Parco di Miramare

[babatriestina]

Te ga ciapado l'idea, ma xe qualche precisazion de far: Napoleon stava zercando de sistemarse, parar fora Giusepina che no ghe dava fioi e sposarse con una de bona famiglia regnante che ghe gavessi coverto le spalle ala prossima campagna, pensando che no i gavessi avudo el coraggio de far guerra a suo genero , se vedi che lu ragionava stile famiglia Bonaparte corsa. El ga tentado con una granduchessa russa, ma nol ghe ne ga trovado, e alora el ga ciolto sta Maria Luisa fia de Francesco I de Austria ( veramente, me par che quela volta el iera ancora Francesco II del Sacro Romano Impero), insoma quel dela colona butada zo dela macchina a Aurisina. Sto mato gaveva avudo 3 mogli , pena che moriva una el cioleva una nova, e una zaia de fioi: Maria Luisa iera una dele più vece, po vegniva Ferdinando ( quel del Ferdinandeo) , po el pare de Franz Josef, e po tanti altri... i calcoli de Napoleon xe stadi sbagliai perchè el suocero ghe ga fato guerra istesso.
I se ga sposado ( A Parigi, ma par che Napoleon, visto che i gaveva za firmado el contratto de nozze, apena che la moglie xe arivada a Compègne el ga avudo un anticipo) e i ga avudo sto fio, el Roi de Rome , che la cuna xe fra i tesori a Vienna. Abdicado Napoleon, Maria Luisa la lo ga portado a Vienna e là la lo ga lassado visto che la xe andada a Parma dove che i ghe ga dado un granducato, e prima ancora che Napoleon fossi morto, la gaveva za un altro marì.. e po un terzo... intanto el muletto ribattezzado Franz duca de Reichstadt vegniva su a Vienna, dove che i se guardava ben de spiegar chi che iera suo pare, e el iera amico dela moglie del zio, che iera apunto la mama de Franz Josef, la tremenda suocera Sofia dei film de Sissi! par che de giovine la iera bela e coccola,e addirittura se malignava.. che Massimilian... ma par che sia cattiverie! El mulo xe arivado a 20 anni e cominciava a capir e farse bel, ma el xe morto de tisi, credo, qualchedun disi anche de strapazzi amorosi, ma xe un poche de leggende. Par che el ghe voleva ben al cuginetto Franz Josef.
Difatti , un comento ala vita longhissima de Franz Josef xe che de picio el ga zogado col fio de Napoleon e de vecio el ga avudo el nipotin Otto, futuro eurodeputato!

[babatriestina]

ancora qualche foto, dele zone meno in vista del parco, el vial dele camelie

el laghetto dei loti no ga loti più de anni anorum, e el xe molto trascurado

certe scalinade de piera xe alquanto sbilenche

[babatriestina]

le serre no vien doprade più come serre ( adesso se fa vegnir i fiori de fora, tuti precisi..) e i ghe ga messo un giardin tropical, con voliera, farfalle, colibrì, papagai...


nelle zone alte, a giardin inglese, ghe xe anche una sequoia gigantea, che penso sia dei tempi de Massimilian, credo la sola che sia a Trieste

[AdlerTS]

Guerra de cifre tra media differenti: ogi sul Bugiardel i scriveva che Roma ga stanziado 1.200.000 euro per manutenzion straordinaria del parco, mentre el TG de Tele4 ga dito 3.800.000 euro

Speremo che sti 2.600.000 de differenza non se li magni nissun

[babatriestina]

Per i lavori, vedo che nel parterre xe sparida tuta una siepe de laurotini ( viburnum tinus) e sostituida de una nova de Chamaecyparis, quela specie de falso cipresso che cressi svelto e dopo un pochi de anni de sotto resta nudo.. no approvo.

Per le fioriture, bisogna dir che la fantasia impera:
arivemo al piazzal davanti al ingresso, e la fontanella xe contornada de begoniette:

andemo ala statua davanti al castel ( dono de Massimilian a Carlotta) e trovemo: begoniette!

poi andemo a visitar el parterre e lo trovemo tuto decorado con... ????
begoniette!!!

