantelado la casa, butado via i veci parchetti intarsiai ( e rovinai), fato tuto ufici, messo porte blindade cavando le vece decorazioni de otton che iera sule porte.. e adesso xe un bel palazzo, tuto iluminado de notte, che no ga più gnente de far con casa mia, dove no abita nissun e xe solo che uffici, in pieno centro!
i ga fato aposta, diria, per far andar via i veci inquilini

[Nona Picia]

Certo che se te se le zercavi, no le te veniva cussì ben!
Ciao ciao

[granzo]

...me vegnisi de domandarte scuxa per lori che tristeza...

[babatriestina]

...me vegnisi de domandarte scuxa per lori che tristeza...

te sa che scusa i me ga domandado? i ga protestado perchè co son scampada via go lassado qualche vecio toco e in disordine! la casa iera tuta coverta de polvere dei lavori che i fazeva lori! insoma, pur de no aver più a che far con lori, ghe go dito che i buti via le mie scovazze a spese mie.
Per tornar un poco IT, portoni triestini, questo toco de otton iera sul porton del apartamento, iera un per ogni battente, orizzontal, adesso i ga salvado un e i lo ga messo sul porton de strada

[AdlerTS]

El Comun pensa de vender palazzo Carciotti, che xe considerado ( disi lori) el più bel palazzo neoclassico de Trieste

E della proposta de far un casinò cossa ve par ?

[sum culex]

El Comun pensa de vender palazzo Carciotti, che xe considerado ( disi lori) el più bel palazzo neoclassico de Trieste

E della proposta de far un casinò cossa ve par ?

Un casinò, ma senza l'acento sul o.

[sum culex]

No go gnente de ecepir, anzi, se i fa un casinò qua a Trieste, ma no in quel posto; saria un modo per portar meno soldini oltre confin e atirar anche turisti giogadori che adesso va fora che i porteria patùs qua. No so spiegarme perchè quel posto specifico no me convinzi per gnente, xè una sensazion a pelle, una roba del genere la vederia meio più defilada dal centro, ma no tropo.

[refolo]

Non digo viva el Comun........ma me permetto de dir, perche' anche mi' son nata, a Trieste, anche se non vivo piu' la'.
El palazzo xe una meraviglia ma passarghe de fianco e guardarlo? con quel non giusta marciapiedi rotti, che piu' de qualche turista ga' avudo infortuni.
I soldi devi entrar percio chei torni fora su' robe piu' necessarie.
Lasse' che sior spendi al casino'.
Le privatizasioni le casca sempre in man ai miliardari........l'importante che sia locale non straniero.
(Qua' i tien per TRUSTEE.....una vecia casupola, un cesso de quei che iera in mezzo la yarda, solo per storia, ) noi gavemo Monumenti e palazzi. Almeno sto Palazzo el restera' come chel xe, solo chi che entrera, sara differente. Sum ga' ragion, piu' soldi, meno portar l'Euro fora casa.

In quanto al tuo appartamento? me fa' pena a sentir, ma queste storie le go' intese da quasi 70 anni.....I amministratori, fa' tutto pei paroni, niente per i Inquilini! ghe xe ancora paroni de casa chei vien a Trieste a incassarse i afitto due volte l'anno! sta storia l'andera' avanti fin che ghe xe soldi! La mia amica a San Giacomo la ga' la polvere del plafon sul viso ogni mattina che la se alza. Non restaurando i paga meno de fondiaria al Comun, e de qua' se capissi e se vedi le robe che casca.
ma come dito su' el comun gavera' de piu' possibilita' de abelirla anche per la sicurezza dei cittadini! pensa che con son andada via mi', e per le scale go' trova' (anche el me ga' saluda con un baseto e strenta de man) el Ceccovini. El vegniva con l'Architetto, per far veder ai inquilini, come chel cambiera' tra' le cusine e gabinetto, un pergolin belissimo. tutto fatto, e fini'1961 (dopo che xe vegnu' i mii )
Adesso che iera mia fia quardando el Video, me go' messo a pianzer, de non riconosser nianche el porton. Tutto trascura, tutto sporco, scovazze sotto la scala, ma questo credo che xe anche perche'non esisti persone con un poco de rispetto, e pulizia, o amor per la casa.

