Piereto ha scritto: Per i negozi che sera savemo chi ringraziar. Mi meteria in primis el sistema fiscale predatorio, po l'apertura dei centri commerciali , e ultimo ma forsi el più importante la mancanza de bori.
Mah, la mia opinion xe che tuto fa mucio. Cioè che no xe solo una ragion, ma un insieme de tante ragioni. Forsi negozi cari senti la mancanza de soldi, ma boteghe magnative? Tuti magna ogni giorno. O almeno la gran parte. Quel che sera qua xe le paneterie a conduzione familiare che senti la concorenza dei filialisti. Xe do o tre solo nei dintorni che i fa parfina i crafen. Le picole paneterie no pol lavorar par do soldi. Centri comerciali tipo Aldi e Lidl vendi de tuto, anca i cosideti non food. Insoma te compri mudande, calze, baterie e fil par cusir. Come Upin: pignate, bucai, spighete par soldai. E ‘lora no te va come prima a far el giro dei negozi, ma te compri squasi tuto in un grande magazin. Quel che disi Baba Triestina xe anca vero, ma tante volte i fioi ga altri interesi e i veci sera. Vizin de noi xe un negozieto tipo Cesca. I paroni, marì e molie, va in pension e i fioi fa altra roba. Tante volte, specialmente in punti centrali, i ga aumentà i afiti tanto che la gente va via. E vien boutique o negozi simili.
Veramente mi volevo dir la mia su l’articolo de Son Piccolo Ma Crescerò. No voio spander e dir che me se strenzi el cuor. Ma fa lo steso mal. De Smolars e Glessich, ma specialmente de Smolars, go crompà tanti quaderni. De Masè poco, ma de Sartori tanto. Mia mama iera in guera sula lista par l’oso de parsuto. El vecio Sartori gaveva una lista dei clienti e uno dopo l’altro ciapava l’oso. Qualche ano fa iero a Trieste e go ciolto parsuto e vin de Sartori. Go domandà e el mato me ga risposto che el vecio iera su papà. No me ricordo de gaver ciolto qualcosa de Galtruco. Quela volta se fazeimo far i vestiti e mia mama cioleva la stofa de un in riva, sul canton con la via Mazini. De Arbiter cioleimo anca pintosto combinazioni. Una volta iero a Trieste e go comprà do vestiti estivi. Qua i me ga invidià. De Nimmesrichter camise e cravate.
Ma xe anca altri che no conoso. Vitrum xe quel tacà la cesa? Tantisimi ani fa devo gaver crompà là una machineta par far gnochi e altre robete par la cusina. Serli in via Cavana devi eser vignù co’ iero za via. Ma Gaggi? Mai sentì. Chi iera, dove iera e cosa fazeva? Tanti negozi che vivi ancora ga forsi novi paroni.