IMG_4118.jpg (122.48 KiB) Visto 3609 volte

IMG_4135.jpg (141.4 KiB) Visto 3609 volte

IMG_4128.jpg (129.48 KiB) Visto 3609 volte

[babatriestina]

salimo verso al piazzal davanti al Castelletto, e nelle aiole trovemo: begoniette!!!




ciapemo el vial che va vero la statua del paron de casa e l'uscita verso Grignan e la trovemo con una bordura de begoniette!!!

e drio dela statua del paron de casa, xe el calendario floreal, che ga per contorno.. begoniette!!!!

Mi no credo che in tuto el parco de Miramar ghe sia altre aiole floreali, quele che ve go elencado xe tute piantade a begoniette, la sola variante xe se le volemo rosse, rosa o più raro bianche.
Ste piantine se compra pronte, se impianta in primavera e in autunno se buta via. I anni scorsi iera begoniette e dalie.
Altri fiori ghe xe, ma in arbusti fioridi o qualche rampicante come i glicini.

[babatriestina]

Qualche dettaglio che no ne ga postado SumCulex ( ma magari el gaverà nele sue riserve..):
Massimilian se gaveva fatto una serie de decorazioni araldiche come imperator del Messico, per esempio el ananas, che se vedi nele basi dei lampioni, altre più curiose come un'aquila con un serpente in becco, che le xe sule decorazioni in piera del castel, lato pergoletto, dove che se fotografa tute le spose. Ma se li ritrova anche qua, che xe la lanterna del ingresso: i vetri xe alquanto impolverai, ma le decorazioni xe ancora dei tempi de Massimilian, o rifatte molto ben

[babatriestina]

e se el stemma central del portico de ingresso ga el stemma del duca d'Aosta, coi fasci laterai ancora su,

a sinistra e a destra xe inveze ancora i stemmi originai de Massimiliano, a sinistra sempre sta aquila col serpente.

a destra un leon (?) rampante

( un stemma dela casa Sassonia Coburgo Gotha, de Carlotta ?)
Osservar anche el stile dei stemmi, lisso e linear stile anni 30 el primo, e sul ghirigoro ottocentesco i più veci.

[babatriestina]

a proposito de stemmi, sul fianco esterno dela capelletta xe questo stemma, che a destra ga la crose dei templari: se parlava de templari a Grignan: una prova o un falso ottocentesco?

ecove la vera de pozzo coi scoiattoli che se diseva più sora (post del 3 gennaio)

col scoiattolo mancante
e un particolar del stemma sul esterno del pozzo: vero o falso? me par ssai strano

[ffdt]

el scudo co' 'l spazio per poxar la lancia el xe un ordegno sai antico ... mi no go mai savesto che cualchedun el se lo gabi meso in te 'l stema

fusi bel de saver se 'l pozo el xe recente (intendo de 'l '850) o se i se lo ga grampado in cualche altro logo


Franco

[AdlerTS]

Una curiosità: un mio collega me conta che sua mama ga fato le scole (elementari ?) in quel che ogi xe el bar nel parterre del parco !
Sta dona ga una sessantina de anni, quindi doveria esser stado intorno ai anni 50 del 900. Ve immaginè che bel far l'intervallo nel parco
Pareria che tante volte po i rivava andar a pescar nel moletto e portarse a casa qualche pesseto.

[babatriestina]

nei primissimi anni 50 el parco de Miramar iera requisido dei inglesi e no iera averto al pubblico, i lo ga riaverto al publico imagino nel 54 e mi son stada coi mii amici fra i primi a andarghe a esplorar. Co andavo mi , traccia de scola al bar del parterre no iera, quindi se iera, iera nel periodo dei inglesi, forsi per qualchedun de particolar.
Quel che iera visibile quela volta, e che i ga serado subito dopo, iera el sentierin che dei canoni ( sul lato destro del piazzaletto) andava zo fin a una spiaggetta de sassi con una picia grotta marina. Co i lo ga serado del alto, ghe arivavimo con un sandolin dei bagni de Grignan. Adesso fra via de l'alto serada e parco marino, no ghe pol andar più nissun!

