La xè stada progetada e realizada dai architeti Ruggero e Arduino Berlam tra el 1908 e el 1912. El progeto se rifà ale antiche architeture mediorientali (se trova elementi decorativi de ispirazion siriana) rapresentando in modo tangibile l'influenza dela comunità ebraica del'epoca.
El tempio, inaugurado nel 1912 ala presenza del principe Hohenloe, xè stà devastado nel 1942 da squadre fasciste e in seguito, soto l'ocupazion nazista, adibido a deposito de opere d'arte e libri.
Sta Sinagoga xè una dele più grandi e maestose d'Europa. Se nota nele decorazioni, come acenado anche più sù, richiami orientalegianti come nele bifore, nei bassorilievi e nel roson che disegna la stella de David.
El 'Tempio Magior' ga rimpiazà le Schole, che nela metà del '700, rispondeva ale necessità de culto dei ebrei residenti a Trieste e ga sodisfà le necessità de una comunità sempre più fiorente, che nel 1938 contava quasi 6000 de lori.
Esternamente el tempio ga tre faciate, una sula vie Donizzetti, una sula Via San Francesco/piazza Giotti e l'ultima in via Zanetti, faciate che xè architetonicamente diverse l'una dal'altra. Su tute spica l'imponente roson, in cui dal centro, che racchiudi una grande stela de David, se iradia una serie de decorazioni floreali.
Sula via San Francesco trovemo anche un logiato con archi a tuto sesto da cui se acedi al'interno del tempio, anche se l'ingresso principal xè in via Donizzetti, ma che vien verto solo nele festività più importanti.
Le foto xè fate in periodi e ore diferenti (giugno e dicembre) con iluminazioni ben diverse data l'alteza e l'angolazion del sol. Go fato in sto modo perchè me pareva che i bassorilievi e certi particolari risultassi migliori in ombra: iluminai dal sol i me sembrava tropo duri e contrastai, luce che al contrario me ga parso più adata per le foto de insieme.
Per adesso ve mostro solo i esterni con tanti particolari esclusivi, perchè al'interno xè vietato far foto: se in un secondo tempo riuscirò a gaver l'autorizzazion, sarà mia cura e dover farve veder anche l'interno.
Prima de tuto una stampa
La vista de tuto l'insieme da piazza Giotti, In sto periodo la torre e la faciata de via Donizzetti xè in restauro.
