Quiz sul chi xè?

Franco · Messaggio da **Franco** » mar 27 gen 2009, 12:29

macondo ha scritto:
Il libro era stato offerto in novembre 2008 in ebay per 15 Euro.

http://cgi.ebay.it/PIERPAOLO-LUZZATTO-F ... 22001r6106

Volendo se lo trova anche su BOL.IT:

http://www.bol.it/libri/scheda/ea978888642491.html

Zigolo · Messaggio da **Zigolo** » mar 27 gen 2009, 21:41

Franco ha scritto:Ma dove saria Zabodaski? Saria quela baieta quadrata a nord del'omonimo scoio?

Sì, se ghe va per la strada del'aeroporto.

Franco · Messaggio da **Franco** » mer 28 gen 2009, 9:28

Zigolo ha scritto:Sì, se ghe va per la strada del'aeroporto.

Quela cola mitica indicazion "uvala Liska"!!!!

Parlo de un venti ani fa... rivo a Lussin, e vedo 'sto gigantesco svincolo verso ovest, con 'ste indicazioni "uvala liska" grandi come se le portassi a Manhattan... "Andemo a veder cossa che xè 'sta novità!".
Un chilometro de autostrada deserta... che dopo diventa un troso.
Go fato el troso, e son rivà in un prà con parcheggià un aereoplan a elica che sembrava vegnù fora da un film de Indiana Jones!
Ani dopo ghe son tornà col camper fuoristrada, gò fato altri de quei trosi, e son rivà in posti dimenticai da Dio e dai omini... e belissimi!

Zigolo · Messaggio da **Zigolo** » gio 29 gen 2009, 17:50

Stamatina, che son passà pel gheto, me son fermà a cucar qualche libro sule bancarele e bel, in prima fila, cossa te vedo? Lettere da Zabodaski.

Ghe dago un'ociada, visto che se ghe ne ga parlà sti giorni e, anche se no lo gavevo in prevision de comprar, vardo el prezo: 30 €

A parte quela segnalazion che el iera su e-bay, su ibs lo gavevo visto a 22 €, naturalmente novo, in un'edizion del 2002 (quela sula bancarela iera la prima, 1984).

Xe un ulteriore conferma che andar per libri usadi ga un senso se se zerca qualcossa de dificile de trovar, ma no sicuro per sparagnar

sono piccolo ma crescero

Scusa Franco, ma no sta andar a Zabodaski. Te ga meso un indovinel e te ne lasi senza risposta? No xe giusto

babatriestina · Messaggio da **babatriestina** » gio 29 gen 2009, 19:51

intanto per i libri veci dipendi de dove se li va a zercar, po me par che per le prime edizioni i fazzi pagar de più. El original che go qua, costava 24.000 lire nel 1984. Fe conto l'inflazion, po scalè el usato..
ghe xe solo tre edizioni, 1984 e 2002 e una devi esser doppia.

Lo stago rileggendo, e me par de sentir contar de papà, e ritrovo anche i amici de papà. Per Trieste prima dela prima guerra e durante la guerra, posso solo dir : italian. con quel che consegui. Ma nol lesina dopo le critiche al fascismo (son arrivada al 1940..)

Franco · Messaggio da **Franco** » gio 29 gen 2009, 22:16

babatriestina ha scritto:intanto per i libri veci dipendi de dove se li va a zercar,

Verisimo! Ad esempio ghe xè quela cadena de picie librerie in frenciaisin... quele tute piturade de gialo, che te trovi un poco dapertuto... no so chi xè el mona de architeto che le gà progetade, perchè la porta xè TROPO picia... po', in mezo ai libri, te trovi anche giornai e cartoni del late... ma i libri che te trovi i costa veramente poco!!!

Scherzi a parte, xè proprio triste veder quanti libri, bei e anche rari, che vien butai via ogni giorno...

Franco · Messaggio da **Franco** » gio 29 gen 2009, 22:19

sono piccolo ma crescero ha scritto:Scusa Franco, ma no sta andar a Zabodaski. Te ga meso un indovinel e te ne lasi senza risposta? No xe giusto

Nisun no gà gnanche tentà!

Riprovo, vedemo se qualchedun tenta... se no darò la soluzion:

- el gà stabilì che le piere se consuma ala riversa
- le sue bestiuze preferide vivi nel mus'cio
- tanti lo gà conossù, e anche se adeso i ghe ne gà un bon ricordo, quela volta el ghe fazeva paura

serlilian · Messaggio da **serlilian** » ven 30 gen 2009, 1:33

No go idea de chi che possi esser.

babatriestina · Messaggio da **babatriestina** » ven 30 gen 2009, 7:54

anche mi son nela totale oscurità... posso gaverlo conossudo mi?? le piere che se consuma...

Nona Picia · Messaggio da **Nona Picia** » ven 30 gen 2009, 8:52

Franco · Messaggio da **Franco** » ven 30 gen 2009, 12:24

Ok, visto che rinuncè, ve dago la soluzion completa.

Walter Maucci
(Vienna 1922 - Borneo 1995)

- el gà stabilì che le piere se consuma ala riversa

El gà avanzà (credo ancora nei ani '50) la teoria dela speleomorfogenesi carsica (=formazion dele grote carsiche) per erosion inversa; overo che in Carso le grote se svilupa dal baso verso l'alto, per erosion de l'acqua che scori sule pareti, e per un complicado zogo de equilibri chimici erodi la piera su cui scori.
Ogi xè una teoria riconossuda (per le grote carsiche), ma al'epoca la iera rivoluzionaria.