Maria aka Refolo

PS. Questa xe la mia opinion.

[Nona Picia]

Carciotti arenato....titola el giornal oggi....e la galleria nazionale d'arte antica rischia di andare in Friuli.....semo alle solite! El finanziamento per el restauro xe blocà dallo Stato perchè sembra che el comun no gabi onoràl'accordo de collaborazion, sulla base del quale iera stai richiesti i finanziamenti.

[1382-1918]

No me stupisi, xe una tattica tipica e za colaudada!

Prima bisogna far creder mari e monti, a volte inutili, dopo bisogna impinir le pagine del Piccolo per un paio de setimane, dopo riva mesi de silenzio e dopo vien fora che xe delle irregolarità, e che altri inveze, xe in regola.
A sto punto resta solo de far veder chi xe i cattivi che ghe porta via roba a Trieste, e dopo darghe la colpa a questi (se xe furlani o sloveni, mai de mejo).
Naturalmente el Comun xe sempre inocente, e anzi vittima...

[sono piccolo ma crescero]

Nova proposta de vendita del palazzo Carciotti

http://ilpiccolo.gelocal.it/trieste/cro ... hfpitsec-4

[Nona Picia]

I farà un altro albergo???

[babatriestina]

xe anni che i ne parla de sti alberghi de lusso: ve ricordè co i voleva far un Hilton al Silos? adesso xe solo che i migranti, co no i li buta fora

[Ciancele]

..... Per tornar un poco IT, portoni triestini, questo toco de otton iera sul porton del apartamento, iera un per ogni battente, orizzontal, adesso i ga salvado un e i lo ga messo sul porton de strada

Prima dela guera tuti i portoni gaveva pesanti cluche (maniglie) de oton. In guera i ga cavà le cluche de oton e i ga meso cluche de fero. Oton par la patria. I strazarioi (robivecchi) i devi eser stai anca patria, parchè qualchedun smontava le cluche de oton e le portava dei strazarioi che i comprava nichel, stagno ecc.
Iera un poco come l'oro par la patria. Se portava la vera de oro e se ciapava una de fero. Tanti però tigniva la vera de oro in casetin e portava quela de fero. Sicome che l'Italia ga perso la guera, no iera tanti che portava le vere ala patria o qualchedun le fazeva sparir. Tutto sparisce e come non si sa. Con l'oro i voleva comprar canoni. ma de chi? Forsi dei inglesi e americani.

[babatriestina]

adesso inveze i ingruma rame. oton no ghe interessa, ma i fili de rame dei veci apareci ghe fa gola sopratutto ai clandestini. I xe in attesa davanti dei depositi comunali de scovazze e i domanda La ga qualcossa pe r noi? mi spero che quei dei depositi ricicli anche lori el rame per bon..

[Piereto]

Amare riflesssioni, ma semo presto a novembre. I nostri nonni e bisnonni mai gavesi pensà che Trieste saria cascada cusì in basso. Xe passadi cento anni, e xe cento anni de declino. Trieste la bella addormentata speta ancora el suo principe azzurro. Un principe che no ghe porti solo un baso , ma anche una montagna de palanche. El declino economico porta anche al declino demografico. La bella addormentada devi sveiarse de sola e pensar solo alle convenienze economiche. Drio dei bori riva tuto el resto. El palazzo Carciotti xe un tipico esempio de declino. El restauro de strutture obsolete come gavemo dito in altri post costa tantissimo e el Comun ga i bori solo per far l'ordinario, o una assistenza anche quela deficitaria, figurarse far investimenti, e po' con quai? Gli investimenti pol vinir solo da le autonomie in tema de fiscalità,.....ma savemo el pensiero de la grossa fetta de politicanti triestini, tuti a spetar solo el baso del principe roman o furlan. E po' i bori ricavadi dalla vendita come i vinirà amministradi?. Aumento de l'assistenza a piova?.

[babatriestina]

Palazzo Carciotti xe nato come casa privata. De un sioraz che se dava de far. Adesso spetemo sempre la manna del cielo... che la sia de Roma o furlana, o de qualche altra parte ...