Oggetto misterioso

[sono piccolo ma crescero]

Ieri, dove che stava i mii suoceri, in un casetin go trovà sta roba



Evidentemente xe una roba che servi, o serviva a qualcosa, e quindi la meto qua, tra i veci mestieri. Le due imagini xe una per davanti e una per drio. Le go ciamade imagini perché no le xe fate co la machina fotografica, ma col scanner, e bisogna esser precisi.

Go meso anche el centimetro, per darve un'idea dele misure.

Ah sì, mi so a cosa che servi sta roba, ma voio veder se lo savè anche voi.

[AdlerTS]

un picio aiuto ?

[babatriestina]

No go alba, ma el lato sinistro me fa pensar a qualcossa che seri come un covercio: un tubo, un vasetto de marmelata? ma perchè patentarlo e perchè el pomoletto?
a casa mia no lo go mai visto de nissuna parte, e me fa strano, perchè de mi se ga strascinado roba assai vecia!

[sono piccolo ma crescero]

Demo un "aiutino". Girando el pomoleto vien fora sta roba qua.



Che sia un sistema automatico per far l'agopuntura?

[Capuzi garbi]

Per mi xe la parte finale del tubo del bolitor o cusina economica, dove che vien fora el gas prima de impizarlo.

[sono piccolo ma crescero]

No, me dispiasi.

[sum culex]

Mi col primo pupolo gavevo pensà, anche se no me convinzeva, a quel afar che se meteva nela pignata dove che se boiva el late per no farlo 'scampar': quela volta no esisteva sterilizazion. Me ricordo che bona che iera la pana. Però l'aiutin, coi spini che vien fora, me alontana de sta idea.
Altre idee strampalade che no sta in pie, gnanche no le meto per no farme rider drio: ciò, varda quel m... cossa ch'el va a pensar.
Ciao
sum culex

[sono piccolo ma crescero]

De muli, in inverno, tanti de noi gaveva ste berete col pompon, fate con lane vanzade. Mia nona e una zia iera bravissime e svelte come el fulmine coi ferri de calza in man.



Per far el pompon a casa mia se doprava un disco de carton che vegniva intaià co le forbici. Mia suocera invece gaveva questo strafanic tecnologicamente evoluto che go messo sora. Ve dirò che me ga meraviglià trovar sta version sofisticata de quel che, a casa mia iera un toco de carton. Xe un poco come la penna de l'astronauta e una penna biro .

Ecco le istruzioni per l'uso.

Prima se passa la lana intorno ai ciodini sporgenti.



Poi se liga al centro la lana e se fa rientrar i ciodini. A questo punto se taia co le forbici le asole de lana che se xe fatte.



Per far un esempio go fatto un pompon picio e con poca lana, ... per risparmiar , se sa, son istrian

[babatriestina]

Ciaro! Ma a casa mia el pompon se fazeva in un altro modo, che credo sia anche nell'Enciclopedia dei ragazzi de 100 anni fa, quel che te disi coi dischi de carton:
se prepara due dischetti de carton, dela dimension del futuro pompon, e se fa un buso circolar in mezzo ( insomma, el deventa una corona circolare), più la xe larga e più grosso sarà el pompon, credo che un poco de esperienza fazzi trovar la misura giusta.
po se ciol la lana impirada su de un ago, e se ricopri sta corona circolar in giro, fin che el buso central xe più o meno pien.
A questo punto se taia esternamente in giro, in corrispondenza dela circonferenze esterna, se distacca un poco i due dischi de carton e se liga in mezzo con un fil de lana, che po sarà quel che sporgerà e servirà a tacar el pompon. Se strappa via el carton e el pompon xe fato! Credo de gaver fatto anche mi qualche volta...
a casa mia no se spendeva gnanca per sto attrezzo

[Nona Picia]

Come che se vedi che a casa mia nissun lavorava a maia! L'unica che ogni tanto fazeva qualcossa iera mia zia, che però la gaveva poco tempo perchè la lavorava alla clinica infantile, el così detto "Ospedaleto" de via Gambini e no ghe vanzava sai tempo perchè la lavorava tuti i santi giorni, anche de domenica dale 6 de matina ale 17 de pomeriggio.

[sono piccolo ma crescero]

Oggi mia moglie me ga ordinà de far ordine in una scatola dove che buto de tuto, cerniere de mobili, veci tochi de spine,... Xe un de quei momenti che ghe voio sai ben

A parte i scherzi, la ga anche ragion, perché son casinista al masimo, e ala fine no trovo gnente de quel che me servi.