- le sue bestiuze preferide vivi nel mus'cio

El xè stà el magior esperto mondiale de strane bestiuze che se chiama Tardigradi ( http://it.wikipedia.org/wiki/Tardigrada ), e che vivi apunto de solito nel mus'cio.
El suo libro "Tardigrada" xè ancora ogi el più importante e completo su 'sto argomento.
E poderia sembrar una sempiada, se no fussi che i Tradigradi ga riscosso recentemente grosi interesi scientifici, per tre motivi:
- xè i più strani da "incastrar" nel proceso evolutivo
- i gà una capacità de resistenza enorme (te li pol portar quai al zero asoluto, te li pol boir, te li pol lassar senza acqua per diese ani, te li pol bombardar con ragi gamma o raggi x... gnente, lori sopravivi a tuto)
- xè le uniche bestie che te trovi leteralmente dapertuto nel mondo: dal artide al antartide, dale fose oceaniche ala zima del everest...

Tanto che qualchedun, ultimamemente, gà perfino avanzà l'ipotesi che no sia originari dela tera, ma extraterestri...

- tanti lo gà conossù, e anche se adeso i ghe ne gà un bon ricordo, quela volta el ghe fazeva paura

Per tantisimi ani el gà insegnà scienze e chimica al liceo Oberdan.
Chi (come mi) gà avù la fortuna de averlo come profesor, se ricorderà i momenti de puro teror che precedeva le interogazioni: el gaveva un sistema preciso per "anunciarse" e "giustificarse", el interogava un mulo a ogni lezion, e se nissun se "anunciava" lui scoreva cola pena sul registro scegliendo... gnanche dario Argento non se mai riuscido a far vegnir i brividi come in quei momenti!!!

Però, a distanza de tanti ani, devo dir che xè sta probabilmente el meio profesor che gabio mai avù, sia al liceo che al'Università... sia per coreteza, per competenza, per saver insegnar...
Tanto che, me ricordo, lo gavevimo voludo come comisario de matura, e tuta la clase (strano a dirse!) iera stada d'acordo...
Ogi insegnar ale superiori piutosto che al'università xè reputà "un scalin più soto": cussi no iera per lui, che el saveva far el prof de liceo con una dignità, una preparazion e una serietà che raramente go dopo visto al'università; le sue no iera lezioni, ma conferenze.

El xè stado anche un pionier dela speleosub: legeve questo, che merita: http://www.sastrieste.it/SitoSAS/Societa1b.html

Vedi anche:
http://www.gssg.it/modules/Downloads/da ... ni%201.pdf

babatriestina · Messaggio da **babatriestina** » ven 30 gen 2009, 13:01

me vergogno a dir, ma no lo gavevo mai sentido nominar.
purtroppo al Dante mi gavevo inveze una prof de scienze che incuteva altrettanto terror, ma come capacità de insegnamento, capacità scientifica e in genere aggiornamento iera scarsissima. zia Memma! mi so solo che ale prime volte go domandado una spiegazion e le risposta testual xe stada: "è così perchè è così". Mi no ghe go mai più fato una domanda e me son convinta che la chimica no se pol capir..

AdlerTS · Messaggio da **AdlerTS** » ven 30 gen 2009, 21:46

Non conossevo ne Maucci ne i Tardigradi

Grazie !

babatriestina · Messaggio da **babatriestina** » ven 30 gen 2009, 22:31

e za che semo, come el xe finido in Borneo?

sono piccolo ma crescero

Mi a l'Oberdan gavevo Cervai; Maucci lo conosevo solo de vista e nol fazeva paura (anche perché ne fazeva bastanza Cervai per conto suo). Lo go avù anche mi comisario interno ala matura, perché quela volta iera un comisario per tuta la scola.

Onestamente no go mai savù dele sue ricerche e me lo ricordo solo vagamente.

Dei tardigradi no go mai senti gnanche el nome. Adeso vado a veder su wikipedia... chissà!

sono piccolo ma crescero

Go capì... sarà la carne che i ghe darà de magnar ai astronauti... che cusì diventerà tuti vegetariani!

sono piccolo ma crescero

Scusa, me son dimenticà de concluder.

A parte i scherzi, veramente interesante la storia de ste bestiuze.

Franco · Messaggio da **Franco** » sab 31 gen 2009, 18:20

babatriestina ha scritto:e za che semo, come el xe finido in Borneo?

El iera per una spedizione entomologica... e, conosendolo, per cossa se no?

Me ricordo che, de studenti, el ne gaveva domandà, se qualchedun andava in giro per el mondo, de portarghe un pugno de mus'cio serà in un sacheto de carta: dopo el se rangiava lui a tirarghe fora i tardigradi, e se el scopriva una nova specie el prometeva de darghe el nostro nome (de nove specie el ghe ne gà scoperte diverse, no go idea se sia mai suceso col mus'cio portà de qualche studente...

)

AdlerTS · Messaggio da **AdlerTS** » sab 7 feb 2009, 22:30

sono piccolo ma crescero ha scritto:La persona in questione è Pierpaolo Luzzato Fegiz.

El Fegiz in question ga scritto "alimentazione e prezzi nell'economia di guerra", dal quale vedo che lo stipendio orario de un operaio nel 1940 jera de circa 4 lire e de un manoval de circa 2.5.

Contemporaneamente el riporta i prezzi de alcuni beni de largo consumo

un paio de scarpe: 50 lire
calze da donna: 16 lire
un litro de vin: 4.80 lire
carne de bue: 9 lire al kg
zuchero: 7 lire al kg
caffé: 40 lire a kg

Se volé far un confronto ....