[babatriestina]

sempre per Miramar, ieri go becado la classica foto de Miramar coi monti sul sfondo

anni che me domando che monti che xe esattamente sti qua, per mi quel in mezzo podessi esser la Vacalizza e più a sinistra quel che cuca fra le nuvole el Crep Nudo che dà sula Valcellina. El verde più basso podessi esser el Resettum, sora Barcis..
de solito se li vedi in inverno, tuti nevigai.

[Tirabaralla]

Mamma se è bella...

[sono piccolo ma crescero]

le serre no vien doprade più come serre ( adesso se fa vegnir i fiori de fora, tuti precisi..) e i ghe ga messo un giardin tropical, con voliera, farfalle, colibrì, papagai...

Son andà ieri, adesso le farfalle no xe più, ma de colibrì ghe ne xe veramente tanti.

Se pol far foto, ma senza el flash e quindi no xe facile, comunque son rivà a far questa foto che xe praticamente un clasico: la testa del colibrì xe ferma mentre che el magna;



Ma el resto se movi tuto e el par un elicotero:



Go leto che le ali no le ferma gnanche el flash.

La visita xe solo guidata (6,50 euro); bastanza, ma la guida iera veramente brava, no la 'ndava a memoria, come che fa tanti e se vedeva che la saveva ben le robe. La visita la comincia ogni mezora e la dura un'ora. I ne ga contà che i xe sai contenti perché i xe rivai a farli riprodur e questo xe un bon segno perché vol dir che i sta ben là.

[AdlerTS]

Dopo aver letto el libro sul "vallo adriatico" che ve disevo, me vien un dubbio: per che motivo el bunker nazista del castel de Miramar non vien verto al pubblico ? con tutti i visitatori che ga ogni anno el castel, de sicuro anche el bunker gaveria el suo bel ritorno turistico, no ?

[babatriestina]

dove xe sto bunker de Miramar?
in alto, sora el sentiero de ingresso, xe un cartel che disi:
Pfefferturm
Dopo l'8 settembre il Comando tedesco, temendo un possibile sbarco alleato, fortifica il territorio. vengono create difese con depositi ed estesi ricoveri sotterranei che si aprono all'esterno con quattro bunkers. a causa dei lavori viene distrutta una suggestiva torretta belvedere nota come Pfefferturm, voluta da Massimiliano.
in questa zona del Parco è ampiamente diffuso il pino nero specie nativa dell'Europa centrale.

[Lugara]

Son andà ieri, adesso le farfalle no xe più, ma de colibrì ghe ne xe veramente tanti.
Se pol far foto, ma senza el flash e quindi no xe facile, comunque son rivà a far questa foto che xe praticamente un clasico: la testa del colibrì xe ferma mentre che el magna;
(cut)
La visita xe solo guidata (6,50 euro); bastanza, ma la guida iera veramente brava, no la 'ndava a memoria, come che fa tanti e se vedeva che la saveva ben le robe. La visita la comincia ogni mezora e la dura un'ora. I ne ga contà che i xe sai contenti perché i xe rivai a farli riprodur e questo xe un bon segno perché vol dir che i sta ben là.

Devo farte i mii COMPLIMENTI più sinceri per le foto del colibrì: te son stado veramente bravo a ciaparlo cussì ben!
Son stada là anche mi el mese scorso, ma oltre a esser stada agredida de sta oca canadese con la facia de delinquente (la gaveva con i lacci dele mie scarpe...):

go rivado a fotografar decentemente solo i pelicani:

e la gru coronata, che se meteva in pose artisticamente plastiche:

Per el resto confermo tuto quel che te disi, in particolar al riguardo dela guida, una mula veramente preparada e visibilmente apassionada del argomento. El posto merita sicuramente una visita, anzi, ghe tornerò in primavera per le farfale.
Sta estate, a proposito, iero a veder el centro dele farfale a Bordano e devo dir che anche là la mostra xe presentada in maniera veramente stimolante! Me ga piasso molto in particolare come che xe spiegadi i ruoli dei colori in natura...

[AdlerTS]

dove xe sto bunker de Miramar?

Xe quel mucio de cogoli vicin el porton, dove jera el custode.
Un altro ingresso saria inveze vicin le ex scuderie.

[AdlerTS]

Tanto per capirse, rubo una foto dal libro, scatada dal Club Alpinistico Triestino nel maggio 45 (quindi i tedeschi non jera più).