Ben bon, comunque fazendo ordine go trovà sto strafaniceto



Cosa xe?

No val dir che xe un ago o un ciodin. Vedo anche mi che xe un ago o un ciodin, ma el gaveva una funzion particolare. Insoma a cosa el serviva?

Ve dago un aiuto: xe una roba che ga un poco meno de 60 anni e, credo che più giovani de questa no se ghe ne trovi facile.

[babatriestina]

la prima ipotesi xe una punta de un ordegno a punte intercambiabili, una volta punteriol ( come in sto caso), una volta cazzavide..

[Elisa]

E`forse un ago speciale per tessere le reti da pesca???

[Elisa]

Ma no, sonopiccolo non tenermi in conto, giacchè in ritardo ho visto che misura soltanto 2 cm. e mezzo! L`ingrandimento inganna!

[Ursus Canadiensis]

Evidente, Dr, Wattson! Xe un ago de un giradichi vecio.

Arnie

[babatriestina]

Evidente, Dr, Wattson! Xe un ago de un giradichi vecio.

Aenie

me sa che te ga ragion, ma per bon i gaveva la base cussì schiacciada?
go dado via el giradischi una decina de anni fa, ma de anni anorum no trovavo più puntine de cambiar...
e po le mie iera tutte color giallo, tipo otton..

[sono piccolo ma crescero]

Bravissimo Arnie. Anche se la roba xe evidente per chi li ga visti e doprai e quindi ga una certa età...

Spieghemo le robe per i più giovani.

Prima che ghe fusi i microsolchi e le puntine le fusi fate de piera dura (diamante o zaffiro o rubino) la puntina iera de acciaio, dopo un paio de dischi se la doveva cambiar e se le comprava a colpi de 50 o 100 in una scatoleta. Quando mio cugin ga cambià el suo vecissimo giradischi con un che podesi sonar i microsolchi, el ne ga regalà el giradischi vecio e mio papà lo gaveva tacà alla presa fono della radio. El ne gaveva regalà anche qualche disco (me ricordo Piemontesina, C'è una chiesetta amor, ... tuta roba recente insoma ) . El giradischi lo gavemo butà via ancora nei anni '50 (meno la calamita che tegniva in mezo l'ago che gavemo salvà perché ... una calamita pol sempre eser utile! Ah Istria nobilissima! ). I dischi li gavemo brusai tuti nel genaio del '62 quando gavemo traslocà, iera un inverno fredissimo e se semo trovai senza carbon, perché a Trieste el iera esaurì. E alora nela vecia stufa Bechi de teracota che gavevimo nela casa dove che ierimo andai a star e che gaveva ancora i muri umidi de pitura, brusavimo ogni sera uno o due dischi. El tubo dela stufa diventava roso per el caldo, e iera un piazer starge vizin. Ma la matina dopo iera 12 gradi de novo Ogi qualchedun gaveria de dir, forsi, per l'inquinamento: chissà che gas de scarigo che vegniva fora de quei dischi brusai...)

Comunque, tornando ala puntina, come che la sia sopravisuda a quatro traslochi, proprio no lo so. Forsi la voleva finir fotografada in un forum

[Ursus Canadiensis]

Bravissimo Arnie. Anche se la roba xe evidente per chi li ga visti e doprai e quindi ga una certa età...

AHHEEEEMMMMMMMM!!!!!!

Arnie

[babatriestina]

alora el vostro giradischi doveva essder un modello più novo del mio, che no iera ataccabile ala presa fono dela radio, e le puntine no stava su con una calamita, ma vegniva bloccade de una rodela. Se trovo una foto del mio o de un simile, ve mostro. El funzionava ovviamente a manovella, gnente corrente e gnente batterie, do giri de manovella e ben che se fazeva durava un disco intiero, se no se sentiva che calava e se ghe dava un altro giro. No esisteva regolazion del volume, co se voleva far più pian se metteva una strazza de dove che vegniva el son.
Lo go salvado fin al trasloco del 2002, che gavevo due veci dischi con stille Nacht e Tannenbaum che scoltavo, sempre quei, ogni anno per Nadal. Prima de traslocar, lo go regalado, con una valigetta piena de dischi, a un maici appassionado de musica e robe vece.

[babatriestina]

go trovado una foto de un giradischi del genere, dei mii amici, e in una foto de Nadal se intravedi el covercio del mio