Sistiana (Sesljan) - Duino (Devin)

[Ciancele]

Go fato un post giusto cusì. Po volevo scampar ala posta e in farmacia e inveze, sensa voler, son cascà de link in link e go visto, anzi rivisto, una foto de Duin. Inveze de ‘ndar via, me go fato un cafè e go vardà de novo tuto. Specialmente el vecio castel, indove che mi iero più de 70 ani fa in bici con mio fradel. El filmeto de Sum Culex. E verso Monfalcone el Timavo con la sua aqua, che no sempre iera ciara. De istà batù de musati. Porto Picolo. A Sistiana ‘rivavimo in una oreta. Sensa mule meza ora, sula costiera. Me par de gaver za scrito una volta che par de eser a Amalfi. Ma a Amalfi ghe manca una roba, che no gavarà mai e cusì no pol far concorenza ala nostra costiera: la salita che porta ale sete sorele. Anca la mia putela se ricorda che più de zinquanta ani fa (1961? 1962?) se fazeimo là una de parsuto. Prima de zena. No voio eser patetico e ringraziar tuti quei che ga meso foto. Ma xe sta bel. Come che xe bel quando ogni tanti vardo foto che una cara forumista me ga mandà in privato. Solo par mi. O la barca in canal che me ga mandà Son Picolo. Tuti me ga fato un grando piazer. Bona sera a tuti.

[Nini Naridola]

Bravo Ciancele: tuto bel quel che te disi! Unica nota: in più de zinquanta anni le "Sette sorelle" xe diventade "Nove sorelle" se te intendevi la tratoria a Prosecco!

[Ciancele]

Bravo Ciancele: tuto bel quel che te disi! Unica nota: in più de zinquanta anni le "Sette sorelle" xe diventade "Nove sorelle" se te intendevi la tratoria a Prosecco!

Nini, te me meti in crisi. Iera sete o nove? Comunque xe quela. Prima 'ndavo anca con mio papà. Pasereta e strucolo de pomi.

[Nini Naridola]

Son sicuro che se ciama "Nove sorelle" (son stà a magnar la pizza un per de settimane fa). Anche mi me confondevo spesso con le 7 sorelle che xe quele - ciamade cussì da Mattei nel dopoguerra- compagnie petrolifere (chevron, Gulf, Texaco ... le altre no me le ricordo).

[babatriestina]

La gavemo stanada!!
https://www.atrieste.eu/Forum3/viewtopic ... 90#p108390
Grazie

[Ciancele]

Son sicuro che se ciama "Nove sorelle" (son stà a magnar la pizza un per de settimane fa). Anche mi me confondevo spesso con le 7 sorelle che xe quele - ciamade cussì da Mattei nel dopoguerra- compagnie petrolifere (chevron, Gulf, Texaco ... le altre no me le ricordo).

Ciao Nini Naridola. El problema xe che me go impuntà sule sete. Ma dopo quel che te me conti, no me credo più e penso che iera nove. Nove me sona meo de sete. Manco tropo tempo e no so gnanca quando che son sta l'ultima volta a Proseco. Almeno 20 ani fa. Ai mii tempi la pizza iera el sanduic de crudo. La parola pizza la go sentida par la prima vota ai primi ani dei sesanta. Un ristorante talian le fazeva. Po el mio bubez, intanto cresù, se ga meso a farle anca lu, a casa, in cusina, e no le iera pezo dele altre. No go podesto diventar amico dela pizza e magno pintosto una bela luganiga, tipo Cragno (ma solo tipo!), e son più contento. 'sta ultima volta no go magnà pizza ma insalata de canoce. Adeso le trovo anca. Bisogna che tento de farle. Co'la polenta. Bona note.

[Nona Picia]

Anche mi me ricordavo sete sorele a dir el vero, po' ho scoperto che la famiglia iera più numerosa....

[babatriestina]

Stazione di Duino Timavo dismessa, apparentemente

[babatriestina]

Cartolina coll Paladini

[babatriestina]

Gavevi notado che a Sistiana qualchedun ga piantado in giardin un larice? pianta de montagna..

[babatriestina]

Duin - strade romane

Mia moglie gaveva letto sul Piccolo che domenica 22 marzo sa saria podù visitar l'acquedoto Randaccio. Speravimo che se podesi veder anche la mansio romana che xe dentro; invece niente, solo l'acquedoto e per de più bisognava prenotarse. Quindi niente. Pazienza.

Sta mansio iera una specie de stazion de servizio e motel dell'epoca, mesa tacada dela o dele strade romane che pasava per de là e de cui ghe xe ancora qualche tracia, sopratuto de sine fate dale rode (eh sì, mi dico rode e no riode ) dei cari. No podendo andar a veder la mansio, semo andai a veder le strade.

Savevimo che no gavesimo trovà gnente che ghe somigliasi ala Apia antica che iera sula copertina del Piazzino, la sintasi latina dele medie, e quindi semo andai a cercar ste strade bastanza aperti a soluzioni diverse.

Penso che un toco de strada poderia eser forsi questo, un fondo duro de piera bastanza liso, ma no tropo



Penso che podesi eser un toco de strada perché andando avanti per sta strada verso san Giovanni e vardando per tera coi oci dela fede gavemo trovà anche i solchi dele rode dei cari. No se facile vederli nele foto, perché nele foto se perdi la tridimesionalità, ghe gaveria volù una luce più radente e penso che quei che vien mostrai nele foto le sia sempre nei paragi, ma de qualche altra parte.

Alora ve meto prima una foto con le striche rose quasi sora el solco cusì podè, forsi, veder meio, savendo dove vardar



E dopo ve mostro le foto dei solchi più de vizin. Quel de destra se lo vedi meno ben e meio quel de sinistra





Dopo, se ste sine le xe dei cari de Traiano che 'ndava a darghele ai Daci o dei cari de Luogar che se prontava a darghele ai triestini, o dei contadini che semplicemente 'ndava a poratrghe el racolto al castel, o dei soldai poveri che se rucava i tochi de l'artiglieria nela prima guera, questo no ve lo so dir.

ieri gavevimo visto ancora un per de ste tracce de strade coi segni dei carri: ma me domandavo: i gaveva una distanza standard? come le sine dei treni?





queste xe più o meno a pochi metri del sentieri dele sorgenti del Timavo

[sono piccolo ma crescero]

ieri gavevimo visto ancora un per de ste tracce de strade coi segni dei carri: ma me domandavo: i gaveva una distanza standard? come le sine dei treni?

Credo di sì. Ne dovrebbero essere la prova le "strisce pedonali" di Pomei e visibili in questa immagine presa dalla pagina https://www.facebook.com/pompeiiparcoar ... 870951392/.




Pare che le dimensioni dello scartamento ferroviario odierno derivi da quelle dell'assale romano: https://it.wikipedia.org/wiki/Carro_(trasporto); wikipedia lo dà come non verificato, però dà come verificata la standardizzazione dello scartamento dei carri come primo esempio storico di standardizzazione (vedi il paragrafo "lo scartamento dei carri", dell'articolo di wikipedia citato sopra.

La notizia è confermata anche dalla Treccani: https://www.treccani.it/enciclopedia/scartamento/.