Go nela mia biblioteca un bel libro de Alberto Catalan, intitolado "Vose de Trieste passada" e uscido, quel che go mi, nel ormai lontano 1957. El riporta centinaia de nostre canzoni, racolte con probabile estrema fadiga e pazienza, e con la linea melodica de ognuna de esse. A parte el fato che no so se el libro xe mai stado ristampado, me par che Catalan sia ormai scomparso, ma i sui eredi dovesi gaver altro materiale che, li gavevo contatadi anni fa, i iera ben disposti a meter a disposizion (poi mi no go avudo el tempo de farlo, iero impegnado su tropi fronti).
Mi me domando:
chi se interesa ogi del recupero dele nostre tradizioni?
chi xe in grado de recuperar musicalmente canzoni ormai dimenticade e chi ga interese a farlo?
chi se interesa de organizar rassegne o concerti che no sia de canzoni nove ma de recupero de quele vecie?
Come go dito altrove, el folk in generale vanta un numero molto grande de apasionadi, che però richiedi qualità. Qualità nei arangiamenti, nele esecuzioni, nele incisioni, nei spetacoli.
Perché certo folk amricano, francese, inglese, irlandese e anche de altre nazioni ga avudo un svilupo notevole e el nostro no?
Perché ga trovado artisti de bon livello, gente che sa prender un toco vecio, darghe nova vita e riproporlo con successo, qualche volta con strumenti tradizionali, altre con strumenti e in chiave moderna.
Gavemo mai fato niente de tuto questo?
Mi me vien in mente un nome solo: Lorenzo Pilat .
Mi no digo che Elisa doveva cantar canzoni triestine, ma la ga adiritura dovudo andar fora dela nostra zona per gaverlo. Come sucedi speso per molti dei nostri artisti.
Nemo propheta in patria? Pol eser, ma dopo no stemo a lamentarse e pretender anche che i canti (o i soni) canzoni triestine.
![Wink :wink:](./images/smilies/icon_wink.gif)
Nota: stago parlando de robe serie, come dito "de qualità", no de sonade ai matrimoni o de cantade de osteria, che poi nianche le osterie esisti quasi più.
![Wink :wink:](./images/smilies/icon_wink.gif)
Volesi anche aprofondir el discorso folk triestino, ma no adeso.
![Wink :wink:](./images/smilies/icon_wink.gif)