![Wink :wink:](./images/smilies/icon_wink.gif)
No so come la xe vignuda, ma insoma.... ecola qua:
La Domenica de Vilagio
Sai presto sta matina
se sveia sior Vilagio
e preso sai coragio
el fila zo in cantina
Tra sorzi, ragni e bacoli
el trova quel che el vol
li varda e poi li ciol
xe arnesi proprio cocoli!
Picon de fero duro
che spacherà quel muro,
quel lungo fero forte
per quela casaforte
El meti tuto in saco,
lo meti sule spale
zigando "andemo, ale!"
el ciol anche un stagnaco
Lu sa che el dì de festa
xe chiusa anca la banca
e alor de farla franca
el pensa in quela testa
El cori zo pel viotolo
ghe dà una piada a un gato
el salta come un mato
se intopa sora un ciotolo
el casca e se rialza
e poi senza creanza
(ghe bala anche la panza)
veloce al buio avanza
El sol no sorgi ancora
ma sai ghe vol far presto
ghe vol el buio pesto
quando nisun xe fora
El riva alfin al muro
picona con ardore
ma senza far rumore
anche se xe sai duro
Picona ardentemente
finché vien fora un buso
xe ormai pronto per l'uso
pasa anche un deficente!
Però nol varda in alto
e mentre el entra chino
pesta sul matoncino
casca sora l'asfalto
Ghe diol tute le ossa
tirarse su nol pol
proprio tuto ghe diol...
Riva la crocerossa
El medico vol veder
ma no i lo porta in leto
come farghe dispeto
riva el carabinier
Ara che fiol de un can!
Ziga quel polizioto
e in quatro e quatroto
ghe liga anche le man
Finisi l'aventura
de nostro sior Vilagio
acqua pan e formagio
in cela de clausura...