manifestazioni in piazza

[babatriestina]

.. e altro!
stamatina iero in piazza della Borsa, iera i studenti ( principalmente) iraniani che manifestava contro la repression, el isolamento del loro Paese dei mezzi de comunicazion..

tante robe me ga colpido: le mule sopratutto belissime, iera quasi tute cola mascherina e ociai neri: orpo! più coverte che in Iran! i me ga spiegado che molte temeva de far veder la faccia per evitar ritorsioni sula famiglia a casa.. tante bandiere, quele col leon e anche tante imaginI. dei studenti morti, e anche dela famiglia del Scià. Insoma Se stava meio co se stava pezo?


e i triestini? pochi! go riconossudo un per de amici e coleghi, ma la mia impression xe stada questa:

1 el pd ga invitado a partecipar reazion : Xe i comunisti? mi no vado!
2 i ga intervistado la Cisint vegnuda de Monfalcon , reazion: xe i fassisti? mi no vado!
3 i ga esposto foto del Scià e del erede? , reazion : mi son de sinistra, con quei reazionari mi no vado!
4 No se parla de Trieste, dei operai, dei disocupai, dei tipi de cortel che se vedi qua? reazion: mi son triestin, no me interessa del Iran che gnanca non so ben indove che xe, mi no vado!!

però ve meto due foto de due che assisteva perché le me ga colpido
la mula antifassista


e po una elegantissima, ma con un vestito un poco rétro che.. me ga fato pensar ala famosa Contessa!!

[Piereto]

Sah, la mia esperienza me disi che i cortei o el ritrovarse in piaza no smovi le situazioni per cui se se ritrova . Se va per contarse e esprimer le proprie opinioni a vose alta. Ghe xe sempre de le minoranze che va inveze per far casin. Quanto all'Iran savemo che xe un paese dalla cultura millenaria ben prima de quela araba, 90 milioni de abitanti con varie minoranze co una grande scolarità e una bona masa de studenti universitari che no studia teologia. Xe un paese che xe una cerniera , la via de la seta , quela del coton, un grande produtor de energia e el ghe ga fato gola a tanti altri, e quando che un paese nol vol piegarse allora ghe riva le sanzioni, che de solito le provoca una reazione contraria. L'ocidente ga una sua filosofia de la vita e el credi de eser superiore a altre filosofie, e co la storia de la democrazia nol vol altro che conquistar nove materie prime sfrutabili. La rivolta xe una roba, la rivoluzion xe una altra e vol dir cambiar tuto quanto.

[babatriestina]

mi in Iran son stada, go studiado la storia, go visitado i siti classici... i iraniani par che voli semplicemente no eser massacrai e poderse esprimer e vestirse liberamente. No ocori voler scimiotar i ocidentali semplicemente per liberarse de una teocrazia anacronistica e sofigante