Ogni tanto se vedi in qualche porton o in vetrina de qualche negozio Mendaressa ( che in casa mia go sentido pronunciar Remendessa
), saria la rammendatrice, te ghe portavi una roba sbregada o sbusada e la te fazeva un rammendo praticamente invisibile!ieri passando per via Battisti me ga parso de no veder più la tabella che iera de una al altezza dela ex Standa. Po una bona iera e forsi xe ancora in principio de Viale Sonnino, un poco prima del ex cinema Capitol, ospitada de un negozio che vendi roba per lavori de casa. Una bravissima iera la siora Boscolo parecchi anni fa che la stava in Cavana, ma co i ga restaurado la casa la xe andada via e no credo che la gabbi riaverto.
Iera un mondo che se salvava tuto , no come adesso che xe consumismo e costa de più meter a posto che comprar novo ( gavè presente la classica frase in negozio: Ghe costa de meno cior un novo), e po se disi che se spreca, che bisogna riciclar, che semo somersi dele scovazze...
e po sti lavori de ago le imparava ale scole femminili, ancora mi i me ga insegnado qualcossa ale elementari e ale medie, ma no a livello cussì bon tecnicamente. Gavevo visto i ricami che fazeva le sorele de mia nona ale scole femminili, e iera dei capolavori ( xe andado vendudo tuto co ga ereditado un nipote ), e anche mi go provado a copiar i monogrammi de zia Catina sule intimele, e i mii xe grezzi in confronto dei sui ( ve ricordè zia Catina? ve gavevo postado le foto dei sui vestiti su Triestemia.. la xe morta oltre 100 anni fa e ovviamente no la go conossuda
, solo nona e una vecia prozia la gaveva conossuda de persona)
